PDA

View Full Version : قرصان في امريكا



KSA_UK
09-11-2000, 04:37 AM
قرصان في امريكا
اول يوم وصلت الى امريكا الله لا يعيدة من يوم. وصلت الى مطار نيو يورك, وجع وش ذا العالم انا في امريكا او افريقيا؟ عالم يتكلمون بسرعه ويمشون بسرعة وانا بينهم كني ضب فاغرن ثمي في عز القايلة مدري وش الطبخة.
دربيت راسي في ذا المطار وانا اتبع كلمة "اقزت" طولت وانا امشي لين وصلت عند باب مكتوب علية "اقزت" وكلمة ثانية ما فهمتها, فتحت الباب والعالم اخترشو!!!
قلت بس عربي اكيد يحسبوني ارهابي. عاد جوني وقالو (( يا ابن الحلال انت ما تفهم هذا فاير اقزت)) قالوها بحمق شوي.. عاد يوم شفتهم حمقانين طلعت لهم بطاقة عدم التعرض الي كاتبهالي ولد عمي, يدرس في امريكا, يوم قراها الرجال اخذني لم تكسي وتكلم معه شوي قلينزي, ما شاء الله علية عندة لغة.
"" التكاسي عندهم لونها اصفر زي الي عندنا في المطار اثر الامريكان ثقافتهم سعودية.!!! تذكرت تكاسينا الى جيت بتصير وطني وتركب معهم قال بستين قلنا معليش, واذا ركبت معه قالك مكيف مافيش خايف على السدرك الله يسلم عمرة.
المهم جاني راعي التكسي وقال "هاي قيت ان"
اخوكم عنده لغة مسكتة الرجال يقول تبي عداد ولا بدون, عاد انا ركبت وعطيته الورقة الي فيها العنوان ومشينا.
وحنا ماشين قلت خلني اسولف غدي ينطلز الساني. وقبل ما انطز بكلمة قال السواق " وير ار يو فروم برذر"؟؟ انا لماح بسرعة فهمت علية, يقول من أي حمولة انت يعني انت ميه وعشره ولا ميتين وعشرين؟ بس بصراحة الكذب خيبة انا ما فهمت شدخل برذر في الموضوع؟
قلت انا من ثادز
قال سوري
قلت لا ماني بسوري انا من ثادز حول البير من السعودية. شكل الرجال فهم يوم قلت البير عليك يا البير عندكم واسطات.
قال "مسلم برذر" لحول انا قد سمعت بذالكلمة بس خلني اكون لكيع وارد علية بلمثل قلت "مسلم برذر" .
قال ام مسلم تو" يعني امي مسلمة مرتين مرة يوم اخذت ابوي بياخذ الجنسية والمرة الثانية يوم لعبت علية بنت الحرام تقول انا ولدة.
عاد انا جيت ابلقي علية محاضرة عن حقوق الوالدين بس ما امداني وصلنا.
قال "هير يو ار" يعني ART عندنا مشفرة! قلت حسبي الله عليك يا صالح كامل قطعتها حتى على الامريكان.
نزلت من السيارة وقلت الرجال مسلم خلني اكرمة وعطيتة مية, انا اصلا ما معي الا ميتين بس الباقي ماخذهم هلل اخاف انسرق.
يوم شاف الميه بغى يستنزل, نقز لم الشنطة ووداها للغرفة وقال " برذر دو يو هاف ا بترول ويل"؟
عاد انا فهمت وضحكت قلت لا تحسبني قروي انا عندي هاف وانا اشر على السنة, اجل وش تحسبون انا راعي لغة انا دارس في الثانوي ان القماش مصنوع منمشتقات البترول.
ناظرني وهو يضحك, عرف اني فاهم.
دخلت السكن وحطوني في غرفة مترين في متر, رتبت عفشي التمر والقهوه و القرصان في المطبخ, وثيابي في غرفة النوم. كان الجو شوي حار,ضهر قايله وانتو عارفين نيو يورك. قلت افتح الوندو تعرفون مقطعتني اللغة اقصد الشباك. انا فتحت الشباك وشفت شي يهول قلت والله ما اقطعها اول نضرة انا علي شوي طوع, وقعدت مسمر نص ساعة ما رمشت ابد اناضر المسبح.
يوم رمشت تعوذت من ابليس ودرت ضهري. بصراحة كني احوليت ,,, قلت اروح للحمام اغسل وجهي , يوم فتحت باب الحمام دليت اشوف صابون ابو غزال يطير.

................


عقب المسبح قمت اشوف صابون ابو غزال يطير. تعوذت من ابليس وقلتله هذا الي انت فالحن فية يا ابن ال… قم جبلنا وحدة.
كان اخر يوم من رمضان قلت ياولد قم انزل تحت ولا اذا جلست يحلفون انك بتصوم, نزلت تحت وكانت فيه صالة العاب قدامها بوفية اثر حتى المريكان عندهم بوفية هماني قايل ثقافتهم سعودية امحق من تسمية.
قبل ما اجلس جاني واحد ومعه صينية فيها لحم يقول الاخ عربي؟.
عاد انا مال من الرجاجيل خلقة الله ياكثرهم عندنا, تلاقيهم تقل ضبان في ذا المقاهي كل واحد منجدع في ربعة وفاغرن ثمة على الفضائيات, اشكال والوان كنهم طوابع كان عندك رسالة شق وجه واحد منهم ولصقه, لا ومن زين الطبايع ماسك الجوال ويتصل:
الو ممكن اشارك؟
شارك حبيب البي وعمهلك
ممكن اعرف الموضوع (( لعنبو بليسك ماتدري وش الموضوع من كثر البحلقة, يا جعل عويناتك تخفس))
حبيب البي انا عندي صندوء فيه اشي. ازى بتعرفوه بتاخدو هدية. بس ما فيك غير تسأل غير سبعمية سوأل, وانا بجاوبك يا نعم يا لا.
طيب كم عدد عيالي (( الرجال ذايب من الحر ومن حر ما يونس اذانيه غدن كتشب))
حبيب البي مش هيك السوأل لازم بأدر جاوب علية بنعم او لا بس.
طيب منهو اكبر واحد فيهم؟
عيوني لا لا مش هيك, فيك تسألني هو مدور ولا مربع ولا مصنوع من الخشب.
طيب هو مدور
هاهاهاهاها لا لا مش مدور
طيب مربع
لا
مصنوع من الخشب؟
لا
وبعد سبعمية سوأل يفوز
مبروك حبيب البي ربحت معنا وجايزتك هي ضب مجمد من منتجات شخلعني ودفع, اعطينا عنوانك ورئم حسابك حتى ناخذ اجر البسطة.
عاد انا مال من النوعيات هذي.
قاطعني الوحش الي قدامي وقال الاخ عربي؟
قلت عربي شعندك انجز اخلص, قال لا حبيت اسأل اللحم هذا حلال؟ ((لعنبو بليسك تسأل حلال ولا حرام في نهار رمضان, رح يا جعلك الغصه)).
المهم انا حامت سبدي و اتصلت على ولد عمي كان بيوديني لم عائلة, اعتذر وقال انا ما اقدر اجي الاسبوع هذا عطني أي واحد جنبك اعطيه العنوان ورح لمهم وانا بجيك بعدين, قلت شدعوه تراني راعي لغة, قال ادري بس هم يدلون عاد انا اقتنعت.
اخذت الوصف ورحت للعائلة, استقبلوني. ام اربعينية وابوهم وعندهم بنية جاها طباخ الرطب يعني توها ناضجة.
صفيت عفشي عندهم وراح الابو يودي البنت وبقيت مع الام باقي على رمضان ربع ساعة ويخلص. اتصلت على العجيز ابارك بلعيد ومادريت ان ايامي بتصير عيد.
نزلت وزينت ذاك القرصان الي يحبه قلبك ولقيت ذيك القرعة العسليه, صحيح مشخبطين عليها, الله يخسهم ما يقدرون النعمه.
عقب ما زينت القرصان جت الام حمقانه, قالت "ذات از فور هلوين" تعني القرعة
قلت حلوين حلوين وين ياعم يعني انا شين يا شبية العنز.
يوم ذاقت القرصان كنها لانت وجابت عصير فمتو بس شكله منتهية صلاحيتة قلت ما ودي افشلها, دليت اجغم من ذا الفمتو لين قلت بس لكن ماش فمتوهم لك علية شوي ماهنا حلا, عقبها قلت ابطلع برى يطقني الهوا, لقيت ذي الي مرتزه وراي ويوم قربت قلت اكيد المرة فيها ريح, تشجعت
قلت " دو يو ونت تو سي ذا برد ان ذا سرفس" يعني تبين اوريس الحمام الي فوق السطح؟
قالت وت, يعني "هو استح" واخذتني فوق ولعبنا سوني لين قلنا بس ويا زين السوني عندهم غير شكل.
المهم جت البنت ولعبت معها سوني.
يوم درت الام حمقت وقالت " شي از اندر ايج" بصراح انا لغتة خانتني هذي المرة واقبلت البنت تدافع عني
قالت "يو ددت وذ هم تو"
قلت انا لا مهوب "تو" الا "ثري او فور" امتنع عن الترجمة. سفهوني وتهاوشو شوي, وبعدين طابت النفوس وكل واحد اخذ فمتو يازين ذا الفمتو يوسع الصدر كنه زقاره عقب الفطور دلى جسمي ينمل وحسيت اني شجاع وما خفت من الكلب حقهم, قلت ابعبر عن غضبي بلقلينزي, قلت "أي دونت اقري" وشت الكلب لازم اشوت شي اصول الترجمة لازم تتوافق مع الحدث. يوم طلعت عيونهم.!!!!!
حمقو من جد واخذت الام عفشي ورمتة برى وانا واراه, عاد تنثر القرصان على قارعت الطريق. اتصلت على ولد عمي وقالت" أي ثروهم اند هز كورن فلكس اوت" ودلت تبربر علية.
ما وعيت الا ولد عمي عندي قال فضحتنا, قلت لوهم مخليني شوي كان قلت في ابوهم ذا الرخمة كلش ولا القرصان فكني عليهم.
احذني ولد عمي لبيته. لقيته محيوس
...............
آخذني ولد عمي وكنه مغصوب لبيته, حطني في البيت وقال انا عندي محاضرة ابرجع الفجر!!!!, هذي الجامعات ولا فلا اجل حامعتنا تسكر قبل العصر.
المهم عينت من الله خير وصفيت عفشي وقرصاني ورتبت البيت, لقيت صروال سنة بس حق حريم!!! انا استغربت ولقيت جنبه كويسات صغار زي حقت المناديل الي عطوناها في الطيارة, قلت اقعد ياولد عمي اثريك وطني وانا مدري. فتحت الكيس لقيت فيه نفيخه زي الي يجيبونها منول الى جو من الحج.!!!!
قلت اكيد جايبها عشان يحتفل بالعيد ونفختلي ثنتين وكتبت عيد سعيد وبعدين مسحتها منهو سعيد, كتبت عيدكم مبارك.
بصراحة النفيخة تروع شكلها غريب.
المهم رحت اتروش وتوني مفصخ ثيابي رن التلفون: اثره ولد عمي يشيك علي يقول تبي شي, قلت لا, قال تراني ابروح لم الدسكو في اليل تجي معنا؟
قلت التسكو وشو؟؟
قال عرضة,
قلت لا ماعزموني(عاد انا ثقيل), انبسط الحبيب وقال "سي يو" قلت احلف, انقطع الخط. انا ما علي ثياب وابن الذين أمنوا يشوفني تلحفت بمنشفة ورحت تروشت.
يوم طلعت من الحمام تكرمون, شفت قمبيوتر ولد عمي شغال قلت اطفيه يمكن ناسيه. القمبيوطر فيه زراير واسلاك وسماعات اثرة اصعب من السيقا, ضغطت زر ابيه يطفي دلى يطقطق ويوصوص, قلت حمد لله عندي خبره في السكن اقرى عليه واتفل واقول اطلع اطلع,,,,
رد علي صوت نسائي ناعم قال: الو "ار يو اون لاين"…. قلت الو… قالت من معي ….. اثريني كنت فاهم غلط الدعوه ماهي سكن الدعوه تلفون.. قلت ممكن اشارك .. ماعطتني وجه وسكرت الخط.
انا استبردت, وعن علي الفنجال, ولمت الدلال و الاباريق وشبيت ضو في الصالة, شوي ولا جرس عند الباب يرن, طلعت برى استطلع الامر لقيت لمبة تولع وتطفي,!!!! قلت اخس ياذلمريكان سبقتونا في التكنلوجيا, خوف المسير يستحي ماينادي.
شوي ولا بدو الناس يهلون. جوني اربعه امريكان لابسين لبس مطافي قلت يالله حيهم, واحد منهم معصب والثاني مسفهل قلت اكيد داخلين على الله ثم علي احل مشكلتهم.
قال "دو يو نو اتز انليقل تو ميك اباربكيو اندور يو مي ستارت افاير" !!!
عداك العيب يا قاموس الجليس, "فاير و دور" هذي بسيطة اثر الرجال زعل عشاني مسكر الباب ويبيني املاء الوجار. قلت ابد يا النشاما مالكم الى طيبة الخاطر, وانا اشدة مع يدة واقوله تقهوا وابشر برضاك. يوم شافوني اسفهليت اسفهلو وقامو وغطو شي في السقف وقالو "هي از هوبلس" قلت افا شفتو الي شفته (السنه حق الحريم) !!! اثريك مفشلنا يا ولد عمي.
طلع واحد منهم حبيب ودلى يسولف معي وقال "دو يو ونت تو قو تو دسكو" قلت اية هذي العزايم ولا بلاش ماهي عزيمت ولد عمي يعزمني كنه مغصوب.
مشو الجماعة وقالو"وي ول هاف اقود لاف" قلت هلابكم وهلا بلافيكم.
قمت استعد للطلعة و ولمت ذاك القرصان الي يحبه قلبك وعلية شوي سمينة قلت اخاف نجوع و ولمت الفروة اخاف يجي برد.
مرو علي الجماعة عقب الاخير, واثر ذاك شين النفس هو الي يسوق ومعه كدلك. ركبت معهم ومشينا عاد شين النفس يقول "ماي داد ورك ان سأودي".
عاد انا حمقت لعنبو داره بازن علي ابوه يشتغل في السويدي قلت "ماي داد ورك ان ثادز"
قال "دو يو لايك ماي كار اتز كديلك" عاد انا فهمت عليه باز بسيارته قلت " دو يو كنو ذات يو كانت ايت وذ ات" يعني ماتوكل عيش.
وصلنا العرضة واثاريها في بيت كبير دخلنا العرضة واثريها خليطي.
جلست ومحد عطاني وجه, الي جيت معهم اشوفهم يردحون, شفت ولد عمي ومعه وحده ترقص وهو واقف يهزهز ذرعانه رحت لمها وقلت ترقصين.؟
قالت لا
"قلت بيبول اند بيبول" يعني ناس وناس؟ عداك العيب يا الجليس
استحت و راحتمالها في الطيب نصيب.
جاني ولد عمي وقال وش تشرب
قلت فمتو,
قال ماعندهم,
قلت ماصدقت شفة قدامك,
قال تبي هذا قلت اية, راح وجابلي ثلالت قوارير شكلة بيفتك مني, المهم راح وخلاني قلت طز ورحت لم اخوياي. جلست معهم وانا اقحم من الفمتو, شوي جاء واحد دلى يبربر عليهم ومسك الشين مع علباه واخوياة كنهم ماشافو شي!!!! قلت افا يا الرخوم. قمت قلت اذكر الله وخل الرجل ماسوى شي, ضحك ودفني, قلت رح انت وذا الساكتون الي معك, دفني ونكب القرصان, يوم شفت نعمت ربي انكبت "القرصان و الفمتو" انا انهبلت وشلخت راسه بقارورة الفمتو الي معي, خيم صمت رهيب وجوني أربعة وقفو قدامي,, ولد عمي كنه مايعرفني, لحظة صمت العرضة وقفت وكلش وقف وكلن يناضرني ويناضر الاربعة الي قدامي, تقدم اكبرهم وقال عداك العيب بلقلينزي ((سيف برذر سيف)) وسلمو علي, قلت يا جماعة القرصان بدالة غيرة تفضلوا حياكم الله على العشى.
عقب الفمتو الواحد يجوع, ضبطت ذاك الجريش و القرصان وخلافة وقلت الله يحييكم على قل الكلافه ولله ماهو حقكم. انبسطو الجماعة واكلو و ولد عمي لصق بي طول اليل تقل بزر شوي وارضعة.
جاني واحد منهم عقب العشى شكله راعي العرضه وقال شرايك نفتح مطعم قلت قدام, وفتحنا مطعم ودلينا نعد الفلوس "سبعة الف ثمانية الف بسنا ياربي فلوس" الجملة الاخيره مقتبسة من درب الزلق.

MajNoOoOoN
09-11-2000, 05:30 AM
ياخي ما عرفنا لك انت ببريطانيا و لا امريكا


تلعب سوني اجل
اييييييه كثر منها بس <IMG SRC="http://www.alsakher.com/ubb/smilies/cwm43.gif" border=0>

mr_mosta7el
09-11-2000, 09:11 AM
روووووووووووووووعه يا اخوي الكي

روعه بالفعل
ماشاءالله عليك تملك بلاغه ساخره
او سخرية بالعه
او الثنتين مع بعض
الله يوفقك
و كله كوم و لعبت السوني و البلونات كوم ثاني
هههههههههه

MERSAL
09-11-2000, 10:46 PM
ههههههههههههه
الله يا خذ شكلك انت وها القرصان
ابداع ساخر
ربط للواقع
طرح صريح ساخر
يعطيك الف الف عافيه

النشمي
11-11-2000, 08:40 AM
الي يسمعك يقول ماهوب يقوم من هالفيمتو :( :(

ودربك الله واعلم به :) :)

خلك على سمكرة الركب وبس :) :)

------------------
اليوم عمل بلا حساب ... وغداَ حساب بلا عمل ... فأغنم يوم عملك ليوم حسابك

mosarq3 alkhobar
12-11-2000, 02:40 AM
بيبول اند بيبول

هههههههههههههههههههه
هههههههههههههههههههه

ناس وناس يا حبي لك انت وقرصانك وجريشك :) :)


الا ما قلت لي المطعم في اي جاده في نييورك :)

من زمان عن ابداعات KSA_UK


------------------
انا ماني يهودي ولا مشرك ولا عربيد.......انا اللي لاغلط تجهم وجهه واقلقه ثوبه

KSA_UK
13-11-2000, 11:23 AM
مجنون هم خلو سوني ولا سيقا, يا فية ناس جحلط الله يبعدك عنهم

مستر مستحيل , قهن قهن قهن تسلم والله يا بعدي ,,,,,,, تدري لو خلاني ولد عمي عندهم كان لعبت سوني مع الجيران

مرسال شتبيني اسوي هذا من حر ما اونس ,,, والله مرع علي اشكال تكرم تحت مرتبة الحمار

النشمي وشفية الفمتوا تصدق مسكت الرياض من الدرعية الى وادي لبن ادور الفمتوا بس ماش الفمتو الي عندنا خالي ,,,, عفواً حالي ماهو الاصلي قهن قهن قهن قهن قهن النشمي العبارة واضحة فمتوا + خلوة = دو يو ونت تو سي ذا برد ان ذا روف قهن قهن قهن قهن

مصرقع الخبر ((بيبول اند بيوبل)) هذي والله صاير ((علىعهدت الراوي)) هذا واحد من شباب امريكا في السبعينات ايم ماكان الابتعث بعد التمهيدي , ايام ما كانت الشيكات تجيك في البريد وانت ماتدري وش الطبخة,, هذا هو راعي الموقف. الرجال الا الشايب كبر وعقل.
المطعم طال عمرك جنب العرضه في بروكسن , حلة الاحرار حلة العبيد سابقاً
<IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm4.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0> <IMG SRC="http://www.alsakher.com/ubb/smilies/cwm41.gif" border=0>