PDA

View Full Version : مطبخكم للاستشارات : سامي بيدرس ويشتغل بامريكا



سقط المتاع
03-06-2001, 07:37 AM
مطبخكم للاستشارات: عاطفية، اجتماعية، نفسية
نطبخ ارشادات، نسلق حلول، نسوي مشاكل

اخواني ..السلام عليكم
قررت بعد تفكير وتمحيص ان اقلد بعض المجلات في فتح باب للاستشارات والنصائح وخلافه.
لذا فاني ابشركم بافتتاح" مطبخكم للاستشارات" حيث تحمص النصائح وتسلق الاستشارات وتبهر الحلول.

سامي بيدرس ويشتغل بامريكا
عمي المستشار
السلام عليكم ورحمة الله وبركاته:
انا سامي ادرس بالصف الخامس ابتدائي. انا ابي ادرس واشتغل بامريكا. اختي واخواني الاثنين هناك، لكن امي ماهيب راضية. ابوي يقول الدراسة هناك اطيب والوظائف بالكوم. امي تقول ماودها اضيع مثل اخواني واختي. اخوي الكبير راح يدرس ثم اشتغل واعرس هناك ولا شفناه من عشر سنين . اختي جاتها بعثة للماسجتير في كولورادوا ثمن اتجوزت وابي ايقول انها فرخت هناك ولا عاد بتيجي. واخوي الثاني راح يدرس لغة من ست سنوات ولا عاد شفناه. ابوي يقول ان الحياة هناك سهلة والدراسة قوية والوظايف بالكوم. امي تقول " مايخرج سامي من البلد الا لما تخرج روحي..ماودي يضيع مني مثل الاخرين" وهي دائما تبكي على اللي راحو ولا عادوا.
ارجوك ياعمي المستشار اقنع امي اني اروح ادرس بامريكا لان والدي يقول اني بعد الثانوية قد لااجد قبول في الجامعة هنا واصير عاطل مثل ابن عمي فالح او مدمن مثل بن خالي سعد. انا اعرف الطريق..ماباضيع وعندي رقم التلفون والفاكس والاي ميل ..ويش الخوف منه.
انا اعرف ان الوظايف تكون بالمسابقة او بالتعيين او بالواسطة.. لكن ايش بالكوم؟؟هذا نظام امريكي جديد؟؟وليش ما نتطور مثلهم ونستعمل نظام الوظايف بالكوم..؟؟؟
ابنكم سامي : ايميل:&*^%$*))@طيب.نت

الجواب:
حبيبي سامي: وعليكم السلام ورحمة الله وبركاته،
ان تكلمنا فضايح وان سكتنا قهر، انا بابعج القربة.. و اللي فيها ..فيها!! ..قل للوالد يجهز غرفة نظيفة بالحاير.
شف يابني: الدراسة قوية في امريكا واوروبا..لكن الدين عندهم ..ماش..علشان كذا عندهم مشاكل واجد وهم يتخبطون في حلها وقد حلها الاسلام من مبطي.
القبول في الجامعات الامريكية سهل ولايحتاج وجع راس..وبعد الدراسة يلاقي المتخرج وظايف كثير وهذا معناه بالكوم، بل وشركات تحجزه قبل التخرج ان كان متفوقا، اما عندنا ..يخلف الله.
جامعاتنا، كلياتنا ومعاهدنا ماتستوعب الخريجين الراغبين بالدراسة وكان المسؤلين فيها ما يدرون عن عدد المتخرجين سنويا..او كانهم نايمين في العسل وتوهم صاحيين ليتفاجاؤا بالاعداد تطرق ابواب الجامعات والكليات التقنية والمعاهد..فيرفعوا معدلات القبول وهات ياواسطة ومذلة كاننا نطلب احسان منهم. وين تخطيطهم؟؟وين احصائياتهم؟؟وين توقعاتهم المستقبلية؟؟
منذ سنوات والقبول في اكبر جامعاتنا يقل سنة عن اخرى..ليش؟؟؟
سوق العمل لمن لم يجد مكانا في الجامعة اسوأ؟؟ بدوا بسعودة الخضار وطلبوا من اولادنا العمل تحت الشمس اللاهبة وفي الحر المحرق..وتركوا الوافدين ينعمون بالمكيفات والرواتب العالية. لم نسمع بسعودة ال(بيق اكسك) ولا بنوابهم في الشركات والمؤسسات.
اليس من المخجل ان تجد في الوظائف الحكومية اكثر من 5000 متعاقداجنبي بينما اولادنا مطللوب منهم العمل صبيان لبيع الخضار؟؟ تصوروا: في مستشفى حكومي يوجد متعاقد فلبيني في الاستقبال يدخل بيانات المرضى ويعمل لهم المواعيد؟؟وفي مستشفى اخر: اداري اجنبي راتبه اكثر من 300 الف ريال شهريا؟؟اليس بالامكان تعيين وطنيين تتكفل الدولة برواتبهم او جزء منها، ولفترة محدودة، جنبا الى جنب مع الوافدين ومنح الاخرين حوافز لتدريب السعوديين ثم خصم من راتبهم لمن لا يثبت جدارته في التدرب او التدريب؟؟؟
عموما..ولت سنوات عجاف ..وادعو الله ان تكون السنوات القادمة هي السمان.
لا..لاتروح يا سامي لامريكا. . فقد تضيع مثل الاخرين...وان رحت فقد ترجع بكل"اوف" اكبر من الاخرى، ولن يعجبك شيئا ابدا هنا.. بلدك مهما كان سوء الادارة فيها والتخبط في القرارات فالايام المقبلة تبشر بخير. وارجو ان اراك في منصب ( بيق اكسك) مستقبلا.

الزير دحمس
03-06-2001, 08:08 AM
الله بالخير..................ياهي فكرة جيدة......شرشحوا اللي تبون بس ....حلووووو ..بس ياشباب طفوا المسجلات مالها داعي ترانا اخويا واصدقاء;) :):)

mr_mosta7el
03-06-2001, 01:03 PM
الغالي ابو ياسر
يا جعلك تسلم يا بعدي
الحقيقة لما اقرأ موضوعاتك احس بخجل من ذاتي
لاني احس بجهلي الشديد و انا اقرأ لك
تسلم لنا يالغالي

NorelshamsS
03-06-2001, 02:45 PM
اممممممممممممممممممم
كلام خطير
احم احم
مرة حلو الموضوووووووووووووووووع
بس برضه ليه ما تشوفووووووووون الا النص الفارغ من الكاس؟؟؟؟؟؟؟؟؟؟؟؟
يعني مو كل غربة وراها مصاااااااااااااااايب يا ناس!!!!!!!!!!!
على العموم موضوع حلو واتمنى اني اقدر اكتب بمثل اسلوبك :)

سقط المتاع
04-06-2001, 02:09 PM
اخواني
سلام
الزير:فيه ساتلايت للغرض نفسه لكن مايكشف اللي في المخ
احنا فعلا اخويا وهمنا واحد والحل لما يتحقق يفيد الكل.
شكرا للمشاركة.
اللامستحيل:
سلمت انت ايضا وباقي الاخوان امثالك.
كلماتك واطراؤك اخشى ان تصيبني بالغرور واصدق اني عندي راس يفكر.
شكرا للتشجيع
نور الشمس:
اعتقد ان التشاؤم والحذر والحيطة افضل من الانطلاق بدون حدود الى مناطق او مواقف صعب الرجوع منها.
الكتابة باسلوبي؟؟هذا مستحيل، الا عند الجلوس في مكاني(منتهى الغرور!!!)
هذا المديح فخرا لي
وسلامتكم.

بيض عيون
04-06-2001, 03:23 PM
مالله صح كي بوردك ياشيخ
والله إنك فتاً موهوب صاحي
جيد سلمت يداك ياسقط المتاع
وين مافيه دورية:xx:

الحاشي777
04-06-2001, 11:29 PM
سقط المتاع :)
دايم وطبخاتك :)
ولا الشيف رمزي :)
يعطيك العافيه :)

KSA_UK
07-06-2001, 03:19 PM
الله يعطيك الف عافية,, أسمحلي بنسخة الى روائع المقالات.