PDA

View Full Version : الذاهبه



شرقاوي
19-05-2001, 06:03 AM
الله اللي راد والعقده قطعها اللي عقدها
...................لا على الدنيا سلام ولا لباقي العمر زينه
الفضا ماكنه ألا خيمةٍ طاحت عمدها
......................والفرح ما كنه ألا شيخٍ أنقصت يدينه
والعمر قطعة زجاج أنكسرت ولا طال أمدها
.................والعرب في العيد بدموع اليتامى مستهينه
والشوارع لفها ثوب الظلام اللي هجدها
................والبيوت أطلال من عقب المحبه والسكينه
والشتا واليل والبرد وسما يصرخ رعدها
...............والعيون اللي ورى الشباك مذعوره حزينه
طولوا في الكهف الاصحاب وبقت روحي وحدها
.....................كنها في كوكبٍ ثاني خلا من ساكنينه
الوداع اللي بعلم العين يعبر من رمدها
..............والوداع اللي بلا علم القفص صدري غبينه
والوداع اللي بلا رجعه علي أمر وادهى
....................والله أنه غرغرت سم وسكاكينٍ سنينه
والعنود اللي جفيت الناس والدنيا بعدها
.....................مدت الفرقا لغاليها وهي تعطي الثمينه
وينها كيف تركتني ليه ما جت في وعدها
......................والقمر لاطل خابرها تجي بيني وبينه
رحت أنادي واتلمس في مهب الريح يدها
................كني حصانٍ بلا صاحب طوى البيدا حنينه
رحت أصيح الصبح وينه والعرب ما رد أحدها
............ما سمعت إلا صدى صوتي يقول الصبح وينه
كنهم من يوم ذيك الشمس غابت عن بلده
................ طلعوني في النفود وصكوا أبواب المدينه
كنهم من يوم ذيك الذاهبه محدٍ وجدها
...................كل رجال من الشرهه قلع فالدرب عينه
أثرها ماتت وماتت كل فرحه في مهدها
...................والربيع أقفت به اللي كانت التاج لجبينه
جاورت عقب الحدايق حفرتٍ مقسى لحدها
..................حفرةٍ ماني مصدق كيف ضمت ياسمينه
للحزن فيني مثل ما لطهاره في جسدها
...............ويش أسوي لافتشت اللي لها وسط الخزينه
زخرفت حلم وبنت له مسكن وسمت ولدها
.........................أه لو غرت ولدها في خميلة والدينه
عاهدتني وظفرت بيمينٍ أقوى من عهدها
....................والصبي لا خير فيه أن كان مانفذ يمينه
ماتثقى عن رثاها عرقٍ أكتظ بشهدها
.................ولا بقى خلف جدران الجفن عذرى سجينه
كيف عند العالم أيام العرب ما حصى عددها
...................ولا أنا طالت شهوره والله أعلم كم سنينه
لا الثرى فيها نبات ولا المشي خفف نكدها
...................لا السما فيها طيور ولا البحر يمه سفينه
لا القمر هذا مساه ولا العصي هذا رغدها
....................لا الزهر هذا شذاه ولا الذهب هذا رنينه
قالوا الشيخ الفلاني مرجع القوم وسندها
......................قال يبشر بالعوض والعلم جينا ناقلينه
ساق لك بدر البدور اللي نشدها من نشدها
..................جادلٍ هزت عروش وخيبت روسٍ ذهينه
قسمها في جسمها في رسمها الا في رشدها
........واسمها ان جال الغضب قومه على الألسن رطينه
أترك الناي وعطية شيخنا عن لسعدها
...............وانبسط ياعم وأنسى اللي ورى التربه دفينه
قلت ولصدري تناهيت تروع من شهدها
...................آه واويلاه من يجلب على صدري غبينه
خلوا أغلى ذاهبه ترعى ربيع اللي فقدها
.....................والعطا راعيه محدٍ صوبه الله لا يهينه
لو ظمنت الجنه تفاحة القلب وشهدها
.................قلت من بكره عسى مجنونها تاقف سنينه

ناصر القحطاني

************************************************** *

صح لسان الشاعر..
فعلا قصيده خياليه يعجز اللسان عن وصفها..يا الله على روعة التصوير فيها وخيال الشاعر الواسع..اروع قصيده قريتها خلال العام هذا:)
اتمنى ان تنال اعجابكم...

ماجد ناصر
19-05-2001, 06:50 AM
انا وياك يالشرقاوي فعلا ابدع الشاعر بهل قصيده

حتى ان القصيده تغني نفسها مو محتاجه احد يغنيها:)

HemA
19-05-2001, 07:30 AM
السلام عليكم
الاخ شرقاوي العزيز
اشكرك على نشر القصيدة الجميلة الّتى اثبتّ انها من افضل قصائد الرثاء
وهذا من وجهه نظري الخاصة
ولا كن الّذي جعلها بافضل صورة هو غناء الفنان خالد عبدالرحمن
القصيدة روعة في الجمال والتعبير ولاكن اداء الفنان خالد صاحب الصوت الحزين
والنبرة المجروحة الّذي جعل القصيدة تتكلم بما فيها من احزان
اعتقد ان سبب اشتهار هذة القصيدة هو غناء خالد لها
لو انها اعطيت لفنان اخر اصبحت في طي النسيان
ولاكن اعطت لمن يعرف الحزن في القصائد لانهُ شاعر واكثر قصائدة حزن وفراق.
وشكرا لك مره اخر اخي شقاوي
مع السلامة

ضب آطخم
19-05-2001, 04:48 PM
هلا والله بالغالي شرقاوي ........

صح لسان الشاعر وسلمت يمينك

بس عندي ملاحظه صغيرة

قسمها في جسمها في رسمها الا في رشدها
........واسمها ان جال الغضب قومه على الألسن رطينه

عجز البيت مكسور ولا لا

:)

صيد
19-05-2001, 05:08 PM
يوووووووووووووه ياشرقاوي ....

فعلا من اروع ..اروع ...اروع ...القصايد اللي قريتها .....

روعه فعلا مرثيه حزينه.....

شي خيالي اول مرره اقراها...بس اشكرك ..كثير مررره ..

لانك اتحت لاي فرصه لقراتها......

واختيارك فعلا كان قممه في الذوق...

احييك اخوي..:)

اختك الصيد....

الراشد
19-05-2001, 08:03 PM
شرقاوي
مساء الخير


عجيبه عجيبه والله سار لي كم يوم ادورها

صح لسان الشاعر

وتسلم يمينك يالغالي

تقبل تحياتي
الراشــد

شرقاوي
20-05-2001, 02:44 AM
ماجد ناصر:)

تشكر حبيبي والقصيده فعلا تعتبر اسطوره..

بس كلامك الثاني لايدرون عنك عشاق خالد عبدالرحمن همن يزعلون عليك;)

شرقاوي
20-05-2001, 02:52 AM
HemA :)

لا شكر على واجب..
لانها قصيده جميله نشرتها هنا..
والفنان خالد عبدالرحمن عرف يتعامل معها من ناحية اللحن والغنا الا اني اعتقد انها تستاهل انها تغنى موسيقى..راح تصير بصوره افضل بكثير من جلسة عود فقط..
بس عموما القصيده نشرت قبل لايغنيها خالد ولقت صدى طيب ..

مشكووووور يالغالي..

شرقاوي
20-05-2001, 03:07 AM
ضب آطخم:)

ومن قال..

بس ليش تعتقد ان العجز فيه كسر؟؟

تصدق رحت اسمعها لخالد عبدالرحمن واشوف كيف ينطقها واشوف انها جايه بالغنا معاه صح!!!
بس عاد انت اخبر مني وتراي مو مره عاد بالوزن حبيب قلبي..

الخالدي
20-05-2001, 03:43 AM
تسلم يمناك اخي الشرقاوي على هالإختيار ...الرائع فعلا ..
قصيده ممتازه ..لشاعر الأندلس ..
تسلم ..

شرقاوي
20-05-2001, 03:44 AM
صيد:)

مشكوره والذوق مكمنه فيك اصلا..

انا من شدة اعجابي بالقصيده قلت خليني انزلها هنا..
وعارف انكم منبهرين من روعة كلماتها..
وادري انكم متذوقين للشعر الاسطوري مثل هالقصيده

شرقاوي
20-05-2001, 03:48 AM
الراشد:)

هلا وغلا والله منور الموضوع حبيب قلبي..

تصدق اني كنت داري انك تدورها فقلت خل احطها عشان عيونك الحلوين..:D هههههههههههههههههه

شرقاوي
20-05-2001, 03:51 AM
الخالدي:)

ومن قال سالم..

شكرا على ردك يالغالي..

وحياك الله في عذب الكلام..[FONT=courier new]

وهج
22-05-2001, 02:20 AM
تسجيل اعجاب شديد
تحياتي لك
:yh: وهج

شرقاوي
22-05-2001, 03:48 AM
وهج:)


شكرا لك اختي العزيزه..:)