PDA

View Full Version : البيك تعال ابيك



شاصي2000
28-05-2001, 11:26 PM
انت يالبيك
ترى بامكاني ارد اكثر من هالقصيده ولكن اتمنى ان تكون القصيده تكفيك

قالوا قصيمي قلت ربعي هل الطيب...........نعم قصيمي رافع الراس للعال
ماني من اللي يمسك الحبل للسيف ......... أويرخص الشيمه لابوفلان بريال
انا قصيمي وال سعود المعازيب ....... وداري البدائع ديرة الجد والخال
ديرة رجال حاشت المجد والطيب ....... ياعل تسقيها المخاييل همال
دار النشامى ناطحيين المواجيب .......... اللي مراجلهم للاجيال ميثال
جماعتي ربعي رفاع المناسيب ........ من روس قوم صيتهم جال واجتال
حنا حمينا الدار غصبن بلاطيب ........ وتاريخنا المشهور باقي ولازال
ماهيب هرجات تردد واكاذيب ........ لمتخفلين ناس تنشر بالاقوال
سنايدي لاجا للصعايب طلاليب ......... نطاحة الكايد حشيمين الافعال
هم ربعي القصمان صقور الشهانيب .......نفخر بسمعتهم مع الناس تنقال
بافعالهم نفخر واعلمك ياذيب ............ واصحى تعذربهم نسميك ياحثال
قلته عقب ماشفت هرج الكراعيب ......... وشفت الامور اللي قصيرات وهزال
من شلتن كله هثايل زقاليب ............ مايعرف الصالح من الطالح الظال
يسبون دار العز دار الظواريب ........ رجالهم يسوى ثمانين خيال
راسي من الضيقه غدى ابيض من الشيب ........ ومن سبهم فينا على غير مدلال
كانك تسب الدين فالسبه عيب ........ الدين شرع الله وهو عز وكمال
والامر بالمعروف مابه معاييب ....... لاوالذي نزل تبارك والانفال
مايرتضي بالجور حتى الخراعيب ........ وطيش الكلام الشين للنفس غربال
انشد عن القصمان شبان ومشيب ....... تلقى رجاجيل لهم وزن وثقال
اللي يعمرون المساجد بترتيب ........ وفيها يقرون العقيده للاطفال
ومنهم قضاة تاخذ الحق وتصيب ....... حلالة النشبات في وقت الاشكال
ومنهم مناديب ومنهم مناصيب ......... تسلحوا بالعلم في كل منوال
اولاد علي مابهم شك او ريب ........ تكرم لحاهم عن غلط كل عذال
يامعيبين الناس فيكم معاييب .......... ولو تعرفون العيب ماصرتوا اسفال
انا غثى بالي هروج الحطاطيب ....... ناس تعذربنا على غير مدلال
تسئ بسمعتنا لمقصد وتخريب ......... تغطي معاييبها بتشويه الابطال
مخلفات اقوام ناس سكاريب ........... خجمان رجال مابهم عز ورزال
بغيت انا اتركهم وشفت التعاذيب ........وصبري نفذ والناس ماترحم الحال
ياقطعك يادنيا بنا شقة الجيب ......... عيال الحمايل مالهم كاري رجال
وقت به الثعلب غدى اشجع من الذيب........ وللبومة الخرساء صفا الجو وانجال
والله يالولا اللي كما الشمس ماتغيب ....... اللي لهم في عالي المجد منزال
عيال اخو نوره سباع الضواريب ......... اللي حمو نجد الأبيه للاجيال
اني لااشب النار باهل العذاريب ........ واقول قول مابعد قيل وايقال
لساني له حدود سواة المشاذيب ........ وادرك عسير القول بحور الامثال
مير أستعيب العيب واذرى المناقيب .......والناس مابيهم يقولون وش قال
يالله يالمعبود ياعالم الغيب .......... تدفع شرور الناس عنا والاهوال
وصلاة ربي عد رمل العراقيب ........ على نبي للثقلين مرسال

ابو بندر
29-05-2001, 01:05 AM
أشهد أنك طير شلوا....
يامن لا أنحط على الجرح طاب....

راعي الجنوط
29-05-2001, 01:39 AM
تسلم اخي العزيز شاصي

والله قصيده تشكر عليها .

mr_mosta7el
29-05-2001, 02:04 AM
السلام عليكم
الاخ شاصي ....
مراقبون المنتدى و مشرفوه اعلم بما يفعلون
اشكرك على رأيك
و الموضوع سيتم نقله لعذب الكلام
مع الشكر و التقدير

محمد الحبيب
29-05-2001, 09:09 AM
تسلم والله على هالقصيده

:)

تحياتي
:(

البيك
29-05-2001, 01:06 PM
ماشاء الــــــــــــــــلـــــــــــــــه

شــــــــــاعر بوجـــــــــودي

اول مره ادري انك شاعر :)

صح لسانك وسلم لى على الى بقصيرات الجن كلهم ... هذا اذا كنت حولهم !

شاصي2000
30-05-2001, 04:45 PM
الاخ ابو بندر حياك الله ياخوي هذا من طيبك طال عمرك

الاخ راعي الجنوط شكرا لك وماقصرت

الاخ محمد الحبيب الف شكر لك

الاخ البيك والله الموضوع ودي لو انه استمر بالعام ولكن للاسف الجهل يسوي اكثر
وخاصة كنت اتمنى هالموضوع رد على موضوعك في العام ولكن وش تقول صغار العقول واجد
ولعلمك انا اعرف انها مزح لانه فيه فرق كبير بين المزح والجد
وحياك الله وسلملي على الربع

240L
06-06-2001, 11:01 PM
صا ا ا ا ا ا ا ا ير جرير الساخر ولك

:)

صح لساااااانك شاصي

شاصي2000
07-06-2001, 04:36 PM
صح بدنك طال عمرك

مبطين عنك ياشيخ

غرام
07-06-2001, 05:42 PM
كانك تسب الدين فالسبه عيب ........ الدين شرع الله وهو عز وكمال
والامر بالمعروف مابه معاييب ....... لاوالذي نزل تبارك والانفال
.........
اختصرت المعاني
اتمنى لك كل التوفيق
ياي على الهوشة :)
امزح
اختك غرام