PDA

View Full Version : الضب ماله وما عليه !!!



الرايق
18-05-2001, 02:49 PM
باب او دريشة ماجاء في الضبان
هذي مجموعة معلومات عن الضب من حد الراس الين اخر شوكة في العكرة يعني تشريح كامل متكامل واتمنى اني اكون وفقت في تقديم هالمعلومات المفيده عن هالحيوان الزاحف

اسم الضب
يسمى ذكر الضب عير وخاصه اذا كان سافط العداد في الكبر والأنثى اسمها ضبه ، وولدهم الصغير اسمه سحيلي يعني الابو ينادونه ربعة ابو سحل اما البنت فاسمها ضبيبة لكن صعب جدا في علم الضببه انك تعرف الذكر من الانث وخاصه اذا كانت الضببة توها في مقتبل العمر الا عاد اذا بغيت تخربها وتسوي حركات وسخه فهذا شي ثاني
وهذي صورة للسحيلي كما خلقة الله
http://saudia.virtualave.net/cgi-bin/uploads1/s7eli1.jpg
راس الضب باللي فيه
دايم العير يكون في راسه ورقبته حدود سود وبعضهم يحسبها لحية من بعيد وهذي ميزة الذكر الشايب ، وسنون الضب قوية مع انها صغيره لكن اذا قرطك وانت تبيثر عليه فاحسن حل انك تنخج خشته بعود او تكب عليه فلفل الين يعطس وتطلع يدك منه ، ودايم تلاحظ الضب يشرب هواء ثم يبخه بقوه وخاصه اذا كان مطرود ومقفله معه ، اما عيونه فهي غالبا ما تكون حمر وصبياته عسليه وله اذان على شكل خياشيم وسمعه احيانا يكون الله بالخير لأنك ترمي عليه بالشوزن وتسف من عنده وما جاب خبرك بس عنده حاسه قويه بمجرد انه يلمح قرطاسه تدربى يجحر وما تشوف الا عكرته سابقته

بطن وأحشاء الضب
آآآآآآه هنا مربط الضب هنا لندن قصدي هنا كلش المكينه والقير ونبدا بالمصارين اللي مالها داعي انك تخليها فيه بعد الذبح اكتم نفسك واقطعها وانطلها بعيد واهم شي في البطن هو السلايق هي بمثابة الكنز الثمين في احشاءه واذا كنت محظوظ بضب مربع ومزغدد من الربيع فتبي تلقى سلايقه حول ما تطلع مع اذانه من كبرهن وطولهن وفيه شي لازم تنتبه له في بطنه اللي هو المراره وهي عباره عن تفيفيخه صغيره لكن اذا انفقعت في البطن فسدت اللي فيه اقطعها بشويش واغسل البطن عقبها


عكرة الضب
هنا الزبده وهنا مطلب الضب وهالعكره تتكون من واحد وعشرين عقدة تقريبا وتعتبر سلاحه في وقت الزنقه وضربة العكره تسمى لسبه مشتقه من لسب يلسب لسبا اي رصعه و فيه طريقة ممتازه لتحريك الضب اذا شصب مكانه وهي انك تحرش عكرته وتدغدها مع جوانبها وبكذا يبي يمشي طبلونه في أي اتجاه تبيه ، بالاضافه الى ان العكره تعتبر اطعم مافي الضب لدرجة ان بعضهم اذا صاده يقطع عكرته ويطلقه الين يطلع شكله كنه موتر بدون نسافه

جلد الضب
جلده طبعا احرش وخشن ويستخدمون جلده في تزيين النعال والشنط وابواك الفلوس ، وميزة جلده انه ما يتأثر بالماء هذا غير تحمله للحرارة

بيض الضبه
يقولون ان الضبه تبيض حول سبعين بيضة او اكثر ويكون بيضها في حجم حلاو الصعو للي يعرفها او كبر المصاقيل وطبعا الضبه ما ترجن على بيضها لكنها تدفنه في مكان معين او مثلث الين يفقس ويبي له حول الاربعين يوم عشان يفقس يعني نفاسية بالضبط مثل حريمنا ويقال ان الأم تاكل عيالها اذا طلعوا من البيضه الا اللي وفق وعط قبل ما تطيح فيه

حياته واطباعة
يقولون ( ايه لزقها في يقولون ) ان عمر الضب ياصل 300 سنه ؟ او اكثر والضب معروف عند الناس بطول العمر، هذا غير انه يبطي في موته لدرجة ما نتصورها واغلبية اللي ذبحوه وقطعوه وفي القدر سقطوه لقو بعض اجزاءه تتحرك ؟ وقالوا الاولين في احد امثلتهم (لزق المثل في الاولين ) يموت الضب وعكرته تلسب ، كنايه عن صعوبة موته ، ومن أطباعه انه ضعيف الذاكره وعشان كذا تلقاه ما يبعد عن جحره لكن اذا داخ مع الربيع وخربها بعيد عن الجحر وطردته فهو يبي يسحب السيفون على جحره وارض الله واسعه، ومن اطباعه انه ما يتواطن مع الورر وقبلهم هواش ولعنة خيّر مع انهم يتشابهون شوي في الشكل لكن الضب يفضل العقرب على هالحيوان الزاحف المعصقل وبينه وبين العقرب صداقه ومصالح فهو يسكنها جحره مقابل انها تقرص كل من حاول يدخل يده يتلمس عكره، ومن اطباعه ايضا انه فيه شوفة نفس وكبر وخاصه وقت الخضره والعشب وتشوفه يختال في مشية يسحب عكرته ويمشي بشكل متغنج ، ايضا له قدره عجيبه في صبره عن الاكل فتلقاه يجلس في الجحر كم شهر بدون اكل ، ، هذا غير انه ما يحتاج للماء لأن جلده خالي تماما من الكحول قصدي من المسام

طرق صيدة
له كم طريقة واولها انك تجيب المسحاة والعتله وتبدا تحفر جحره لكن مشكلة جحره انه يكون طويل وعميق ومتعرج وهالطريقة انقرضت هالحين لكثرة العجازين في هالوقت ، والطريقة الثانيه هي انك (تغرّه ) بالماء الين يطلع وبعض الضببه هالحين تنبه للطريقه هذي وحط له خزان تصريف في جحره يعني يبي يقضي الماء ما طلع ، والطريقة الثالثه انك تشكمنه والمعروف انها مضره للضب وتفسد لحمه ، وفيه طريقه (المكناس ) وهو عصى تشبه وراعيه اذا شاف الضب خارط الريوس في جحره يختل له بشويش ويمشي على اطراف اصابعه و يطعنه طعنة غدر.
ا.هـ انتهى ههههههههههههها






http://saudia.virtualave.net/cgi-bin/uploads1/adll3.jpg

240L
18-05-2001, 02:54 PM
جغجغجغجغغجغجغججغججغجغ

مرررررحب بيك يازول

حمود النكبه
18-05-2001, 07:14 PM
ايه كذا من زمان .. الحين بدت الابداعات تطلع .. مع الصور التوضيحيه ..خخخخخخخخخخخخخخخخخخخخخخخخخخخ :)

يا حليلوه .. الحسيل الصغير يجنن .. ودك من يعرمشه .. هههههههههههه ..:D

رهيييييييب يالرايق .. والله رهيب ..

Qween Of Heart
18-05-2001, 07:44 PM
يوووووووووووووووه يا راااااااااااااايق
الله يهديك ..............يامه يا متوحش ارعبتني ..............
لا تقوووووووووووووول انك مثلهم ت ا ك ل ه
يا ويلي ولا شكله يــــمــــه يخوف دايناصور
:xx: :xx: :xx: :xx: :xx:

Qween Of Heart

شوق
18-05-2001, 08:10 PM
:eek: :eek: :eek:
و الله معلومات رهيبة , جزاك الله خير .
بس عندي اذا تكرمت بعض الاسئلة التي تتعلق بمجال تخصصكم .

سـ1 هل صحيح انه يحتوي على نسبة كبيرة من الكليسترول ( ولا هذي اشاعة مطلعينها حقين حماية الحياة الفطرية ) ؟

سـ2 هل صحيح ان لحمة دواء للكثير من الامراض لانه ياكل من اعشاب برية مختلفة ( ولا هذي اشاعة مطلعينها شيبانا علشان يهيصون عليه ) ؟

سـ3 وش معني (( صبياته )) عسلية ؟

سـ4وش هي (( السلايق )) شحم ولا لحم ( ما اظن فيه شيء ثاني غيرهم ) ؟

سـ5 ايش التفسير انه يدغدغ من جوانب عكرته , جدتي كانت تدغدغه و تغني تقول ( يا ضبيب حرش ابوك راح يصلي ولا جاء ) ؟

سـ6 ( هالمرة ) عمتي تقول ان بيضة الضب كبر بيضة الحمام تقريبا , وش رايك ؟

سـ7 هل من جدك ان جلده يسوونه شناط و نعال , و تنباع في الاسواق تحت اي مسمى ؟

سـ8 اذا تهاوش الورر و الضب مين يفوز عادة , وهل صراعهم على الاكل او الحجر ولا ايش ( يعني مين اللي يفتن بينهم ) ؟

سـ9 وش طريقة المكناس هل هي عصى مثل الرمح , و متى يطعنه بها وهو داخل الجحر ولا اول مايطلع ؟

سـ10 وش التفسير لموته البطيء ؟ ( تصدق مرة ذبحنا ضب و فضينا بطنه و قطعنا راسه , يوم حطيناه على طاولة المطبخ قام يمشي الين طاح منها و نرجعه مرة ثانية فوقها و يمشي الين يطب , سواها كم مرة ( و الله شكله يخرع وهو يمشي ماله راس و بطنه مشقوق )

سـ11 اللي ياكلون العكرة بس اذا قطعوا عكرته و اطلقوه يعيش و ينبت له عكرة ثانية ولا وش مستقبله ( مافي ضبه بتوافق عليه ) ؟

يا خزياه و الله استحيت منك , تلقاك تقول ( عمى وش ذي ما تنعطى وجه ) , بس و الله من جد الموضوع بالنسبة لي مهم جدا جدا جدا

mr_mosta7el
18-05-2001, 11:51 PM
السلاااااااااااااااام عليكم

معلومات قيمه
و مشكور يا بعد الضبان كلهم الله لا يفرق شملهم
<<---مسكت معه طق هههههههه

راعي الجنوط
19-05-2001, 12:15 AM
اخوي الله يعطيك الف عافية على هل موضوع الاكثر من رائع






طيب على فكره كنها حملة تروجية للضب هاه.............



طيب انا من حقي ابي اعلان ومميزات الجنوط هههههههههههههههههههه



تسلم ومشكووووووووووووووووورررررررررررررررررررررررر.

طربط
19-05-2001, 01:35 AM
السلام عليكم ومسيك الله بالخير اخ رايق حبيت انوه لك ببعض الشغلات والفت نظرك عنها اذا تسمح لي :
أولا : أسم انثى الضب مكون طول الله عمرك .
ثانياً : السلايق مفيده جدا خصوصا انها هي اللي داخل احشاء الضب وهي تنحمس الين تذوب مررررررره وهي خاليه من الكليسترول مره يعني لو تحطها في الفريزر لمده اسبوع وتطلعها ماتجمد ابدا وذلك لان نسبه الكرسترول فيها 0% .
ثالثاً : العكره مفيده جدا يقولون الشيبان انها تشد الظهر والعصب شلون لاحد يسالني عن شيء معرف .
رابعاً : الطريقه الامثل لمسك الضب هي وضع اصبع رجلك الكبير بين عكرته وبين ماخرته ودفعه بقوه علشان يجي محول على ظهره وتقضبه .
خامساً : بيضت المكون وهي انثى الضب الحامل هههههههههه تقريبا مفصل وربع من اصابع الرجال او اصغر شوي .
سادساً : فيه وصفه طبيه ممتازه يسونها العجز والشيبان الا وهي حط دمه على مكان الرومتزيم يعني على الركب او اليدين او فيه بعضهم يشربونه ( طبعا مافيه امل اكله علشان اشرب دمع وع ههههههههههههه )
سابعاً :بالنسبه لموته يتأخر بقوه علشان كذا تلقى الناس يسلخونه ويزبطونه ويخلونه على جنب فتره الين يهجد ولكنه مايهجد بعدها يحطونه في القدر وهو يطبخ ويحطون على غطا القدر حصى علشان مايطلع لانه يبطي مايموت ويمكن تعذيب له من الله هههههههههه وناس بقولون فيه سكون علشان كذا يبطي مايموت وبس والله اعلم .:rr:

الرايق
19-05-2001, 07:53 AM
الاخ 240L
يامراحب
داير شنو :D
ــــــــــــــــــــــــــ
الاخ حمود النكبة
الله يبعد عنك كل نكبة كخخخخخخخخخخخخخخخ:mm:
تسلم ياحبيب البي
والنسبة للسحيلي اذا تبيه ارسلته لك ....بس لا تاكله ههههههههههههها:D
ـــــــــــــــــــــــــــــــ
كوين اوف ذا هارت <<<متعيجز اكتب عنكليزي
اذا كذا تخلفين من الضبان ...اجل وش تسوين اذا شفتي ثعبان
:xx:
ودي احط لك ثعبانة هنا بس خايف يغمى عليك كخخخخخخخ ;)

عموما باالنسبة لاكله انا اكله واكل ابو جده بعد ههههههههه:mm:
http://saudia.virtualave.net/cgi-bin/uploads1/cabsa.jpg
ــــــــــــــــــــــــــ
الاخت شوق
عمى وش ذي ما تنعطى وجه <<<وش دراك اني باقولها ههههههههه:)
عموما شكرا لك على اسئلتك الغثيثة ما قصر طربط ريحني وجاوب عني
<<سوداني هههههههه:D
ــــــــــــــــــــــــــــ
الاخ مستر مستحيل
وعليكم السلام
وش رايك تنزل هالكلمات في شريط كخخخخخخخخخخخخخخخخخ:p
مشكور اخوي
ـــــــــــــــــــــــــــــــ
الاخ راعي الجنوط
الله يعافي بدنك
وخلك في جنوطك احسن لك هههههههههه
على فكرة كم مقاس الجنط عندك كخخخخخخخخخخخخخ:p
<<ترى مزحي ثقيل زي دمي
تسلم اخوي والله يحييك
ـــــــــــــــــــــــــ
اخوي طربط
تسلملي على هالمعلومات الغيمة هههههها

وهذي سلايق على كيف كيفك ككخخخخخخخخ:nn:

http://saudia.virtualave.net/cgi-bin/uploads1/salayeg.jpg

شوق
19-05-2001, 10:16 AM
يا الــعــجــاز ! !
قل ماعرف , اقول صح .

طربط قال بعض الاشياء مهوب كلها .

بس خلاص منه الله ولا منه خلقة , مابي منك اجابة :g: :mad: :g: :mad:

بروح اسائل لي شايب رايق , مهوب الرايق .
زعلت &&
.
.
.
طربط اذا تعرف الاجابة علمني تكفى ولا عليك امر :) :D :) :D

قوطي من غير غطاء
19-05-2001, 03:15 PM
رااااااايق....وراااائع جدا.....وتعجبني ثقافتك الرائئئئقه.)