PDA

View Full Version : بوش والرئيس الصيني



محمد الحبيب
05-06-2001, 09:52 AM
هالموضوع جاني بالايميل وسألت الي مرسله من الي كاتبه ... قال انه مايعرف لانه برضه جايه بالايميل .. علشان كذا .. العذر والسموحة من الأخوان .. :)
---------------

جورج بوش
سلام رديه على حاكم الصين .... بالخير ياراعي النظام الشيوعي
ياجيانق بن زيمن نبى معك قافين .... والبرق عانه في المخايل يزوعي

جاينق زيمن
يامرحبا ياقايد الغرب واهلين .... ترحيبتن ترضي غفير الجموعي
البرق عانه يبرق يسار ويمين .... يوم الرعد حدر السحايب يروعي

جورج بوش
ماجيتنا ليلة لفونا المهنين .... يومن واشنطن تشب الشموعي
ليلة حكمت الكون في عام الالفين .... جوني هل الطالات غصبن وطوعي

جيانق زيمن
ارسلت لك يابن النشامى خطابين .... جت لك مناديبي تبارك فزوعي
وانا حكمت الشرق من عام سبعين .... ما اعلنت للحكام قبلك خضوعي

جورج بوش
انته تحسب الكون باقي بقطبين .... الراسماليه وطت كل شوعي
يانايم اصحى مرت اعوام وسنين ....ماعاد فيها يابن زيمن رجوعي

جيانق زيمن
يابوش حنا بالسياسه ملمين .... ومن دون هيبتنا بنينا الدروعي
ليتك تحل المشكله في فلسطين .... عز الله ان ابوك ماهو طقوعي

جورج بوش
ياجيانق انا طوفت وحده وثنتين .... والثالثه بتكون بين الضلوعي
الطايره وش علمها فالها شين .... اللي لها بحماك حول السبوعي

جيانق زيمن
الطايره ماردها غير بكين .... جانا يقالبها خبيث الطبوعي
وين احترام الانظمه والقوانين .... مثلك عن سلوم الدول مايتوهي

جورج بوش
ماهيب يمك رايحه للفلبين .... فوق المحيط الها نزول وطلوعي
مار اعترضتوا دربها يالشياطين .... عز الله اني من سواتك جزوعي

جيانق زيمن
يا بوش يا بن بوش تلعب على مين .... ماهوب انا اللي بالكلام مخدوعي
يابوش وطتها في الارض الشياهين .... كانت تجسس وهزعتها هزوعي

جورج بوش
هات الادله كان عندك براهين .... يومك تقول ارخت علاك السموعي
مخطين ياهل الصين منتم بمقدين .... وشيهانكم عود غرابن خروعي

جيانق زيمن
ركابها يابوش خمسه وعشرين .... عسكر من الجيش النظامي نزوعي
حاصرتهم يابوش بالجيم والسين .... حتى خذيت العلم منهم قطوعي

جورج بوش وهو يضحك ..
عينت طيارك غدا راسه طحين .... وامه على قبره تهل الدموعي
الطايره ترجع لنا بعد يومين .... اخذ الكلام ولاتطول تعوعي

جيانق زيمن
خل العلوم قصار واسمع لنا زين .... عسكرك جولك يالسنافي رجوعي
والطايره لاعاد تنشد لها وين .... راحت ديه في واحدن من ربوعي

وسلامتكم ..

KSA_UK
05-06-2001, 10:57 AM
تسلم ياسطة محمد ,,,
أسمحلي بنسخة لمنتدى عذب الكلام,

محمد الحبيب
05-06-2001, 11:03 AM
KSA_UK مسموح .. خذ راحتك ... :)


بس امحق من عذب .. هذا كلام ساخر مهب عذب والاكان نزلته هناك

بس مانقول الا الشيوخ ابخص وانتم ابخص :)


تشكراتي

عسل
05-06-2001, 09:30 PM
:)

تسلم ..

والمصدر مجلة فواصل :)

----

تحياتي

الحاشي777
05-06-2001, 10:08 PM
ابو حبيب :)
واله طاح سوق الرياحي والسواط بعد ذا القلطه :D :D
خلوووووووووووووووووووووووووووها :D
:)
تحياتي

خزامىنجد
06-06-2001, 06:25 AM
أخي الكـريم محمد الحبيب

أول مرة أشوف اسمك في العذوبة استغربت قلت أول مرة يدخل العذوبة وش صار بالدنيا أثر موضوعك منقول :) هههههه

بصراحة موضوع حلووو بس مو محله العذوبة :)

محمد الحبيب
06-06-2001, 10:58 AM
عسل ... تسلم على هالمعلومة وماقصرت :)


الحاشي .... اي والله ...الله يرحم الثبيتي لو كان عايش كان أبا إلا ان يشارك معهم :)

خلوووووها :)


خزامى نجد .. هههههههه كنك دارية انه عندي حساسية ضد الكلام المعسول والكلام السكري :) .... هههههه ماكنت ناوي ابد اطب في هالمنتدى .. اخاف اتحكم لما اسمع كلام حلو ...... بس الله يهدي ابوفيصل ... هو الي شات الموضوع هنا :(


تشكراتي :)

ضب آطخم
07-06-2001, 08:21 PM
الكاتب الكبير.. الحبيب محمد

اختيار جميل وساخر

لاعدمتك

محمد الحبيب
09-06-2001, 10:44 AM
ضب اطخم ....

تسلم اخوي .. هذا من لطفك
<----- (خدوده عنابية من الخجل ) :)

تشكراتي

نادر
10-06-2001, 02:27 AM
السلام عليكم ورحمة الله وبركاته :

اخي العزيز 00الفاضل محمد الحبيب
تحية طيبه صادقه 00ملؤها الاخلاص والموده
اخي :
( ارجو ان لاتفهمني خطاء 00 وان تقدر الموقف ومايعني )
لقد سبق وان شاركت بهذه 00 المحاوره في هذا المنتدى الموقر وبامكانك الرجوع الى الصفحه 3 ليس المهم في ذلك الطرح مني اومنك طبعا الهدف واحد لايشك احدنا في ذلك 00 ولكن المهم هو 00عدم التنبيه من الاخوان بأن هذه الماده سبق وان طرحت من قبل احد الاعضاء 0000 سوىكانت مقوله اومنقوله .
عموما بالنسبه لي لايعني لي الامراي شيء ويفداك اكبر من ذلك 00
كماانني ارجو من الاخوان الاعضاء الوقوف للحق واعطاء كل ذي حقا حقه
ارجو المعذره من اسهابي فيماليس له داعي
تقبل عظيم تقديري وفائق احترامي ،،،،

محمد الحبيب
10-06-2001, 09:23 AM
اخي نادر .. هلا وغلا فيك اخوي ..... حياك الله ومشكور على الرد والتنوية .... على العموم مثل ماقلت اهم شي انها انتشرت .... انا الحقيقية لست من رواد عذب الكلام .... وعلشان كذا ماكنت ادري انك منزله قبل ... اما بقية الرواد فبتأكيد لهم اعذارهم .. فتلمسها لهم :)


تقبل تحياتي .. اخوك محمد :)

الراشد
10-06-2001, 10:15 AM
محمد الحبيب

جميله المحاوره بين فطاحل الشعر :b

سلمت على المشاركه الجميله

الراشد

محمد الحبيب
10-06-2001, 10:52 AM
الراشد ... هلا فيك ..مشكور اخوي ...ماسوينا شي :)

تشكراتي