PDA

View Full Version : لابو البزران عشان خاطر محمد



الجازي
19-06-2001, 06:23 PM
اول شي تراني متكلفه قــــوه عاد اقروها ولا تراني بعتزل فن كتابه القصه
<------مهيب سهله ابد
بقصلكم قصه بس ولموا كرتون المناديل جنبكم لزوم الصيحه
<--------الدموع اربع اربع
بسم الله
أبد والله في يوم من الأيام كنت قاعده في غرفتي وداقتها هواجيس زوجت بنات عمي كلهم وماخليت احد ماسنعته
<----خيالها واسع زياده
وانا غرقانه في هواجيسي رن التلفون
تررررررن ترررررررررررن (اجحدوها حتى صوت التلفون ناقلته لكم):)
وأنقز كني مقروصه عشان أرد
--------------------------------------
هي..ألو السلام عليكم
انا..هلا وعليكم السلام مين معي

هي..انا مها
وأقعد أتذكر مها مها ممممممممممممممم ابتدائي متوسط ثنوي مااتذكر اني تعرفت على وحده اسمها مها ماعندنا الا مها بنت اخوي وتوها عمرها سنه ونص ماضنيت انها هي الي تكلم (ولا بعد خخخخخخخخخخخخ)
انا..مين مها

هي بعصبيه .. مها وبس
انا..طيب طيب لاتدفين وش تبغين
<--------تنكت من زين وجهها

هي..أخ انا تعبانه :(
انا والعبره خانقتني..وشفيك سلامتك

هي..انا تعبانه وابغى استشيرك ممكن
انا..تفضلي انا سامعتك

هي..صارلي 8 سنوات متزوجه:) ماخذه محمد ولد جيرانا ماانسى ذيك الايام ابد ههههههههههه مرت علينا مواقف كثيره بس كان يموت علي
اذكر زين يوم يصخن سواقنا ويخلون محمد يودينا للمدرسه يوووووووووووووه كان قاعد يطالعني في المرايه طول الطريق مع اني حتى فتحت نقابي مغطيتها :) تصدقين خفنا نصدم وقتها ههههههههههه ياحبنيله:).
انا..طيب وين المشكله
<------------جلفه شوي

هي بعصبيه..اسمعيني ولا تقاطعيني
انا بعد ماكلت هوى..طيب

هي..من يوم ماتزوجنا وحنا نحلم بأولادنا ممممممممممممم الأول بنسميه على اسم ابوه أبراهيم والثاني على اسم ابوي طبعا والبنت ترجيته مايسميها على اسم امه حرام بنت ويطلع اسمها قديم زي كذا يووووه ياله وافق.
المهم نحلم ونحلم وكله حلم عدا على زواجنا ست سنوات ولا جا لا أبراهيم ولا غيره , كان رافض رفض تام أننا نكشف ويقول نصبر وربي بيرزقنا وفي الاخير طفح الكيل واشتقنا لاولادنا الي نحلم بهم دايم .
عندها قرر أبو براهيم نسافر أمريكا في الصيف نتمشى ونكشف على الطريق.
وجا الصيف ورحنا لأمريكا كانت اول مره اسافر فيها برى المملكه انبهرت مرررررره بالي شفته :).
وبعد يومين من وصولنا رحنا للمستشفى عشان نكشف
تصدقين ذيك الليله ماقدرنا ننام من القلق والتفكير :) انا بالنسبه لي كنت متفائله بس كنت قلقانه من شي واحد الي هو الكشف قلت لمحمد يووه والله اني مستحيه خل نهون تكفى :) يضحك علي ويقول خليكي راجل ومتتكسفيش:).
وجا الصباح ورحنا وسوينا التحاليل والكشوفات الازمه وقالوا لنا تعالوا العصر خوذوا النتيجه.
محمد قلقان مره ومتوتر وباين عليه هذا الشي بوضوح لانه كان ياكل اضافره ويقشر شفايفه :) هذي عادته اذا شال هم شي.
ساعات عصيبه مرت علينا قضينا اغلبها وحنا ساكتين وكان محمد بين فتره وفتره يرمي تعليق يتتريق فيه على اشكالنا وحنا نهوجس :).
وجا العصر ودخلنا على الدكتور دكتور عربي مسلم بجنسيه امريكيه وفرح جدا يوم درى اننا عرب :).
نادى الدكتور الممرضه وتكلم معها شوي وحنا ننتضر على احر من جمر وطلع لنا نتايجنا.
ذيك اللحظه جتني الضحكه ليش مدري قولي عني خبله قولي اي شي قعدت اضحك حتى ان محمد طالعني وهو ناقد علي.
كنت متفائله جدا بالنتايج واقول انشاء الله خير وسع صدرك
طالعني الدكتور وقال انتي سليمه ميه الميه
والتفت على محمد وقاله معليش اتكلم قدامها؟؟
قال محمد ايه عادي هذي زوجتي وكمل محمد كلامه بقلق ليش يادكتور فيه شيء خطير.
رد الدكتور وقال بصراحه يا أخ محمد يؤسفني اقولك ان عندك مشكله خلقيه هي الي سببت عدم القدره على الانجاب
محمد سكت ولا تكلم ولا كلمه اما انا فقدت صبري وقلت طيب والحل؟.
التفت علي الدكتور وقال هذي حاله معروفه عندنا وحتى الان مالها علاج جربنا كثير نحلها بجراحه تجميليله بس كانت النتايج فاشله ميه بالميه . على كل حال انتم مسلمين اصبروا واحتسبوا وهذا الي كتبه لكم ربي ويمكن يجي يوم ونلقى علاج لهذي الحاله....
ياه ياربيه وش يقول هذا :( مو معقول مقدر استحمل موب صاير عندنا اولاد مافيه امل:(
ذكرت لحظتها ان الصبر عند المصيبه ليس له جزاء الا الجنه وهذي مصيبه لا هذي مصيبه المصايب
وقعدت اردد واقول بصوت عالي انا لله وانا اليه راجعون عدتها كثيـــــر من غير شعور لحظتها ماسكتني الا الم حسيته في قلبي الم قوي مــــره أهــ.
أمتلت عيوني دموع وحطيت عيني في الارض ماقدرت أطالع محمد خفت خفت خفت عليه مره هذا محمد رجلي وابوي وامي واخوي وكل دنيتي
هذا محمد الغالي يارب تصبره علي المصيبه يارب يارب يارب :( يارب تكرهنا في الاولاد وتشيل هذا الحلم من روسنا عشان نكمل حياتنا مبسوطين يارب تنسينا كل لحظه تخيلنا فيها ابراهيم ولدنا يــــــــــــارب
وكمل الدكتور كلامه ..اذا حاسين ان الموقف صعب عليكم تقدرون تستعينون بطبيب نفسي يساعدكم على تجاوز الازمه وبعدين تقدرون تتبنون طفل من اي ملجأ ويصير كانه ولدكم.
بصراحه هذا الي سمعته من كلام الدكتور لاني وقتها دخلت في دوامه من السكون صرت اسمع اصوات الناس بعيــــده ومااسمع بوضوح الا صوت نفسي
كنت اتنفس بسرعه كبيـــــــــــــــره
حسيت بيد محمد تمسك يدي وسمعت صوته المتقطع بسبب تنفسه السريع وهو يطلب مني نروح للبيت
مشيت وراه ماادري وين حنا ولا مين حوالينا :( امشي وراه وبس
أنا ابغى اولاد فعلا ابغى اولاد لكن محمد اهم واغلا عندي من كل شي
ابنسى ابراهيم وبنسى كل احلامي بس محمد مايضيق صدره :(
تدرين قد ايش احبه.
ركبنا السياره الين ذي اللحظه ماحطيت عيني عليه كان ساكت بس اسمع صوت تنفسه سريع مره وموب منتظم كنت احس انه يحاول يهدي نفسه بس مهوب قادر.
التفت على الشارع يوووووووه الشوارع مليانه بزران مليانه مررررره.
تدرين ذيك اللحظه وش تذكرت :) تذكرت مره انا ومحمد كنا طالعين نتمشى في الرياض ومرينا على مدرسه أهليه ساعتها قالي محمد .. مها شوفي هذي المدرسه يمدحونها مره أن شاء الله مايدرسون عيالنا الا فيها .
:( بس وين عيالنا وينهم ابيهم واحبهم احبهم مره :(
محمد يبكي هذا صوته اسمعه زين
قاعد جنبي في السياره الصوت قريب مره
روعني صوت بكيته مالتفت اطالعه خفت احرجه بس كنت اسمع صوت بكيته وهو يحاول يكتمها وتطلع غصب عنه.
تصدقين كل هذا وانا مابكيت بس كنت احس شي واقف في حلقي وخانقني ودي يطلع وافتك منه.
وصلنا الشقه ودخلنا..أسرع محمد للغرفه وصوت بكاه يرتفع اكثر واكثر ناديته مارد علي ودخل وقفل الباب على نفسه.
جيت وجلست عند باب الغرفه تراكيت عليه وقعدت اسمع صوت محمد كان قاعد يبكي ويقرا قران :( يقرا سورة طــه
طــه & ما أنزلنا عليك القران لتشقى & إلا تذكرة لمن يخشى & تنزيلا ممن خلق الأرض والسماوات العلى & الرحمن على العرش استوى..
قعدت اسمه ساعتها نزلت دموعي حاره على خدي
تعرفين صوت محمد في قراة القران روعه خيالي
أول يوم في زواجنا يوم رحنا للفندق جلسنا مع بعض وانا بفستاني الابيض وهو بثوبه وغترته وعقاله وبشته شايله على يده .
كنت انا مستحيه مرررره قالي لحظتها وبصوت واطي مها عيوني خل نبدا حياتنا بسورة يــــس
لأن يــــس لما قرات له وجاب مصحف وطلب مني ادعي في سري الي ابغاه بس نبهني وهو يضحك .. هاه عاد انتبهي لاتدعين علي :)
ثم قراها علي ترتيله رائع:).
المهم .. بعد حوالي ساعتين هدأ صوت بكاه وصار يرتل القران بصوت قوي وواضح وخلص الصوره الي يقراها وفتح الباب
وقفت انا بسرعه ودخلت ودي لحظتها اضمه اضمه قوه وحققت امنيتي ضميته بكل قوتي الي عطاني اياها ربي قلت الحمد لله على كل حال
قال..اخ يا مها خلاص لا أبراهيم ولا غيره أنا انتهيت
فجاه سكت هدأ تماما ممممم أدري هو الحين قاعد يفكر اعرفه زين يفكر طيب وش يفكر فيه؟
وبحركه قويه بعدني عنه لدرجه اني طحت في الارض
بصراحه من الروعه ماحكيت
طالعني بنظرات قويه وقال مها العله فيني انا يعني انتي سليمه ميه بالميه زي ماقال الدكتور يعني تقدرين تتزوجين واحد غيري وتجيبين اولاد وبنات وتعيشين حياه طبيعيه زي اي وحده
وانتي توك صغيره والف واحد يتمناك
مها أنتي طالق:(
صرخت وصرخت غبـــــي وش هذا الكلام أنا زوجتك وحبيبتك
قال أذا طلقتك راح تكونين حره
قعدت ابكي وابكي وابكي ترجيته مايطلقني
تكفى الله يعافيك أرجوك عشان خاطري
قلت كل الكلمات سويت كل شي وفي الاخير حبيت يده وقلت اذا تبغاني احب رجلك احبها بس لاتطلقني محمد حرام عليك احبك اموت فيك ومقدر اعيش من غيرك.
تعبت من ترجيه وسكتنا كلنا كنت جالسه على الارض وهو جالس جنبي وحاط راسه بين يدينه .
نمت وانا على هذي الحاله ودموعي على خدي وصحيت الفجر قمت وقومت محمد يصلي ورحت سويت شاهي وحطيته في الصاله ورحت أنادي محمد كان توه مسلم من الصلاه وقاعد علي السجاده ورافع يدينه يدعي ربي يوم خلص ناديته طلبت منه نتفاهم بهدوء وعلى روقان وبدون دموع .
جلسنا في الصاله بدي هو الكلام
..مها فكري زين اذا كبرتي وعجزتي مين بيشيلك مين بيهتم بك شوفي امك مين موسع صدرها غير احفادها ومين مهتم بها غير عيالها
هذا بالاضافه ان الامومه غريزه وانتي حنونه بعد بزياده واكيد تبغين اولاد ماابغى احرمك من هذي المتعه الامومه.
..مها ماأرضالك تكونين حرمه وحيده بائسه حاسه باي نقص في المستقبل.
أنا رديت بجمله وحده كنت مجهزتها من يوم بدى يتكلم بقولها قلتها بصوت عالي قلتها وانا واقفه من الحماس
..محمد قسم بالله العظيم لو تطلقني ان مااخذ غيرك وان اعيش حياتي كلها مطلقه لا زوج ولا اولاد
وعيال ماابي وقسم بالله ماابي:(
وان كبرنا ربي بيساعدنا والحمد لله ربي منعم علينا ونقدر نجيب مية واحد يهتمون بنا .
:)ادري كلام غبي مره بس هذا الي طلع مني.
..مها لاتتسرعين الموضوع مافيه مجامله
..محمد خلاص أرجوك انتهى الكلام وهذا اخر ماعندي
ورحت وتركته
عدى اليوم على خير وشال محمد فكرة الطلاق من راسه وقررنا نكمل تمشيتنا ونسوي شهر عسل جديد
رجعنا للسعوديه بعد شهر عسل كئيب كئيب جدا لابعد درجه:( كان كل طفل نشوفه يذكرنا بمصيبتنا :(
كان وضع محمد سيء للغايه أغلب وقته مسرح وضايق صدره ولا يتنهد ويهوجس
كنت اقول فتره وتعدي وينسى انشاء الله.
ومر الشهر والشهرين والثلاثه والسنه ومحمد من سيء الى اسوء
وصل لمرحله ماينسكت عليها
كان مايقدر يطالع في وجهي دايم يصد عني يبدو انه اذا شافني يتذكر مصيبته ويانبه ضميره بسببي
وصارت دمعته عند الباب ابسط شي يبكيه كانه طفل صغير
تصدقين لو تجي في بيت اهلي عزيمه واعيي اروح عشانه في البيت
اقسم لك بالله يقعد يبكي ويترجاني اروح
مشكله مشكله
قطع علاقاته بكل اصحابه الي كانوا في يوم من الايام اغلا من عيونه ومذيني من كثر مايروح لهم.
حتى الدوام ماعاد يدوام ابدا حتى انفصل في الاخير:(
وشقولك بس تردت حالته تردت مره
صار انسان ضعيف :( ضعيف جدا
ماعاد اقدر اكلمه ابسط شي يجرحه وابسط مزحه تطلعه من البيت
عجزت فيه سويت كل الطرق والوسائل عشان ارجعه طبيعي ارجع محمد القوي المعتز بنفسه الي كنت اعرفه اول
والحين وصلنا للي وصلنا له
صارله اكثر من شهر ينام في الصاله حتى غرفه النوم مايدخلها واذا دخلها يتوتر ويعصب
اصيب ببرود من كل النواحي
انا تعبت مره ماابغى اولاد لكن ابغى احد اتكلم معه ابغى زوج احبه ويحبني زوج طبيعي موب واحد بائس ضعيف الشخصيه
خلاص معد اقدر استحمل :(
وش اسوي وش اسوي اختي دليني ترى طفح الكيل:(
انا بعد مابكيت الين قلت ربي الله..اطلبي الطلاق منه وش الله حادك تعيشين مع واحد زي كذا
هي..فكرت وفكرت مليون مره اخليه يطلقني لكن في اخر لحظه اتردد
اتردد اذا شفته ضعيف وكلمه مثل هذي لواحد بهذ الضعف بتحسسه ان الدنيا انتهت ويمكن يموت
وبعدين ماقدرت اتحمل فكرت اني خلاص ماحقدر اشوفه ثانيه واصير اتغطى عنه
ماقدرت استحمل هذي الفكره
ياليتيه يرجع طبيعي محمد الي اعرفه اول :( يــــــــاليت
فكري معي ابغى حل ساعديني الله يخليك
--------------
بصراحه انا فكرت كثير كثير حتى تعبت مره اقول تتطلق منه وماعليها منه
ومره اقول حرام مسكين هو بعد ويحتاج احد معه
فكـــــــــــــــــــرت كثير واحترت اكثر
ووصلت لحل واحد بس
الي هو اسكر السماعه واقفل الخط
قمت بهدوء كبير وبحركه بطيئه نزلت السماعه وقفلت الخط:(
-----------------
وشرايكم كان تصرفي صحيح ولا لا؟؟
الجازي السابع من تموز اب اغسطس الماضي( سنة الجرب)
هههههههههههههههههههههه
<--------تخصص نكد جامعه اكسفورد

vgood
19-06-2001, 07:05 PM
:yy: :yy: :yy: :yy: :yy:
اصبري بعد فيني صيحه

:yy: :yy: :yy:
الله يهديك قضيتي مناديلنا:D :D

اش اش اش يالجازي منتب سهله خطيرررره مرررره
مشاء الله خيال وااسع وتاليف وسيناريو واخراج
-------من هو نجيييب محفوووظ عندك

عادشوفي انا رايي انك المفروض قلتي لها تجرب تتبنى طفل يمكن تزين حالهم ومنها يكسبون اجر ....عاد يمكن رايي صح يمكن غلط:confused:

تسلمين يارب ونبي القصه الثانيه الله لا يهينك كومدي:)
--------ما تبي تقضي كرتون مناديل ثاني:p
:sd: :sd: vgooooood :sd: :sd:

الحاشي777
19-06-2001, 07:38 PM
واااااااااااااااااااااااااااااااااااااااااااع
واااااااااااااااااااااااااع
:yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy: :yy:
من البارحه ونا مانمت
ياويل قلبي
<==== حساس مررررره
=========
واله تبين الصدق انت وش بيدك تسوين لهم
الحل في يد محمد
بس مدري وش فينا هالامور رغم اهميتها نتهرب من علاجها
ولا ياما في ازواج يعانون من نفس المشكله ورافضين العلاج....
اجل كيف بتنل المشكله وانا ماتعالجت؟؟؟؟؟؟
===
الجازي
زين ماسويتي
++

اللين
19-06-2001, 08:06 PM
الأخت الجازي
معاك سلف مناديل :)
مليت من الصياح وانا ياكافي دمعتي قريبة
جننتونا في الساخر كلها قصص حزينة !!!!!!
الواحد يدخل النت علشان ينبسط ويوسع الصدر يطلع وهو يقول لا ابوكم ولاابو النت :) !!!!!!!!
وبعدين وللمرة الثانية أسمع وفي الساخر فقط
أن الصبر عند المصيبة يدخل الجنة ..
ياليت تعطونا الحديث ...
اللى أعرفة أن من أخذ الله حبيبتية ( عيونة ) فصبر كان له جزاءا الجنة
شكرا لك ياجازي والله يجزيك جبتي الهم لنا :)

Naif
19-06-2001, 10:22 PM
الاخت الجازي
بصراحه حلوه جدا خيال واسلوب في الطرح ممتاز تملكين ذهن القاري بكل ملاكاته بس لي تعليق بسيط الظاهر ان دمك خفيف ومع شده المصيبه اللي في القصه اجد فيها روح المرح .
اتمني لك التوفيق بس ياليت تكتبين شي ساخر جدا صدقيني بتكوني افضل كثير مو معني كلامي ان هذا سي لا والله بالعكس حلو جدا بس الاجمل هذاك حاولي يمكن اكون علي غلط ويمكن صح التجربه حلوه .
اشكرك علي القصه هذي اللي استمتعت فيها .
لك تحياتي
نايف

Qween Of Heart
19-06-2001, 10:38 PM
الجازي ......
بصراحه قصه مؤثره ومحزنه :( واثرت فيني بالحيل لدرجه وانا ارد عليك قاعده امسح دموعي ..:(... وصدقيني في عالم وايد يعانون من هل مسئلة....
بس انا اقولك الحل عندي وانا ام هندي ..........سمعيني زين جارتنا كانت كذا او يعني الحاله مشابه لها سبحان الله لمن راحت تزور دار الايتام وقع نظرهم على طفله يا زينها من حلاااااا ;) وعشااااااااااان حسن النيه وطلب الاجر قامت اخت زوجها ورضعهتا وهم بعد اختها رضعهتا يعني صاروو هي وزجها الخاله وهو العم لها وعشاااااااااااااان ربي يجزي كل محسن على حسن معامله وتربيه هطفله التربيه الجيدة ...... يوم من الايام حست جارتنا بآلم وزارت الطبيب ويا سبحااااااااااان الخالق بشرها الطبيب إنها حاااااااااااامل :) فا اقولك هي ما يئست مثل محمد :( والامل بالله كبيروالإنساااااان ماينقصه غير الدعاااااء الله :D

ابو زيد الهلالي
19-06-2001, 10:57 PM
قهن قهن قهن قهن قهن قهن قهن قهن قهن قهن
الله يوسع صدرك بالعافيه,, مدري الواحد يضحك ولا يصيح من القهر,, وصل بنا الحال لطلب النصيحة عن طريق التلفون يعني ارفع السماعة وفضفض اقصد فصفص عن همومك ,, يا تصيب يا تخيب.
هذا ناتاج الكبت , طول عمرنا نكبت ونكبت لين تكبت علينا قهن قهن قهن قهن
((طبعا انا ما اخص المقل )) لكن عموما الشي هذا منتشر .
الحل السليم للمشكلة هذي بكل بساطة مرشد نفسي وش فيه المرشد النفسي على الاقل تلاقي عندة خبرة في المواضيع الحياتية.
طبعا الارشاد النفسي امر غاية في الاهمية اي انسان يحتاجة , في كثير من الدول الارشاد النفسي مجاني لكونة عامل مهم في البيت , المصنع و المدرسة.

الجازي
20-06-2001, 01:11 AM
......vgood
هههههههههههههههههههه
الله يسلمك ويعافيك انتي شفتي انا اصلا مبدعه بس ابي من ينفشني
<---------------------ماخذه مقلب
:)ان شاء الله المره الجايه كوميدي
<--------------------استلجت
---------------------------------------
......الحاشي777
:)عسى ماتغلقت بس
فعلا هذي مشكله موجوده ووبالرغم من كذا ماتناقش ابدا
الله يعطيك العافيه اخوي

الجازي
20-06-2001, 01:25 AM
......اللين
ههههههههههههههههه
اجل تغلقت
لا الصبر عند المصيبه ليس له جزاء الا الجنه
وبدوله الحديث وبجيبه لك بكره انشاء الله
وبعدين احيانا الانسان يحتاج يبكي
<-------نكد مركز
-----------------------------
......Naif
الله يسلمك ويعافيك انشاء الله بجرب اكتب ساخر
:)
<-------صدقت قوه

الجازي
20-06-2001, 01:31 AM
......Qween Of Heart
:)فعلا المفروض فكروا يبتبنون طفل
بس المشكله فيه مجتمعات ترفض هذا الشي رفض بات
ولاتتقبله نهائيا
بعدين حتى لو تبنوا هذا موب حل لمشكله محمد
لان محمد اكبر مشكلته انه تحطم وحس انه ضعيف وتبني طفل يمكن مايرجع له قوته وثقته في نفسه
اشكرك كوين والله يعافيك ويسلمك على وقفتك معي
-----------------------------
......ابو زيد الهلالي
:)الله يسلمك
ايه والله صح المفروض على طبيب نفسي مختص
لكن نفس الشي بعض الناس ماتتقبل الطبيب النفسي وتعتبر عيب انهم يروحون له
للاسف
:(
اشكرك ابو زيد على قرايه قصتي المملوحه

فتى العشة
20-06-2001, 01:43 AM
ههههههههه
هلا بالجلفة
قضوا الخلق ما لقت الا انتي هخههههههه
الله مير يصلحتس
:D :D

الجازي
20-06-2001, 02:35 AM
......فتى العشة
هلا بيك
وبعدين مين قالك اني جلفه هه
<------------بتصول
اقول الوعد الصرفه
كخخخخخخخخخخخخخخ
<-----مهيب جلفه ابد

Qween Of Heart
20-06-2001, 03:39 AM
اهليييييييين اختي الجاااازي .....
العفوووووووووو وانا تحت امرك باي خدمه نصيحه انتي بس اشري وشوفي
سرررررررعتي في التطنيش .....:D ........اقصد...... في الحظوووووور :D

النديم
20-06-2001, 05:50 AM
الجازي :
قصة اكثر من رائعة لكن ليتك كملتيها ..
سرد مشوق وخيال رائع ..



الى الروااااااااااااااااااااااااااااااااااااائع

ريما
20-06-2001, 05:57 AM
اكشششششششششخ عليك ياجويزي اثاريك منتيب هينه والله خخخخخخخخخخخخخخخخخخخخخخخ حطمتها..:):)..بجد روعه ومتعوب عليها :)...

بس عاد لو كنت كذا فعلا بتسكرين السماعه؟:(..وش ذا القسوه يااختي؟؟:(..ياالله .. صعبه وهالتصرف غلط.... غلط ..:g:


المفروض تهدينها وتتفاهمين معاها مو تسكرين السماعه ياالمملوحه...عموما بجد القصه ماشاء الله تبارك الله..:) اذا تبيني اكملها عااااااااادي ترا خخخخخخخخخخخخخخخخخخخخخخخخخ

الجازي
20-06-2001, 05:58 AM
......Qween Of Heart
سرررررررعتي في التطنيش
ايه مقيوله
هع هع هع هع هع
هذي الضحكه مبتكره لتخفيف الضغط على حرف الهاء وتوزيع المهام بينه وبين حرف العين
-------------------------
......النديم
أشكرك أخوي جزيل الشكر:)
لكن القصه انتهت بدون حل
ويمكن مالها حل ابدا لان المشكله صعبه ومقفله:(

الجازي
20-06-2001, 06:01 AM
......ريومه
اقسم بالله وجهك موب وجه تراجيديا
الناس حاطه وجيه حزينه وانتي توزعين ابتسامات
:)وبعدين لازم النهايه تكون كذا لزوم الاكشن
الا وش يعني تراجيديا:(
ريما صح اني مملوحه

راعي الجنوط
20-06-2001, 06:17 AM
هههههههههه والله لو ابحلف يا الجازي ذا صار فلم مصري هههههههههههه


بس والله موضوع تشكرين عليه مناقشه ساخره بأسلوب رائع اجدت فأصبت .

الجازي
20-06-2001, 06:33 AM
......راعي الجنوط
هههههههههههههههههههه
وش يضحكك الحين انت ووجهك
المفروض تصيح القصه حزينه
كخخخخخخخخخخخخخخخخخخخخخ
ياجلـــــــــــــــــــوف

mr_mosta7el
20-06-2001, 08:49 AM
الجازي :)
الحقيقه قصة رائعه
لكن يعيبها ان كثرة القفشات في البدايه
لكن رائعه
و النهاية المفتوحه اعطت للقارئ الخيال انه يوجد نهاية تناسب مشاعره .. فهناك من سيتخيل النهاية سعيده و وهناك من سيتخيل النهاية محزنة و مأساويه
لكن القصه جميل و حلوووووه جدا
و ان كان عامل الصدفة يربك أي تسلسل لأي قصه فلذلك تجدين كتاب القصة يبعدون عنه دائماً
المهم الموضوع للروائع مع سبق الاصرار و الترصد

محمد الحبيب
20-06-2001, 08:51 AM
الجازي :(
:yy:

:( الله يسد نفسك على هالصبح ... مادري وش الي خلاني اقرأ موضوعك اول شي :( ..... على طول قعدت اصيح ... والمدير كل مايدخل علي ويشوفني امسح دموعي .. يقول عسى ماشر ... عاد اقوله .. ابد ياحضرة المدير شفت حادث مروع وانا جاي :(


بس الحقيقة ... القصة ابداع + قمة :)

بس مادري ليش احس ان زوجة محمد نذله :( ............ ومصلحجيه :)


تشكراتي

ننتظر جديدك

راعي الجنوط
21-06-2001, 03:21 AM
الله مالقيتي إلا انا تتهمين بلجلافه والله اني حلو ونعوم هههههههه


شكرا على هل الموضوع الحلو.