PDA

View Full Version : الفيصلة الجزء الأول



KSU_UK2222
23-10-2000, 03:14 PM
الفيصلة الجزء 1....
حقوق الطبع خذني جيتك
الموضوع طويل يمتزج الجد فيه بالهزل, فذا كنت وسيع صدر إقراء الموضوع او اختر ما يناسبك.
مقدمة …… جديات
الرياض …. جديات
هرفي …… تسخين
المواقف …. تسخين
الزواج …. صرقعه
المعقب ….صرقعه
الطيارة …
خاتمة …. انا البردعي
مقدمة
مرت علي سنين وانا خارج المملكة, خمس سنين يقالك اطلب علم, ليتني صاير مدرس ابتدائي مثل اخوي كان اصرف لي.
كل سنة ارجع للرياض اسبوع او اسبوعين يقالك ودي اخلص بسرعة, يروح نصها سلام وعزا يم ما دلو يعزموني الامن تالي ولا اول محد معطني وجه. المهم ما يمديني اشوف الرياض.
تذكرت الرياض على أصوات الألعاب النارية المتطايرة من الفيصلية, طافت بي ذكرياتي الى ايام الطفولة (ليتني ولد سوني ولا بل غيتز).
تذكرت ام سليم و المواسم الحلوة مواسم السياكل, المصاقيل, الفرفيره, العكوس (( عندي عكس ستيف اوستن احد يبادل بشبح)).
طرق خفيف على الباب صوت ملاك: تسلم عليكم امي وتقول كان عندكم طماط؟ الجواب المعتاد وشلون امس قولي لها تسير عقب الضحى. حياة بسيطة جداً ما في بيتك لغيرك وما عندهم لك.
الرياض
..............
امر على الرياض
ارى بها سلاسل من حديد
أقطاب وكأنها معلقات
علقت بها الذكريات
في كل سلسةً حادثة
فيها شهامة ورجولة وعاطفة
عاصفة هوت بعاصمة
...........
لم أكو احلم بفراقها لحضه واحدة
تطور الكابوس واصبح صفة
أرى صدأ الحديد
تصدع الأسمنت
يضفي ظمئ على ظمئ
تستسقي الرياض
يا رياض الخير أسقيك دمي
............
كنا ننام ملء جفوننا
واليوم يقلقنا أزيز الحديد
كان يجمعنا جدار الطين
كان عرضي هو عرضك
لم نعرف الغني او البخيل
.............
تشابهت واختلفت بي الضنون
قد نكون او لا نكون
قالها اجنبي فعلم
اني كنت وانا اليوم لا اكون
............
افقت على اصوات المفرقعات
تذكرت ذاك الرصيف الازفلتي
مسمار واعواد كباريت
لم تك اطنان او كلفت ملايين
……………………………………….
هرفي
بصراحة قرصني الجوع وانا اكتب وقلت ادورلي مطعم وجبات سريعة فاست فود (( زين ما عطوهم قسيمة)). انا احب اشجع الهلال عفواً المنتجات الوطنية قلت اروح لم نعيمي اقصد هرفي. ولكم هذا الحوار:
اش فية صديق سرعة سرعة باقي خمسة دقيقة سكر. باي يونق دلوى.
ما فهمت وش يقصد وانا عادتي الشي الي ما افهمه ارد على راعية بالمثل.
قال سرعة سرعة مافي تايم صديق.
قلت تكلم انقليزي قال اية.
عاد عطيتة مقبلات يحبها قلبك بلهجة مانكونية سالفوردية, مثل E-by-Gum
(( وسالفورد هذي مدينة في بريطانيا فيها جامعة تكرمون, اهل المدينة ماعندهم ما عند جدتي كل ذا الوقت يحسبون الجامعة مصنع شعيرية. ثلاث ارباعهم كانو منطلين عندنا في حفر الباطن ايام الازمة.
مافهم من كلامي غير الطلب معاملتة تغيرت كلش تغير ويوم اكلمة عربي ماعطاني وجة.
قاطعني وقال ((سوري سر وي دونت هاف سالد!! ذي قونق تو ثروت اوي))
الترجمة: ماعندنا طماط بنروح نجيب من الجيران.
بيرمون السلط اخس يا حماية المستهلك.
قلت كم كيلو تسوون وكم ترمون؟
قال عشرين نرمي منها عشرة او احياناً خمسطعش كيلو!
قلت شكراً ومشيت بصراحة انسدت نفسي (( هاذا واقع للمعلوميه يا ويلنا من عذاب الله, ونقول ما جا مطر))
عاد دار الموضوع في راسي وحسبتها: اذا كان كل مطعم يرمي على الاقل خمسة كيلو وعلى القليل عندنا الف مطعم جدلاً يعني خمس الاف كيلو يومياً, مية وخمسين طن شهرياً وعليك الحساب سنوياً.
المواقف
نرجع للفيصليه
اصطحبت الاهل الى هذا المبنا الي احلى ما فية الكورة المغبرة, لو صممة واحد سعودي كان اصرف. لفيت يمين من عند الخزاما, شفنا ذاك المدخل و ذيك الزوالي الحمر قلت وين يا عمي سوق السلاح,,,, الي يسمعنا سوق السلاح يحسبها مضادات ارضية وصفقات تورنيدو اقصد حليب نيدو,,,, ((شكلي اباكل تبن على ذا الكلام))
سوق السلاح يا ناس كلها زوليتين وساكتون, والى وثق فيك مرة باعك حلبي, الي ما يعرف الحلبي يحلب بقرتنا صابرين.
ماعلينا شفنا ذاك الفندق وحسبناة الفيصلية, استقبلنا ذاك السعودي استقبال اسنع وقال طال عمرك هذا فندق اذا تبي الفيصلية خذ المواقف الي على يمينك.
شلون درى اني ما ابي الفندق انا ما سألته ولاقلت شي؟ اكيد من غطوه العجيز أو السيارة قراء أفكاري تطورت خنشليلة.
المهم حصل خير قعدنا ندور في المواقف كنا في العاب السوني ندور الفيصلية. وصلنا الى صالة تحت مرة لقيت رجل((شكلة من حقين حطني شعرة في عبك حبيب البي)) واقف ومعه بنتين عند الباب حق الصالة يدخنون , ممنوع التدخين داخل, يلعن ام التطور و الحلرية.
سلام عليكم تعرفون مع وين الفيصلية؟
ردت البنت وقالت للي معها (( ليت ذم قو اوي ذيس جوراسك بارك انيمل)) والحمار يضحك.
قال حبيب البي بدك الفيصليييية؟
عاد انا حمقت,,,
وقالت العجيز خلهم يا وليدي يمكن عندهم نمل.
قلت شوي يا بعدي اببرد سبدي شوي؟
نزلت وقلت لوحدة منهم ((لاة ,,,, لسن دو يو كنو ذات يو "يس يو" هاف اماوث لايك ا فكن بتش اند يو هاف اتونق ليك فكن ويتش!!!
الترجمة: العنة او تبن لك.
وطلعت بطاقة عدم التعرض كرت السنما حقت اكسفورد قهن قهن قهن.
البنت اكلت تبن وما تدري وش تقول. قالت لغتك العربية جميلة انت دكتور قلت ايه قالت ممكن تاخذ كرتي انا اصبعي بيعورني قلت ابشري بقطعة قالت ثنك يو سو متش.
عطوني وصف الفيصلية وقالو ريوس ستة كيلو هم خذ يمين وعند العبرية الي في الدور الرابع لف يسار بتلاقي قوطي ببسي او ارسى خلة على اليمين , وحبة فوق وحبة تحت بتلاقي قدامك باب هذي الفيصلية.
يتبع في الجزء الثاني
داري طولت عليكم بس معليش ابمسك خط

MajNoOoOoN
23-10-2000, 04:25 PM
هلا و غلا KSU_UK

ياخي موضوعك حلو و مخلط بس فيه جمله ما فهمتها انا
<FONT COLOR="Red">((لاة ,,,, لسن دو يو كنو ذات يو "يس يو" هاف اماوث لايك ا فكن بتش اند يو هاف اتونق ليك فكن ويتش!!! </FONT c>

وش معناها ؟؟؟؟؟؟ :) :) :) :)

النشمي
23-10-2000, 06:43 PM
كرت السينما حق اكسفورد هههههههههههههههه
هههههههههههههههههههههههههه

ااااابوهم جلم اخذين الانقليزي بالعرض :) :)

حي الله KSU_UK ..... ترى الامور مدبره وتراي احاول الاتصال عليك من البارح وعجزت القاك :(

KSU_UK2222
24-10-2000, 01:52 AM
مجنون: يا بعدي هذي تعني اللعنة او تبن لك, لا تحوسنا الله يهديك.
النشمي كرت السنما يسوي شغل , مرة وقفني مرور قال الرخصة عطيتة الكرت وقلت هذي رخصة دولية قال ابمشيها المرة و المرة الثانية ترجمها يا اخي , قلت ابشر ,, قهن قهن قهن قهن

العيار
24-10-2000, 02:11 AM
ksu_uk رائع لا تطول علينا بالجزء الثاني .

وبعدين ابا اسألك جيرانكم لي ذا الحين يتسلفون منكم طماط والا لا .

على فكره وش نوع دخان حبيب البي وبعدين فاتح ازارير قميصه والا لا يعني منشكحه .

مجنون يا لقفك انتم يا ذا القراوى ما تفهمون قلينزي الترجمه ’’ وين مطعم التسبده حق الفيصليه ,,

------------------
لتهت بالصمان والقيظ حاديك #### ايا حسين الدل وايا المطيه

mr_mosta7el
24-10-2000, 05:03 AM
هلا و الله بالكي ... :)
روعه الله يعطيك العافيه
:) :)

صليفيح الأمحق
24-10-2000, 05:41 AM
ما شاءالله عليك يا ksu_uk أجل رايح للفيصليه
هاه ... انا ودي أعرف بس وش عندك في الفيصليه.
اوه عسى ماهي بهاذي الفيصليه اللي انت رحت لها.
<IMG SRC="http://www.shagra.com/11.jpg" border=0>

MERSAL
24-10-2000, 09:37 AM
مسيك با الخير اخوي KSU_UK
يعيك الف الف عافية علي ها الموضوع الخفورسيشي(يعني القوي) وتعجبني يوم تقول لها ابقطعها هههههههههه
تسلم علي ها الموضوع الجاد الساخر
وبا انتظار الجزء الثاني

KSA_UK
25-10-2000, 12:30 AM
العيار طماط وين اليوم جارنا لو سلمت علية قال وش تبي؟
قهن قهن قهن قهن بدون تعليق على حبيب البي

مستر مستحيل هلا يا بعدي حياك الله

صليفيح والله انك جبت خبري ويت تشتغل علمني!!! الفيصليه ماغيرها الي في الصورة عندك

مرسال تسلم يا بعدي ما قصرت

بدون عروه
26-10-2000, 03:34 PM
<FONT size="5">

أخوي العزيز كي اس أي .. يو كي
موضوع بالفعل شيّق ..

فيه حنين للوطن القديم .. ووصف لحال الوطن الجديد !!

الأرض هي هي .. والناس هي هي

لكن المتغيرات أكبر .. من وصفها بالكلمات :(

</FONT s>

محمد
27-10-2000, 12:09 AM
الاخ ksu_uk
بصراحة لخبتني خربتني ضيعتني ذبحتني

(باختصار:ما فهمت شيء)

mr_mosta7el
28-07-2001, 02:24 PM
يا قدمك يا ابو فيصل
بس تصدق مع انه اول موضوع لك في المنتدى
بس روعه بكل المقايس
هكذا المبدعون دائماً
:)

فدغون
28-07-2001, 05:06 PM
قهن قهن قهن .. و فوقها قهن قهن قهن .. و فوقها كخخخ خخخخخ خخخ

الله يغربل بليسك يا كوسا يوكا .. أجل يحسبون الجامعة مصنع شعيرية !!؟؟

KSA_UK
28-07-2001, 05:24 PM
وين ,, مستحيل اليوم غاطس بالارشيف قهن قهن قهن مع وين جبت ذا الموضوع صفحة ألف قهن قهن قهن قهن,, على العموم تسلم يا بعدي.

فدغون توك تشوف الموضوع, قهن قهن قهن قهن قهن هذي مواضيع ايام الهبال الله يطول بعمرك هو مع قرصان في امريكا,, يوم أنا ميت ممنوع من النشر.
قهن قهن قهن قهن قهن

الساخرة
28-07-2001, 06:32 PM
لسن دو يو كنو ذات يو "يس يو" هاف اماوث لايك ا فكن بتش اند يو هاف اتونق ليك فكن ويتش!!!
كل هالحكي وترجمته: العنة او تبن لك (والله تزوير في تزوير)

وبعدين من قالك إن أهل سالفورد كلهم في السعودية أيام الغزو ،،، ماعمري شفت الشيخ إدواردز ،،، وللا ذاك من أهل بولتن (أيه صح)

فدغون
10-07-2004, 11:38 AM
أنا قد قريت موضوع لعضو هنا في الساخر يقول فيه إن التأريخ قلم لونه وردي!!

عاد أبيه ألحين يشوف التأريخ كيف وردي !! (( إلا كستـنائي غامق في أفضل الأحوال ))

mr_mosta7el
13-07-2004, 01:28 PM
سبحان الله ..
تصدق أحيانا أشعر أن القوانين(أي قوانين في العالم)
وضعت ليتم تطبيقها فقط على مجموعة معينة من (البشر)

أتذكر أن نظاما (ما) في الساخر يقضي بقفل المواضيع التي يزيد عمرها عن الشهرين

ربما سقط هذ الموضوع سهوا .. أو عمداً

التونسي
14-07-2004, 05:20 PM
الموضوع قديم يا صاحبي لذلك يتم إغلاقه..
أخي طارق ..
القيادة ما تزال في طور التجديد فاعذرنا