PDA

View Full Version : خاويتك



جحدر
18-05-2001, 09:47 AM
حبيبي طال موالٍ يجيب الهم والتنكيد

عسى الله ما يخلي لي خليل إن كان خليتك

يا بو عذرٍ يشابه ضحكة الأطفال يوم العيد

أنا أبكيتك !؟ .. حشا واللي فتني فيك ما ابكيتك

حرام بعينك الدمعة حرام بصدرك التنهيد

حرام البرد يمضغ راحتينك ما ترضيتك

تعال .. وكل جرحٍ فدوتك يا اقرب من التضميد

اشوفك من زمان وقدر المولى وحبيتك

من اول مرةٍ شفتك .. تمنيتك .. وكنت السيد

وتمنيت أني أصلا يوم شفتك ما تمنيتك

تخيل كيف سكّنتك وخليت القريب بعيد

وروّح كل عاشق يحلم ببيت ٍ مثل بيتك

فداه من البيوت اللي يمل ويعشق التجديد

يا عمري شف وهو قلبي متاني فيه وصيتك

أسج وتنقلب ضوضا الشوارع في عيوني بيد

واجيك ويرتعش في خافقي عصفور لا جيتك

دخيل الطلة اللي كل ما جت فوق ذاك الجيد

دريت أنك طموحي يا طموح ما تعديتك

حشا ما مرني يومٍ صبوح .. إلا أنت بالتحديد

تراك الصبح في عيني من أول ما تهجيتك

نسيت أن الرسايل من يدي كانت تسفر ليد

تكحل لك مساك وعطرها يحييك ويميتك

نسيت أنك ظفرت بزفرةٍ تستاهل التمجيد

ولا تلحق جزاها لو تجمّع لي تناهيتك

نسيت اني وضعت الشمس في كفك وعفت الغيد

وحطيت القمر في كفك الثاني وخاويتك

أنا لي ذنبك .. وللذنب عذر .. وللعذر تمهيد

ولك خيل الرضا تصهل بصوتي يوم ناديتك

تمتع بالغلا ياللي يسمونك عنود الصيد

والا يا كثر ما غرتني حروفي وسميتك

حبيبي .. لا سقا الله عرفي اول قبل أجيب العيد

سقا الله يوم طشت .. الا سقا الله يوم حبيتك

ناصر القحطاني

beauty
18-05-2001, 10:10 AM
حرام بعينك الدمعة حرام بصدرك التنهيد

حرام البرد يمضغ راحتينك ما ترضيتك


رااااااائعة .....
اختيار موفق عزيزي الرامس
تسلم الايادي .....

الراشد
18-05-2001, 07:22 PM
الرامس
مساء الخير

مميز في الاختيار

تقبل تحياتي
الراشــد

وهج
22-05-2001, 01:56 AM
قصيدة مميزة جدا
تسلم على هذا الاختيار
تحياتي لك
:yh: وهج