PDA

View Full Version : استفتاء ( يمنع منعاً باتاً دخول ريما وضواحيها)



محمد الحبيب
16-06-2001, 01:16 PM
سبق وان طرحت هذا الاستفتاء في احد المنتديات وكان بمعية الاخت ريما ( حلوه بمعية بس والله ماعرف وش معناها ) .. المهم وبفضل من الله لم اجد أي تجاوب .. ولهذا .. قررنا نحن فهد بن حبيب البرمكي منع دخول المدعوة ريما وذلك تجنباً لأي مشادات .. ولكي يرزقنا الله بكم رد :)

الاستفتـــــاء :.

شخص ما ذهب لمطار الملك خالد لإستقبال بعضاً من محارمه ( أمه ، أخته ، زوجته ، عمته ) بعد عودتهن من رحلة ... وبعد خروجهن من بوابة القدوم وبين الحشود والأعين المنتشرة والتي تملىء الصالة .. أراد أن يحتفي ويسلم عليهن ..فكان أمام عدة أختيارات


إما أن يسلم عليهن اي يقبللهن أمام تلك الأعين الكثيرة .؟؟

أو يكتفي بمصافحتهن باليد فقط ؟؟

ربما فضل أن يقبل رأس وألدته والبقية يعطيهن الخامس ؟؟

فكراً قليلاً بأن يأشر لهن من بعيد ويأمرهن باللحاق به إلى حيث السيارة وهناك يتم الإستقبال بعيداً عن الأعين ؟؟

أرجوا الأجابة بصدق وليس بمثالية مع التعليل :) .... كذلك إذا رأيت أنك ربما ستقوم بعمل مغاير لما ذكر اعلاه .. فحبذا لو ذكرت الطريقة لنا

تشكراتي للجميع

mr_mosta7el
16-06-2001, 01:19 PM
السلام عليكم
<<----ولد عم ريما على فكره

انا بروح اسلم على الوالده بحرارته و اقبل رأسه و يدها و لو اقدر اقبل رجلها قبلتها
بعدين الباقيات راح اسلم عليهم بالمصافح و الواعد في البيت :(
هاهاهاها
زين انت وش راح تسوي

محمد الحبيب
16-06-2001, 01:28 PM
ههههه مستر مستحيل ... قلنا ضواحيها .. يعني من يعز عليها ويقرب لها :(

بس ماش ابوطبيع مايجوز عن طبعه :)


بس ياخوي اذا وصلت البيت .... راحت حرتها ؟؟؟؟؟ يعني بردت ماله داعي تسلم عليهم مرة ثانية .... فيه حل ثاني بس بعدين اقوله لك بيني وبينك :(

ذياب
16-06-2001, 01:30 PM
الخيار الاول:ss:
نسيت التعليل السبب الله يسلمك لان هل الحاصل و هل اللي استوى يعني مر علي هل الموقف

mr_mosta7el
16-06-2001, 01:31 PM
لا لا لا لا لا
حركات بيني وبينك هذي ما احبها
لاني عارف ان اخرتها عطني سلف
<<--متعقد من السعوديين اللي بالخارج هذي حركاتهم

محمد الحبيب
16-06-2001, 01:34 PM
ذياب :) ... مشاءا لله عليك .... والله انا ماسطي :( عيب :^


مستر مستحيل .. اجل تدري ...... ابقولك .. انت حب راس الوالده الله يخليها لك .... والبقية اول ماتطلع من المطار .. قبل ماتمسك خط الخدمات المساندة وقف .. وسلم عليهن همن كمل الطريق :)

وش رايك ..ذهين صح :(

عبير
16-06-2001, 01:35 PM
<- - - ولاية مستقلة لا تتبع لاي احد ... :) :)

اقل شي .. بالنسبة للأم انك تسلم عليها .. سلام كامل .. في المطار ولا في الشارع .. ولا في اي مكان بالدنيا ...

وبعدين نفس الشي للعمات اول الخالات .. اقصد الكبيرات بالسن ...
كلها حبة على الراس وانت ما شي ..

اما بالنسبة للأخوات .. اعتقد المصافح يكفي .. سواء بالمطار .. ولا غيره



عبير

mr_mosta7el
16-06-2001, 01:40 PM
ابو حبيب
تصدق اني احبك في الله
و من زمان و انا اتابع كتاباتك
و من جد معجب في اسلوبك

<<--غريبه الاعجاب طلع مره و حده

ابو حبيب انزل شوي بكلمة راس
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
v
معك سلف عشرين :(

غدق
16-06-2001, 01:40 PM
سلاااااااااام
مع ان الاستفتاء غير موجه لي......بس عجبني واسمح لي بالمشاركه.
من خلال تجاربي العائليه......الحقيقه ان محارمي مايتحرجون من السلام علينا( تقبيلنا) في مكان عام كمطار مثلا"....بالعكس يستقبلوننا بحفاوة وبدون اي احراج...ونفس الوضع في حالة التوديع في المطار مع انه كان بامكانه يودعنا بالبيت!!!! بس لحظة الودع تحتم عليك تصرفات لا شعوريه
تحيااتي

محمد الحبيب
16-06-2001, 01:56 PM
ذياب ... اها علشان كذا متعود :)


عبيرههههه حلوه لا تتبع لاحد ... شكلك مثلي ماقد طبيتي المطار :( ... يعني برايك .. ان الاخ مايقبل اخته مو ضروري والا عيب ... تصدقين اعرف ناس عيب عندهم الاخ يقبل اخته :( .... هذولا اختصروها مافيه احراجات في المطار :)


اي صح الوالده وكبار السن الافضل والواجب مثل ماقلتي يحبون على راسهن ويمطخونهن في امكان في مطار والا غيره :)


مستر مستحيل احبك الله الذي احببتني به ............ والسلف ابشر به بس بكرى اذا طلع الراتب ........ وكان مافيه كلافة عليك .. ممكن تعطين خمسة لحد مايطلع الراتب وادبر لك العشرين :(

غدق ... لا عادي الاستفتاء موجه لجميع الطبقات وشرائح المجتمع المختلفة .. وخصوصاً الطبقة الكادحة :) .................. اها يعني عادي التقبيل قدام الناس :we: ...............


ياربيه .. وش اسوي ... باقي على رجعت اهلي اسبوعين :(:rr: :we: :wow:


تشكراتي للجميع

العميل
16-06-2001, 02:09 PM
طيب هلحين يا أبو حبيب هالكتيبة هذي :confused: جاية كلها بدون محرم :( :(

بعدين وش تقصد بعمته يعني ام زوجته وإلا أخت أبوه ..؟؟؟

إذا كنت تقصد أخت ابوه أشوف انها داخلة شوي عرض بالموضوع :(
ليش ماخليتها خالته مثلا .... أتوقع أنسب لسياق الحديث ....:confused:

وبعدين اخته هذي معرسة والا توها ... يعتمد !!!

وبعدين يعتمد هل زوجته من مبطي معرس عليها وإلا توه طاف .....

إذا المتغيرات variables كثيرة ويعتمد حل المسألة على تثبيت كم متغير وحل المعادلة مالم تكن من الدرجة الثانية أو تحتوي على جذر لعدد غير حقيقي :confused: :confused:

هل هو الجحة ؟؟
الجحة ................ صح ؟؟

محمد الحبيب
16-06-2001, 02:23 PM
العميل اي ...... فرقة طقاقات وش تبيها تاخذ محرم معها كل اشوي :)

بعدين مايفرق عمته خالته .... المهم انه نوع من انواع القرابة المختلف ودرجة من الدرجات المختلفة ايضاً ...... فلا يهمنا هنا النوع الدقيق لصلة القرابة ..

تدري شورتك وهداية الله ... خليها خالته بدل عمته :) كم ابوعبدالله توه جاي من السفر عندنا :(

تصدق عاد لو انا داري انك تبي تجي كان استقبلتك .. وطبقاً هالاستفتاء على الواقع :)

بالله يعني اذا هي معرسة يمطخها واذا هي عذراء لاع ؟؟؟ منطق غريب توني ادري عنه .. على العموم انتم يالشياب لكم منطق غريب :)


يالله جاوب قلنا وش تبي تسوي :(

بيض عيون
16-06-2001, 04:13 PM
سلالالالالالالالالالالالالالام
<----------- جدة ريما
ههههههههههههههههههههههه
أولاً بأسلم على الوالده وبحب راسها عادي مافيها شئ
أما الأخوات فالسلام باليد كفاية
وخيرها بغيرها... من قالهم يجون بالطياره ههههههههههههههه

حمود النكبه
16-06-2001, 04:29 PM
و الله يا حبيب الألب أبو حبيب .. الموضوع شائك .. ولازم أروح ألبس الجزمة وانت بالكرامة .. بس تدري وش أحسن شي في هالموضوع .. انه ما يحتاج تطق الغالوقة .. يعني الواحد على طبيعته ..:)

أقول اذا انت رايح تستقبل الوالدة في المطار .. لازم تمطخها مع راسها .. واذا كان معها بنات انطل عليهم الرقم .. ههههههههههههههههههههههههه ..:)

شف انا بالنسبة لي اختي كبيرة .. وامطخها مع راسها .. :)

بس بيني وبينك انا اذا شفت واحد في المطار يمطخ في الشابات قدام الناس .. ما يدخل مزاجي .. تطق في راسي أروح أتوطاه .. مدري ليش ..:mm:

وتسلم لي على هيك طرح .. انت وخشك اللي زي القمر في أول الشهر ..:)

ريما
16-06-2001, 05:15 PM
مووووووووووووووووووووووووووب عيب ...:mad:

وابدخل واشارك لو القاك بمنتدى الطعوس ابدخل ..:(....

خخخخخخخخخخخخخخخخخخخخخخخخخخخخخخ

موووووووووووووب عيب وش فيها اذا سلم وحب اخته يااخي؟؟؟ وش فيها؟؟؟ موب حراااااااااااااااااام....

عادي انا استقبل اخواني بكل المطارات واقبلهم وهم نفس الشيء ؟؟

ليه التعقيد؟؟ بجد يعني ...وش فيها الحمد لله والشكر..:(....


عادي انا اذا جيت مطار السعوديه تعال شف العالم كيف تستقبلني خخخخخخخخخخخخخخخخخخخخخخخخخخخخ حتى سواقنا ترا خخخخخخخخخخخخخخخخخخخخخخخ امزح وجع ..بس بجد انقهرررررررررررت ..

أدري اني مجاوبتك هناك..بس ولو عناد ابشارك هنا ووجهة نظري ماتتغير...:yh:

نجي للردود...وخر شوي...

غدق..... ياحبي لك ياشيخه والله انك صادقه والحق معاك...يجي اخوي يستقبلني بالمطار اصافحه... همن اذا رحت البيت اصافحه ثانية ويقبلني؟:(..وش ذا؟؟ خير ان شاء الله؟؟

.....

ذياب بنت.... يامحمد ... انتبه خخخخخخخخخخخخخخخ عارفتك من جنبها:yh: :yh:

...................

عبير حبيبتي على هونك يااوخيتي...وش فيها موب اخوي؟؟ عادي وش فيها؟؟ يؤ يؤ ... وراكم كذا:(.......

البقيه هذا ردي الي فوق..:(...

اقول محمد ماتلاحظ العميل قلبه بحث بيقدمه للجامعه:rr:

الضياء
16-06-2001, 05:24 PM
السلاااام عليكم
بصراحه للاسف اننا نتمسك في عادات وتقاليد..... يعني اخت العمه الخاله... إلخ
كلهم محارم والسلام عليهم يجوز ....شرعا وهو حكمنا الوحيد.....
راي شخصي انا شوف ما فيها شي.........
العادات والتقاليد حلو نتمسك فيها...... بس في الي يسوا
يمكن للرجال وجهت نظر ثانيه ......انا ما اقدر اشوفها
اقووووول استاز محمد السؤال المهم عندي من هو محرم الشله
:rr: :rr: :rr: :rr: :rr: :rr: :rr: :rr: :rr: :rr: :rr: :rr: :rr: :rr: :rr: :rr: :rr: :rr: :rr:

ريما
16-06-2001, 05:41 PM
لحظه محمد اصبر باقي رد كاتبته بس مدري وين راح له...وخر شوي لو سمحت....

حمود النكبه

بس بيني وبينك انا اذا شفت واحد في المطار يمطخ في الشابات قدام الناس .. ما يدخل مزاجي .. تطق في راسي أروح أتوطاه .. مدري ليش ..


يااخي ليه وش فيها؟؟ قلي سبب مقنع يمنع الشاب يقبل أخته؟؟ واذا قبلها عند الناس وباالمطار وش فيها؟؟؟؟؟؟؟؟

وليه تتوطاه؟؟؟ بما انك ماتحترم يااخي وجهة نظره الي هو حر فيها...بالتالي فتراه مايحترم وجهة نظرك ...وحتى هو بنفسه تلقاه يتمنى يتوطاك عشان التعقيد الي انتم عايشينه....معقدين حتى التقبيل بين الاخ واخته؟؟؟ عجيــــــــب!!!


غريبه والله غريبه..:(...

vgood
16-06-2001, 06:19 PM
سلالالالالالالالالالالام
انا بالنسبه لي راح احب راس امي وابوي وكبار السسسسن بس والباقي مصافحه
مع كلام حلوووووو واستقبااااااال حافل اما ليش فكذا احس ماله داعي الفت النظر لي خاصه ان العيون راح تبحلق بزياااااااده وهذا شي يضايقيني:)
لكن لو شفت احد قاعد يبوس اخته فعادي ما راح انقد او استنكر لانه موحرررررام
وكل واحد وطبعه:D
فري قوووووووود vgooooooooooood :sd: :sd:

العروس
16-06-2001, 06:36 PM
أممممممممم
بصراحة انا لو منكم.. أقصد واحد من الشباب بسلم على محارمي بالقبلات والمشاعر الصادقة..
لان بصراحة الناس مارح تنفعني..
والواحد يسلم من صادق الاحساس....:D وماعليه من اعين الناس

>>>>>>>>>>>>>>>>>>>>>>>>>>>>>>>>>>>:jj: :jj: :jj:

فتى العشة
16-06-2001, 08:36 PM
هههههههههه
هلا بالشين>>تراه مدحه
تسان هي الوالده امطخ راسه قدام الخلق ولا همن احد وتسان هو احدن غيره اختي او عمتي اسلم عليه وقضينا
:D :D

الجازي
17-06-2001, 01:21 AM
انا لو اني مكانهم حبيت امي طبعا راسها ويدها وكلش وخالاتي والعجز كلهم
وخواتي صافحتهم وبس
عااااااااااادي ماهو احراج

كعبور
17-06-2001, 02:21 AM
مشكور يالحبيب على السؤال ...الي بصراحه عن طريقه...

بنعرف نوعية تفكير بعض الاخوان وارائهم...

انا عن نفسي بخلي واحد من اخواني يروح يجيبهم....

والله من جد ياخوي انا امي لو ابطت عني وماشفتها....

مايكفيني احب راسها قدام البشريه...

قسم اني ابقعد احبحب فيها ربع ساعه...عشان كذا انتظرها في البيت استر لنفسي..

<<<<<دلوعة امه‍‍‍‍!!!!!!!


وبالنسبه للبقيه الي معها ...واجد عليهم يالله حيهم والحمد لله على السلامه...

تحياتي



http://mypage.ayna.com/shrshf/wgd.JPG

جوري
17-06-2001, 02:27 AM
ابو حبيب
صدقني كلامك حلو تدري ليه لانه عن الام
الام كلمه كبيييييييييييييره الام قلب وحنان وعطف وحضن دافي يضمك
وصدر لو تدور الدنيا ماتلقى زيه
شوف انا والله لو تكون امي وين راح احاول قد مااقدر اوصل لها واذا وصلت راح اسوي كل شئ هي تستحقه امي مهما فعلت لها ماراح اوفيها حقها امي تحملتني انا ومصايبي تحملت كل شئ مني حتى اشياء هي تتكرم عنها وبعد قبلتها مني كيف اتركها لما اكبر
والله لو تطلب مني اطب في نار طبيت وصدقوني انا صادقه بكلامي
لان مهما فعلت امي دايم عاليه
ربي يخليها لب وللجميع يبقى له امه

الهلال
17-06-2001, 04:08 AM
<--نال الاستقلال في عام 1971 م (الصومال ) :(


اقول اميمتي الف بوسه على راسه ...والفين على يده ..ومليون على رجله .


والباقي في البيت


تتذكر موضوع ( التخفيض والالغاء ) <---سلم لي على ماوراء الشمس

NorelshamsS
17-06-2001, 05:56 AM
احم احم
انا امطخ اخوي بالمطاااااااااااااااااااااااااار
احم احم
واعانقه بعد
اممممممممممممممم
وش فيها وربي اكون مشتاقة مرة لشوفته
ما ادري :fff:
يعني شي حلو اني اعبر عن مشاعري بدوووون تحفظ طالما اني ما اتعرض لاي احد :mm:
والله ما فيها شي
بعدين قوووووووووووولي متى بحب اخوي الله يخليك وهو جاي من الدوام ولا وهو رايح يلعب بليااااااااااااااااااااااردو:we:

محمد الحبيب
17-06-2001, 08:59 AM
بيض عيون .. هههههههههههههه اي والله من قالهم يجون بالطيارة :( .... وش فيه النقل الجماعي يعني :)

************
حمود النكبة ..اول شي وراك ماداومت امس والا راحت عليك نومه :) ..... ثاني شي هههههههه اي والله ياخي تعبت من تسكيرة الغالوقة هناك قلنا نجي نلعب نلعب بلي ستيشن .... هههههه حلوه انطل عليهم الرقم علشان تبات بالحجز :(

عاد تصدق الي خلاني افكر بالموضوع هذا .. مرة من المراريت كنت رايح استبقل الوالد الله يطول بعمره .... المهم .. الا فيه طيارة مصرية توها جاية .... ولاحظة المصريات .. خذ ياتبويس .. .عاد انت خابر تبويس المصرييين .. الله لا يبلاك بمصرية :( تشفط مهب تمطخ :^ ... قلت لنفسي ..لو انا مكان هالصعيدي الي قاعده مرته تطمخه .. وش راح اسوي ؟؟ هنا ولد السؤال :)
وصدقت حنا ماتعودنا نشوف مثل هيك مناظر .. بس بعض الناس عادي عندهم :)

تشكراتي على مداخلتك الرائعة انت وخشتك الي كنها قمر اربعطش ( وهو خاسف ) :)

******************

ريموووووه :( هو علشانك مجاوبه هناك ..وعلشاني عارف جوابك .. قلت لا تدخلين .. بس الملقوف طول عمره ملقوف .. عاد من زين وجهة هالنظر علشان تلاحقيني فيها :( ... قال ايش قال في كل المطارات استقبل اخواني ..... حشى .. الاخت شغاله عند ابوالجدايل .؟؟؟؟

بعدين قد قلت لك .. انتم ياعيال النعمة عاداتكم غير تختلف عنا حنا ياعيال الفقر :)

انا ماقلت ان تمطيخ الاخت والمحارم حرام ....:( ... انا قلت عيب .... يعني وخزيااااه بس .. وطر جيبي طراه :)

تعالي وش دخلك يوم تردين على زبايني ؟؟؟ :( مانقول الا ملقوفه :^

اجل ذياب بنت ؟؟؟ من صدقك .. والله توني ادري :( بس الاسم اسم رجل :^ ماعلينا

:) ماعليك خلي صديقي العميل يسوي الي يبي <======= متملق :)

JoReYa^__^
17-06-2001, 09:05 AM
السلام عليكم ..
لو امي او ابوي اكيد لازم التقبيل واحبهم فوق راسهم ويديهم .. ونفس الشيء بالنسبة لكبار السن ..
بالنسبة لاخواني .. اوايهم بالخشم ... الا تعرف شو معناها ؟؟؟ .. هذي عادة عندنا في التسليم .. تصك خشمك بخشم اخوك ... وهي معروفة عندنا بين الرجال او الاخوان او حتى بين البنات مع اعمامهم واخوالهم لو كانوا صغار بالسن :D...
ولو كان عندي اخ اكبر مني .. لازم احبه فوق راسه بعد ...:D

والموقف في ساعته يكون حار حار .. يعني ما اتوقع عمري اني اقولهم اصبروا لين ما نروح البيت اسلم عليكم .. والله برود بالمشاعر تصير ..:(

تحياتي
جورية :o

محمد الحبيب
17-06-2001, 09:12 AM
المستكمخه ... هلا وغلا ... حنا ماقلنا انه حرام ... كل مافي الامر ودنا نشوف ردت الافعال المختلفة من قبل شرائح مختلفة من المجتمع .. يعني مو شرط كل السعوديين عاداتهم وحده او تعايشهم واحد فيه اختلاف .. وهذا الي حنا ودنا نعرفه هو الاختلاف بين العوائل والقبائل ....................... والا شرعاً مافيها شي تقبيل الاهل ....... بس قدام الناس ينحرج بعض الناس :)

تشكراتي

**********************

ريما .. ياكثرك .... وش عليك من الرجال .. هذي وجهة نظره ليش انتي معصبه :) ... التعقيد الي حنا عايشينه .. جايز لنا وعاجبنا .... حررررره موتي قهر ... مو حاصل لكم :(

**********************

فيري قووود ... كلام منطقي وجميل وصريح ......... هذا هو الواحد اوقات يتنصل من هالموقف لانه يحس بالاحراج فقط لا اكثر :( ... مو علشانه عيب او حرام ..... مشكور اخوي على كلامك

*********************

العروس .. تحياتي ....... كلامك مثالي ... هل تعتقدين ان امتناع البعض عن تقبيل محارمه امام الناس هو بخل بالمشاعر والعواطف ؟؟؟ بالطبع لا .. ولكن فيه إعتبارات اخرى كالخجل والعادات وغيرها .. يمكن عندكم في الامارات الوضع اكثر انفتاح من هنا :) .. تشكراتي لك اختي

**********************

فتى العشة :) هلا بالشيفه هاهاهاه تراها برضه مدحه :) ............... شكلك ماقد طبيت مطار .. واعتقد انك اول ماتشوف الناس راح تختب وتتبوهر ويمكن انك ماتمطخ احد ويمكن انك تمطخ كل الحريم الي في الصالة من الربكه :) تشكراتي ماي هني

**********************

الجازي ... طيب اوكيه لو اخوك او زوجك تقدم للسلام عليك وتقبيلك ..... انتي ماراح تحسين بالاحراج ؟؟؟؟؟؟ اعتقد ان المسألة تخص الطرفين المقبل والمتقبل :( :) .. يعني ممكن انا ماكون منحرج بس الي قدامي الي هي اختي او عمتي او زوجتي تنحرج :(

محمد الحبيب
17-06-2001, 09:31 AM
كعبور.... ههههههههه اجل انت القعده شكلك :) ياحظك ...... شف ... اشين شي ان والواحد يطلع بالنص لاهب الكبير ولا هب الصغير ... يضيع بالطوشه :(

<======= معطينه اهله الخامس :(

هههههههههههه اجل يالله حيهم وتكفي :) ..... اشوى اني مانب زوجتك :(

تشكراتي :)

*******************

جوري :( .... ماش من صرتي مشرفه وانتي لك عليها :& ... .الحين انتي حرمه وامك حرمه .. يعني عادي انكم تحبون بعض قدام الخلايق .:( ..... السؤال لو الي جاء يستقبلك اخوك او زوجك وش تبين تسووووين :)

تشكراتي اختي :)

*******************

الهلال ... حلوة اللبن تستاهل والله تستاهل ...........

بعدين ياخوي انت صاير رسمي من تالي وتحسب كلماتك كل ذا خوف ان لسانك يزل ( ليش هو قهوه هاهاه ) .. عادي قل انك تبي تقبل محاركم في المطار وقدام الناس .. مافيها سجن هالمرة :)

تشكراتي لك اخوي

**********************
نور الشمس .... يقرب لك ماوراء الشمس الي يتكلم عنها الهلال ؟؟؟ :) .................. ههههه .. عادي عانقية وامطخيه مافيها شي ... من حقك والله :) ..... بس ترى ان جاء من العمل وقالك سوي شاهي .. مهب تنافخين عليه وتهجيه :( ... ادري عندكم شغالة :)

تشكراتي :)

************************

محمد الحبيب .. هلا غلا تشكراتي .. وشكراً إنك رديت عني :( <==== لذعت فيزاته من كثر الكتابة

************************
جورية هلا وغلا ............... اي قد شفتكم مرة بالتلفزيون تتناقرون بالخشوم .... حتى عندنا بعد ... حبة الخشوم معروفه ونسويها غالباً :) ..... بس حركة انكم تحبو راس اخوانكم الكبار هذي حلووووووه والله :) ...... ( ياليت يسمعونك اخواني الصغار ) :(

تشكراتي لك اختي

vgood
17-06-2001, 02:20 PM
سلام من جديد:)
انا عارفه اخوي محمد بتقول ياكثرك هماك رديت وش جابك ثانيه :(
بس اصلي قلت راي ووش راح اسوي لو جاء اخوي من السفر
وهالحين ابقولك وش بيسوي اخوي فيني لو تهورت وحبيته بالمطار:confused:
اول شي من المفاجاه ما راح يقدر يتصرف:eek: بعدين بيكشر وبيصير وجهه احمر من ضيقه الصدر:g: واول ما نركب السياره بتنقلب السواليف الزينه الى تهزيء فيني :we: واتخيله يقولي هالحين وش حركات التميلح الي سويتيه:rr:
عاد سبحان الله ربي يخلق ويفرق هذا تصرف بعض اخواني اما واحد فيهم فاتخيل انه بيسكت ما راح يقول شي لا زين ولا شين:jj:

فري قوووووووووود vgoooooooooooooooood

حمود النكبه
17-06-2001, 03:06 PM
أمممممممممممممممممممممممممممممممممممطاخ ... <-- هذي مني لأبوحبيب..:D
ريما .. كيف الحال ..:).. يا وخيتي ابو حبيب يبي رأينا بصراحه و كل واحد حر برايه .. بعدين من جد أنا أنقد على الواحد اللي يقبل محارمه الشابات قدام الناس ..:).. مجرد رأي فقط .. :)

بعدين انا ما قلت هالكلام الا بعد ما تعرضت لموقف ما لأمه داعي .. كنت رايح أستقبل الوالدة وأختي في المطار .. وانا أشوفها جاية من بعيد و أختي وراها .. المهم غابوا عن نظري .. وانا قربت لم الباب علشان يعرفونن .. ويوم جو طالعين الا وانا أستلم راس الوالده .. وكنت ناوي أسلم على الحرمة اللي وراها على انها اختي طبعا مصافحه.. المهم أشوفها ما عطتني وجه خطمت من جنبي ولا عبرتني .. فلو الدعوى فيها مسكت راس وتبويس كان جبت العيد ..:) .. المهم أختي كانت واقفة عند العفش .. والوالدة جاية تقول لي أروح أساعدها ..:D

vgood
17-06-2001, 03:54 PM
:( :( شف اخوي محمد تبي تقول لا عاد تعتبينه انا عارفه بس الموضوع جايزلي وش اسوي:confused:
-------تراي احب سواليف المطاااارات والمواقف الي تصييييير :D
وعلى طاري الموقف الي صار لحمود:D :D ابقولكم موقف صارلي:)
مره كنا بالمطار وقالولي اخواني اجلسي بالكررررراسي ليما نزين الاوراق:ff:
المهم جلست وكنت طبعا متغطيه وشكلي يشبه معظم الحريم(ما يبيله اجل يشبه الرجال) المهم وانا جالسه في امان الله الا الرجال الي يناظرني ويئشر لي قومي وتعالي:confused: قلت بنفسي اكيد غلطانه ويئشر للي وراي:jj: الا ويقرب شوي ويناظرني:mad: ويئشرلي بعصبيه اكثر :jj: عاد انا قلت هاه وش ذا والتفت وراي ويمين ويسار ابشوف من فيه:ff: وما وعيت بعدها الا واللرجال مقلع ناحيتي:g: ويوم صار تقريبا قدامي خلاص:xx: هات يتهزئ :we: وجــــع :we: انت
عميا ما تشوفيني ســــاعه قاعد ااشر قومي يله:xx: :xx: :xx: واقوم استجمع شجاعتي وارد عليه من وسط بطني قبل لا يجووووون اخواني ووش يفكنا:we:
واقوله عففففوا تتتراااك غغغلطااان :rr: وهويوم سمع صوتي وجهه صاار اصفر:rr: وهــــج من الفشيله.........

فري قوووووووود vgoooooood :sd:

الهلال
18-06-2001, 12:12 AM
على طاري الاخوان الصغار يحبون روس الكبار

<--- ذا ماكلها اصغر واحد ...ومظلوم ...بس ولو دلوعة ماما ... :D

بدون عروه
18-06-2001, 12:32 AM
...
ومن قال لك إني بروح أجيبهم أصلاً ..



:):):)

booo
18-06-2001, 12:35 AM
والله انى ابي اسلم على ميمتي وااخواتي ولا سألت في احد وانا مسلم على احد غريب مسلم على محارمي الله يحفظهم لي



:rolleyes:

ريما
18-06-2001, 01:24 AM
محمد البيــب:g: عناد منيب قايله الحبيب:mad:

شوف وليه تختلف عاداتنا؟:(..ياربيه..

>>>>>>>بتصيح

عايشه بالمريخ أنا؟؟ وبعدين وجهة نظري وتهبل كلها ملح... واحنا نعتز فيها لاننا ماسوينا شيء غلط :g: ولاهو عيب ولايحزنون ....الا أنتم مكبرين السالفه على غير سنع يمه منكم :rr:

وأنا كذا لازم أرد على الكــل لان اسمي بالعنوان خخخخخخخخخخخ عاد من قالك تحط اسمي انا معروف عني الي يحط اسمي بالعنوان بغض النظر عن مضمون الموضوع ابربس بموضوعه كنه لي :yh: :yh: :yh:


هلا حموووود انا معاك صحيح كل واحد حر برأيه والك هالشيء طبعا ..لكن أنا بودي أعرف ليه يعني وش فيها ؟؟ اذا ماهو حرام ولا شيء ليه نتمسك بها العادات والتقاليد؟؟ ومو شرط موقفك الي حصل لك يكون مع الكل ... طول عمري اتشحطط بمطارات والحمد لله ماقد صار لي شيء :we: >>الله يستر...

بس عاد ولو ترى بالمطار العالم ترا شويين عادة... مو كثيرين للدرجه الي تخليك تخبص...


>>>>>>>>>>>>>برايفت لمحمد..لاتقول لنا مطار بروحنا ترا ابنتحر:g: ماعاد باقي الا هي ...


محمد...:ff: :ff:

فري قوووووود خخخخخخخخخخخخخخخخخخخخخخخخخخ قسم رايقه خخخخخخخخخخخخخخخخخخخخخخخخ وسعتي صدري الله يعطيك العافيه ياربي..تسلمين....

الحاشي777
18-06-2001, 01:32 AM
والله امي اعطيه واحد مطخه على جبهتا ....والحب يدها ولو فيه فرصه رجولها
اما اخواتي اسلم عليهم يد بيد..:)
واذا وصلنا البيت سلمت عليهم مثل سلام خلق الله :)
واذا احد سالني ليش سلمت على خواتك في المطار كذا
اقول له :
عاداتنا تقول كذا
:)

محمد الحبيب
18-06-2001, 08:57 AM
اصطبحنا واصطبح الملك لله ........................... ياواد يابليه .. رش المية أم المحل :(

لحظة ابمسح
<==== لقبي الجديد :) ... صديقي الهلال .. عطني الخرقة الحمراء حقتك ابلمع لقبي :)

فيري قووود .... ههههههههههههههه سبحان الله يعني الرجال هو الي استحى والا انتم يالحريم وجيهكم مغسولة بمرق :( ... ههههههههه يمكن انه متفشل منك ... ترى اقول يمكن ... بريل الله .. يعني ماحط بذمتي شي .. بس احتمال وارد :)

***************

حمووود النكبه :( أمممممممممممممممممممممممممممممممممممطاخ ... <-- هذي مني لأبوحبيب..
:g: <==== وهو يمسح خده بذراعه قال ... شكلك ياحممودوه فيك عرق مصري :(
ههههههههههههه عادي قسم انها قد مرت علي مثل هالمواقف .... بس طبعا مو بالمطار .... صرت عقبها ... قبل ماطلع .. اوقف اهلي قدامي وادقق بنعالهم ( الله يكرمكم ) وشناطهم .. همن انطلق بحفظ الله ورعايته :)

اي عليك بريموووه .. تبي تمشي رايها علينا .. :) ( شرير ناوي يشبها بينهم ) :)

*****************

اي والله ياكثرك :( الي يشوفك انتي وسواليفك يقولون جالسين في مجلس ابوحمدان :)

على طاري هالمواقف ... قبل كم اسبوع سمعت سالفة جازت لي بالرادو <== شايب للحين متعود يسمع الرواد عقب صلاة الفجر :(

المهم يقول السولفجي ......... اننا في يوم عيد وبعد ماطلعت من المصلى .. وانا رايح للسيارة قابلت واحد من الربع واقف عند سيارته .. سلمت عليه وعايته وقلت له وش الي موقفك من تنتظر ؟؟؟ قال انتظر امي .. مابعد طلعت للحين :(

يقول ودعته وكملتي مشي لسيارتي وقبل ماصل السيارة الا هذاك واحد ثاني من جيراني .... واقف عند سيارته بعد .. سلمت عليه وعايته وقلت له وش تنتظر انت بعد ... قال ياخي .. مانتظر احد اصلا مامعي احد ..... بس يوم جيت اركب السيارة الا والقى حرمه فيها :( ..... وكل ماقربت يمها ابي اسألها من انتي قعدت تهاوش وتزاعق علي ... وهذاني واقف انتظر فرج الله ............ ههههه عاد قلت له شف هذي ام هذاك الي واقف هناك :( ياحليلها العجوز شينه وقوية عينه :)

هههههههههههههه <=== هذي على سالفتك ... بس انا تخيلت ان الرجل الي جاء وهاوشك ..... تخيلته يعصب ويزاعق عليك .. هم يقول .. انتي طالق .. طالق .. طالق :( ......... بهالحالة .. تطلقين انتي والا زوجته الصدقيه ؟؟؟ ( نحيل هذا السؤال لزاد المسلم )

********************

الهلال .. ههههههههههههه اذا هي على حبة الراس فهي هينه :(

<===== متعقد من قولة .. ياوليدي غاديك توطي رجليي :( ... لاقيني الشياب :rr:
*********************

بياله بدون عروة .... لاتقول تبي ترسل السواق .. خابركم ماعندكم سواق :( ....... :)

**********************

بووووووووو .... الله يحفظهن لك ........... صف بجنب ريما لو سمحت :)


تشكراتي للجميع

محمد الحبيب
18-06-2001, 09:06 AM
ريما :( استعنا على الشقى بالله

اسمعي ياوخيتي ........ لا تصيحين ولا شي ...... الموضوع بسيط جداً ... انا والعياذ بالله من كلمة نحن ...................... لو صرت بنفس الموقف .. راح انصى مكتب الاستعلامات واخليهم يصوتون على امي وخواتي وعماتي الرجاء مراجعة الاستعلامات .......... همن اسلم عليهن هناك لحالنا ماعندنا احد غير حق الاستعلامات :(

بس مو كني فضحت باسماء اهلي عند الناس ؟؟؟ :( <==== مازل يعاني من الغباء المباغت

ههههههههه حلوه اتشحطط بالمطارات :( ... شكلك على كذا يا شغالة أو اميره ... اختاري ايهن :)

الطيران الخاص والصالات المكلية ماحطوها الا لكم .. قه قه قه قه ق.. مهب مثلنا ... حتى الدولية محرمه علينا .. الصالات الاجنبية وتخب علينا :( مالت علي

تشكراتي :)

**********************

الحاشي .... واحد مطخه .؟؟؟؟ لا سديق ممكن انتا يعطي اثنين مطخه .. والا اقولك لك إلى ثلاثة مطخه :) تشكراتي ماي هاشي <=== نعنبو الانقليزي


تشكراتي للجميع

غدق
18-06-2001, 03:34 PM
سلااااااااااااام
يامحمد...ترااك مهوول الموضوع ومعطيه اكبر من حجمه....واللي شفته من ردود الاخوان عليك ما قد خطر على بالي ان فيه اشخاص يتحرجون من السلام على محارمهم...وفي النهايه هي حريه شخصيه طالما انها لا تخدش الحياء العام....وسلامتك.
تحيااتي

محمد الحبيب
19-06-2001, 08:47 AM
غدق صباح الخير وياهلا

ادري اني ضخمت الموضوع .. وهذا لان الموضوع موضوع كركتيري ساخر يعني لازم نكبر الصغار علشان تتضح الصورة ...............

شي ثاني انتي تقولين ((( واللي شفته من ردود الاخوان عليك ما قد خطر على بالي ان فيه اشخاص يتحرجون من السلام على محارمهم )))) وهذا بحد ذاته فائدة لانك الحين مو خطر على بالك بس .. بل عرفتي وشفتي وقريتي ... يعني فوائد كثير من حركة صغيره :)

الشي الثالث .. انا ماراح اتخذ قرار او حكم مبني على هالردود ...... كل مافي الامر نبي نتعرف على انواع من العقول الاخرى ووجهات النظر ....

وبالنهاية تقبيل المحارم امام الناس ليس بالحرام ............ ولكنه قد يكون عيب عند البعض .. قد يكون محرج عند البعض .................... نبي نعرف ليش عيب ... وليش مخجل .. هذا كل مافي الامر :)

تشكراتي لك اختي الفاضلة :)