PDA

View Full Version : التفاحة



جحدر
13-05-2001, 07:44 AM
الله اللي راد .. والعقدة قضاه اللي عـقـدها
لاعلى الدنيا سلام ولا لباقي العمر زينة

الفضا ماكنه الا خيمةٍ طاحت عمــدها
والفرح ماكنه الا شـيخ ٍ انقصت يدينه

والعمر قطعة زجـاج انكسرت ولاً طال امدها
والعرب في العيد بدموع اليتامى مستهينة

والشوارع لفها ثوب الظلام اللــي هجدها
والبيوت اطلال من عقب المحبة والسكينة

والشتا والليل والبرد وسما يصرخ رعدهـا
والعيون اللي وراالشباك مذعورة حزينة

طولوا في الكهف الاصحاب وبقت روحي وحدها
كنها في كوكب ثاني خلا من ساكنينه

الوداع اللي بعلم .. لعيني اعبر من رمدها
والوداع اللي بلا علم لقفص صدري غبينة

والوداع اللي بلا رجعة .. عليّ آمرّ وادهى
والله انه غرغرة سم وسكاكينٍ سنينة

والعنود اللي جفيت الناس والدنيا بعدها
مدت الفرقا لغاليها وهي تعطي الثمينة

وينها ؟.. كيف تركتني؟..ليه ماجت في وعدها
والقمر لا طل خابرها تجي بيني وبينه

رحت انادي واتلمس في مهب الريح يدها
كني حصانٍ بلا صاحب طوي البيدا حنينه

رحت اصيح : الصبح وينه ؟ والعرب مارد احدها
ماسمعت الا صدى صوتي يقول ( الصبح وينه )

كنهم من يوم ذيك الشمس غابت عن بلدها
طلعوني في النفود وصكوا ابواب المدينة

كنهم من يوم ذيك الذاهبه ما احدٍ وجدها
كل رجال من الشرهة قلع في الدرب عينه

اثرها ماتت وماتت كل فرحه في مهدها
والربيع اقفت به اللي كانت التاج لجبينه

جاورت عقب الحدايق .. حفرةٍ ما اقسى لحدها
حفرة ماني مصدق كيف ضمت ياسمينة

للحزن فيني مثل ما للطهارة في جسدها
ويش اسوي لافتشت اللي لها وسط الخزينة

زخرفت حلم .. وبنت له مسكن .. وسمت ولدها
آه لو غرد ولدها في خميلة والدينه

عاهدتني وظفرت بيمينٍ اقوى من عهدها
والصبي لا خير فيه إن كان ما نفذ يمينه

ما تتقى عن رثاها عرقٍ اكتظ بشهدها
ولا تبقى خلف قضبان الجفن عذرا سجينة

كيف عند العالم أيام العزا محصى عددها
والا انا طالت شهوره والله أعلم عن سنينه

لا الثرى فيها نبات ولا المشى خفف نكدها
لا السما فيها طيور ولا البحر يمه سفينة

لا القمر هذا مساه ، ولا العصي هذا رغدها
لا الزهر هذا شذاه ، ولا الذهب هذا رنينه

قالوا الشيخ الفلاني مرجع القوم وسندها
قال : " يبشر بالعوض " والعلم جينا ناقلينه

ساق لك بدر البدور اللي نشدها من نشدها
جادلٍ هزت عروش وخيبت روسٍ ذهينة

قسمها في رسمها في جسمها .. إلا في رشدها
واسمها .. ان جا للغضب قومه على الألسن رطينة

اترك الناي ، وعطية شيخنا غن لسعدها
وانبسط يا عم وانس اللي ورا التربة دفينة

قلت ولصدري تناهيدٍ تروع من شهدها :
آه وا ويلاه من يجلب على قلبي ضنينه

خلوا اغلى ذاهبة ترعى ربيع اللي فقدها
والعطا راعيه ما احدٍ صوبه .. الله لا يهينه

لو ضمنت الجنة وتفاحة القلب وشهدها
قلت : من بكرة عسى مجنونها تاقف سنينه

مع تحيات ناصر القحطاني

امير المحبين
13-05-2001, 08:10 AM
الرامس...أختيار موفق جداً

ما فيه شك هذا شاعر الأندلس

أحسنت الأختيار... :)

ضب آطخم
13-05-2001, 09:17 AM
اخوي الغالي الرامس

دائماً تحتار من القصائد اجملها

لا عدمتك

جحدر
13-05-2001, 09:30 AM
اخوي امير المحبين
.
.
اخوي ضب اطخم
.
.
.
كلكم تستحقون الثنا بس انا لا جيد الثنا لكم فلكم اجمل مايقال

عاشق وفاء
13-05-2001, 04:43 PM
مساء الخير اخي الرامس

اختيار جميل جدا

يسلم ذوقك اخي

تحياتي

smart ghost
13-05-2001, 06:39 PM
السلالالالالام عليكم...؛
مساك الله بالخير اخوي الرامس.

اختيار موفق وجميل وما هي غريبه عليك.ونتمنى نشوف المزيد.


تحياتي.


][ملك الشات رفيع الشان][




http://www.mypage.ayna.com/hams_a/nawaf.jpg