PDA

View Full Version : سوقيات



محمد الحبيب
22-07-2001, 10:46 AM
رجعت من النادي … دخلت البيت … حصلت الوالدة وعمتي يشربن قهوة .. سلمت عليهن وما أمداني اجلس إلا وتطلب مني الوالدة أوديهم للسوق لأن عمتي تبغى تشتري هدايا قبل ماترجع للديرة ..

الصراحة ماتعودت أروح للأسواق لأني أخاف على البنات من عيوني ومن وسامتي .. بس وش أسوي أمر الله شق القربة ..

رضخت للأمر الواقع وجيت أغير ملابسي لكن عمتي رفضت لأنها مستعجلة .. كنت لابس ( كاب ) جلدي اسود مكتوب عليه ( باسكت فوود ) وهذا اسم نادي مشهور في إمريكيا .. وفانيلة علاقي زرقاء متخرمة كأنها كيس بصل أو طاقية سوداني .. أذكر يوم اشتريها مالقيت مقاس كبير يناسبني فضطريت أنى اخذ مقاس صغير أهم شي تكون على الموضة .. كانت ضيقة بزيادة لدرجة إن نص ديودي طالعات من الجوانب .. عليها رقم 151 وتحته مكتوب بخط صغير ( تلعبون على واحد ؟؟ ) .. أما الشورت فكان مشجر ومقلم وله ربقه ( تكة ) عريضة كنها خشة واحد توه راجع من الخارج ومسوي فيها مثقف حالق الشنب .. تحت الشورت لبست هيلهوب زهري علشان أخفي آثار الطفولة البائسة من حبيان وتسلق لعواميد الكهرب الخشبية والسياكل .. وأخيراً الجزمة ( الله يكرمكم ) مشتريها من محلات المبارك بـ 11 ريال بعد المكاسر ومعها جوزين شراب العايلة .. لونها أبيض وشكلها مستطيل كنها علبة هندسة ميزتها إنها تصلح للي مابعد عرف يفرق بين رجله اليمين من اليسار ..

أكيد لاحظتوا إن ملابسي مش ولابد .. علشان كذا قررت إني ألبس جاكيت المناسبات الأخضر أبو جيوب كبيرة .. كان مكتوب على صدره باللون الذهبي ( نعتز بخدمتكم ) وتحت الكتابة مرسوم سيفين .. كل ملابسي عليها كتابات وهذا نابع من إيماني بأن الكتابة على الملابس ماهي إلا انعكاس لثقافة لابسها ..

رحنا للسوق .. ولأني من زمان عن الأسواق كنت متوقع إنه مثل حلة القصمان أو عماير الراجحي .. لكني تفاجأت يوم دخلنا وشفت المحلات والأنوار والمتسوقات كلهم كانوا غير عن أول .. هجيت كشرتي (فتحت فمي) من هالمناظر وصرت مثل القروي ألي أول مرة يسافر للخارج وسيدا راح لبانكوك ..

أخذنا لفة قصيرة بعدها دخلنا محل أقمشة وعلى طول قعدن العجز يقلبن الأقمشة ويسألن عن الأسعار ويكاسرن .. وماكفتهم الأقمشة المعروضة فقامن وطلبن منه تنزيل الطاقات المصفوفة على الرفوف لحد ماصار جبل من الخرق فوق الطاولة .. وبالأخير تركن كل شي وطلعن بدون مايشترن وبدون مايتأسفن أو يشكرنه .. الصراحة عقب هالجحدة كمش وجهي وصار أحمر من الفشيلة وتمنيت أني مكانه علشان أقفل المحل وأروح للبيت لابوها من شغلانة .. بس تبغون الجد .. يستاهل من قاله يصير بياع ملابس حريم ؟؟ حاولت آخذ بخاطره وبخاطري .. تبسمت وهزيت رأسي بشويش يعني زي قولة آسفين على الإزعاج .. بس ماعطاني وجه ..

الغريب إني كل مادخلت لمحل احصل بنت أو شلة بنات قاعدات يسولفن مع البياع ويضحكن وماخذات راحتهن على الأخر .. قليلات حيا والله .. الكبيرة بالعمر ماحد يشره عليها .. لكن المشكلة البنت الشابة ألي تجلس تطق حنك وتضحك مع البياع تقول إنه من بقية أهلها .. وتحصلها ( أنتي ياقليلة الحيا ) ماتسولف بنفس الحرية والحميمية مع إخوانها وأهلها .. عيب عندها ..

* * *

( المرأة أطلق لسان من الرجل ).. الله يخلف علينا بس .. الواحد إذا يبي يهرج صار يتعتع ( آآآ .. بآآأأ .. يعني .. الصراحة .. شعوري كشعور أي مواطن ) ومن هالكلمات البايخه هذا غير التحكك والتهرش وهو يتكلم ألي يشوفه يقول له سنة ماتروش .. لكن الحريم ماشاء الله عليهن شفهن في البرامج المباشرة في التلفزيون أو الرادو .. تقعد الوحدة تتكلم وكنها تقرأ من كتاب نعنبوها حتى ألي يقرأ من كتاب يغلط وهي ماتغلط .. الظاهر إن الدورات العملية السوقية مع البياعين هي السبب ..

* * *

( السكوت علامة الرضا ) متى آخر مرة سمعتوا هالمثل ؟؟ من زمان صح ؟؟ .. طيب ليش ؟؟ .. إما إنه ماعاد صار فيه حريم راضيات علشان يسكتن ؟؟ أو إن وجيههن صارت مغسولة بمرق ؟؟ .. وأنا أشوف الاثنين معاً .. والدليل كثرة مراددهن وبصوت عالي عند أكبرها شنب على الفاضي والمليان .. يعني حشفاً وسوء كيلا ..

* * *

( محلات الملابس الداخلية النسائية ) لاحظت كثرتهن في السوق .. جعلهم العنقز صاروا يخصصون لهن محلات ويتفنون بعرضهن على الواجهات .. المشكلة إن كل الملابس ألي عارضينها متقطعة ومتشققة ماتدري وين وجهها من قفاها ولا تدري وشلون تلبس .. بعذر الشباب لو ماتزوجوا بلاهم خايفين يتوهقون بعدين .. الغريب أني ما شفت ولا محل متخصص بملابس الرجال الداخلية .. وإلا علشان ملابسنا ماتتعدى السروال القصير وسروال سنة ونوعين من الفنايل النصكم والعلاقي ؟؟ .. صح إن النص كم منعتها الشرطة من زمان لأنها تشرب عرق .. والعلاقي مايلبسه الحين إلا الهنود وبندر بن محمد .. بس برضه لازم يحطون لنا محلات متخصصة ولو من باب المساوة .. 

( بنت لوحدها مع البياع داخل محل ملابس نسائية داخليه ) أنتم تدرون إن الإنسان أي إنسان كان أول مايشوف شي أو يسمع شي أو حتى يشم شي .. على طول راح يكوّن صورة مؤقتة في مخيلته عن هالشي بناءاً على بعض الرواسب والتجارب المكتسبة القديمة .. وهالصورة طبعاً غالباً تكون غير إرادية لذلك تحصلها صادقة لأنها تعكس الفكر المكنون في العقل الباطن لدى ذلك الشخص .. فلو افترضنا إن فيه رجلان .. واحد مخه نظيف والثاني مخه وسخ واقفين قدام محل ملابس داخلية نسائية .. ودخلت وحده لوحدها للمحل .. برايكم وش الصورة ألي راح يلتقطها عقل كل واحد منهم للوهلة الأولى ؟؟ .. خلونا نشوف أبو تفكير وسخ وش رصد عقله ( صوره لبنت منقبة … على غلاف مجلة Bikini Girls ) .. عادي ماراح أحد يشره عليه لأن تفكيره وسخ .. بس تبون الجد لا تفوتكم الصورة  .. أما الشخص الثاني أبو تفكير نظيف فمخه التقط ( صورة فتاة منقبة ترتدي عباءة وتقف بكل احترام أمام البائع لتسأله .. عندكم مايوه إسلامي ؟؟ )

* * *

" قلـــت " .. بما إن النساء أكثر جراءة من الرجال في هالزمن .. ليش مانغير بعض العادات ألي بنيت على أساس إن الرجل أكثر جراءة من المرأة ؟؟ .. يعني مثلاً في الزواجات بدل مايدخلون الرجل على المرأة .. ليش مايصير العكس .. يدخلون المرأة على الرجل … عاد تخيلوا .. تحصلون المعرس جالس على المطرحة المشجرة وذابحه الحيا منزل رأسه وعيونه في الأرض وأطرافه وحنوكة تتصافق من الربكة .. وتجي هي بابتسامة من الإذن للإذن وترفع الغترة عن وجهه وتطبع قبلتها الحمراء على جبينه .. وتصير جبهته بعد كذا كنها درج مفتوح بسكروب ..

* * *

( وشيطان طربه ) زهقت وتعتب من الدوران فحصلت كرسي قدام أحد المحلات كان معلق خلفه جلابية لونها أحمريكا .. جلست وصرت مع هالخلفية كني في استديو تصوير .. وأنا جالس أنتظر الربع شفت ذيك الغزال ألي تطير الطير من القفص تتلفت وتبحلق مثل ألي مضيع له أحد أو يدور على غرض .. عيونها كبيرة وناعسة تدل على الحياء والخجل .. قلت لنفسي ( مالك حق يابوحبيب شفت إنك ظالم ؟؟ هذي متنقبة ومتبرجة بس مع ذلك حياوية ) حسيت براحة عقب هالمعاتبة السريعة .. أقبلت علي البنت بعيونها الكبيرة .. كل مالها تقرب اكثر واكثر لحد ماصار بيني وبينها مثل هنا والشاشة .. قعدت تناظرني وطولت بالنظر ومير أنا ألي تطقني النفاضة وأقعد اصبصب عرق وأنزل نظري للأرض لأني مو متعود على هالمواقف الكلاسيكية قلت يمكن البنت تتمقل فيني تبغى تعرف وش هو اللون الناقص في ملابسي .. وأنا أخمن سبب نظراتها سمعت صوت خاثر وخافت يذوب الحجر ويقطع مصارين القلب من الجذور يقول لي .. صديق .. أحصل عندكم ستيان ( مموه ) مقاس 35 B ؟؟

------------------- النهاية -----------------------

محمد بن صالح يوليه – تموز 2001م

البشبشان
22-07-2001, 01:05 PM
هههههههههههههههههههههههههههههههههههههههههههههههههه ههههههه
بو حبيب
و ربي مقال رائع بكل ما تعنيه الكلمة:)
تسلم على هيك مواضيع يا شيخ;)
و اسمح لي بوقفات مع بعض النقاط اللي اهلكتني وانا اضحك :
كنها خشة واحد توه راجع من الخارج ومسوي فيها مثقف حالق الشنب
هم ليش يحلقون اشنابهم<--جمع شنب؟:confused: تصدق مو لايقه علينا..!
و الا احنا تعودنا على الشنب الي من الاذن للاذن و الشماغ على الكتف:(
صح إن النص كم منعتها الشرطة من زمان لأنها تشرب عرق .. والعلاقي مايلبسه الحين إلا الهنود وبندر بن محمد .. اقول من بندر بن محمد؟؟ ناوي يورطك:D
عندكم مايوه إسلامي ؟؟ )
الله يرجك يا شيخ:we:
صديق .. أحصل عندكم ستيان ( مموه ) مقاس 35 B ؟؟ الله يرجك مرة ثانية (البيوت اسرار يا شيخ) كخخخخخخخخخخ

بو حبيب تسلم مرة ثانية والله لا يحرمنا من ابداعك و تصدق توقعت اسم عائلتكم ((يوليه)) <==طلعت اسم شهر بالافرنجي كخخخخخخخخخخ


الموضوع لو سمحتوا ...لازم يروح للروائع بسرعة

ابو بشبش

سقط المتاع
22-07-2001, 01:31 PM
اخي
محمد الحبيب/ سلام
نقد بناء رائع
لو سمحتوا
الى الروائع بدون تردد
وسلامتكم

رايق البال
22-07-2001, 02:32 PM
يابو الحبيب ...

بصراحه اهنيك على هذا النقد الرائع

وكلامك ما ينمل ابد

اسلوب ساخر جميل ...


روح ياشيخ ... لا فض فـــــوك ;)

محمد الحبيب
22-07-2001, 02:44 PM
البشبشان ......... ههههههه الشنب لوقت قصير كان رمز للرجولة :( .... بس الله يهديهم المستغربين .. صاروا يحلقون الشنب ..كننا خوجات :( الله يرجهم بلى

البشبشان .. ههههههههههه بندر بن محمد هذا ولدي الله يطول لي بعمره :( <--- قدر يصرف الموضوع :)

هههههههههههههههه اي مادري ليش التاريخ لزق بأسمي :( ..... شكلي ابروح ابعده ..اخاف يجيب الشبهه لي :) وانا مو ناقص ...

تسلم على كلامك ... لو انا داري ان هذا ردك .. كان نزلت الموضوع عندكم في الملتقى :(

سقط المتاع .. مرسي اوي يافندم ..... الله يخليك لي

رايق البال .... هلا وغلا فيك .. ولا فض فوك انت :( <- يحسبها سبه :) ... متشكر يافندم


تحياتي للجميع

رهف
22-07-2001, 04:53 PM
نصف الكلام ماعرفت اقراه
ياليت المره الجايه تعمل ترجمه فوريه
بس والله البنات صايرين ما يستحوا من جد وتعال شوفهم في جده
بس الاولاد كمان ما يستحوا ليش مخليهم مكسوفين وطيبين
والله ما يخلونا نلف لفه الا ويضايقونا فيها
بس ما اعرف اولاد الرياض ان كانوا غير
بس في جده والله ما يستحوا ولا فيه من يأدبهم كمان
وبلاش العصبيه النوعيه هادي
قال الاولاد يستحوا قال
نهق نهق نهق ضحكتني يا محمد لكن سلمني على بندر ..... ابنك
... يا ويلك من الهلاليين.............. هم مو ناقصيني
يالله بخاطركم

سارونه
22-07-2001, 05:57 PM
بصراحه كل كلامك صحيح ويصير بالاسواق وشفناه بعيونا هذي اللي بياكلها الدود (( بعد عمر طويل )) :(

بس هاللي يروحون السوق بروحهم ! ماعندهم اهل؟ وين اهلهم ليه مهملينهم ؟ :( لو هالنوعية من البنات لاقيين حد يقولهم " عييييييب !" ماكان تجرأوا الى هذا الحد ووصلوا الى هالمواصيل...والله يستر من اللي جاي بعد

موضوع حلو فعلا

شخبار عمتك؟؟ :):):)

صيد
23-07-2001, 12:31 AM
ياهلا اخوي محمد ...
الصراحه خف دمك غييير عاديه ...
اسلوبك ممتع بشكل خيالي......
ونقدك هادف وساخر ...:)
احييك اخوي وسجلني عندك من متابعين كتاباتك..:)
والى الروائع دايركت ....
من وجهه نظري طبها ...:)
ختك الصيد...

bandar23
23-07-2001, 01:21 AM
سلمـت يا ابـويه يا ابـو الابداعـات

احسـن ما في المـوضـوع الشـراب اللي يشبه علبـه الهنـدسه
-

----------------------------------------------
كـان خميـت الغـزال وسـويت انـك اجنبـي وجلست تسـولف معـاها

يوم طلبتـك ستيان (مموه) مقـاس 35 B ؟؟

الحاشي777
23-07-2001, 01:39 AM
ابـو حـبحــــب :
قسما بالله لي فتره ماضحكت مثل اليوم على هالموضوع
اما الميوه الاسلامي هذا لحاله
هههههههههههههههههههههههههههههه
===
:)
===
يستاهل الروائع

امرأه مختلفه
23-07-2001, 02:15 AM
نقد بناء لا يخلو من المتعه والتوشيق والفن في طريقه السرد
مجهود تشكر عليه بارك الله فيك
تحياتي وتقديري للجميع

ابو زيد الهلالي
23-07-2001, 02:50 AM
الغريب ياسطة محمد
في الدول الغربية اتحداك تلاقي محل لبيع الملابس الدخلية النسائية يرتز فيه رجل ((محاسب كان او حتى مراقب أمن))!!!!!!!!!
قهن قهن قهن قهن قهن وسع صدرك محلاتنا تبيع كريم بطعم الكاكاو او الفنيلا او او ,,, !!!!!!!!!!!!!!!!!!!!!!!!!!!!!! تصدق هذي لها محلات خاصة يمنع بيعها اي محل محترم في باقي الدول!!!!!

هذا واحد من الشباب الله يهدية لك علية شوي عفوي الى ابعد حد عندهم محل لبيع الملابس الداخلية,, والد المذكور ترك له المحل وقال ابرجع بعد ساعة,, الأخ ارتز في المحل ,, ما له في الطين ولا في العجين,, جت ذيك المرية تبي الي انت خابر ,, رد المسيكين بكل عفوية هذا ماهو مقاسك يا خالة قهن قهن قهن قهن قهن قهن بالله فيه أنثى بكامل قواها العقلية تشتري ملابسها الدخلية بوجود رجل!!
ياناس الى دخل الواحد محل نسائي غربي لا يمت للاسلام بصلة تضايقوا الناسة منه

فتى العشة
23-07-2001, 04:57 AM
حمودي<---ابوووووك يالتدليع:D
ياحبي لك وانا جدك ....دايم مواضيعك مملوحة وقليلة الدسم ومبستره
دامت خشتك لنا ....الموضوع يخقلونه للروائع


هذي مافهمته ممكن تشرحه؟؟
صديق .. أحصل عندكم ستيان ( مموه ) مقاس 35 B ؟؟
وشو هذا؟؟؟كنادر جدد؟؟ ولا وبودر ما ماخبرت البودر له مقاس
<----جنط
---------------
الا مير اقول ماودك تشاركنا انا وابوعجاج بمصنع التتن الي بخنشليله:D :D

ريما
23-07-2001, 07:24 AM
تدري ليه الحريم كذا؟؟؟

لان الرجال الحين لك عليهم:)...

لو فيه رجال حق وحقيق ماطلعوا حريمهم بهالشكل..قه قه قه ...البلا منكم اولا واخيرا ....:yh:

محمد الحبيب
23-07-2001, 09:59 AM
رهف .. ههههههه لا احنا في الرياض مانعرف نضايق البنات ابد :( اصلاً مابعد عرفنا هالسواد الي في الشارع بنات او يوفو :( ...... ههههههههه يبلغ إن شاء الله راح اسلم لك عليه كثير لا اقصد كتير السلام :) ............ أي كلمة ماعرفيتها قوليها وانا اترجمها لك <--- ابوحبيب البعلبكي :( تشكراتي

سااااااارونه :( .. تدرين ان عمتي هذي هي سميتك ... وعلشان كذا ماكنت ابغى اوديها .. وتعذرت بأني مو لابس كويس :) ..................... أي والله الله يستر ياوخيتي ..... جيل مش متربي .. حيربي أولاده ازاي ؟؟؟؟؟ سؤال وجيه :) تشكراتي لك اختي

أختي صيد هلا وغلا فيك .. مشكورة على كلامك وإطراءك الحلووووو ..... أما بخصوص التسجيل عندي ... فاسمح لي اقولك اللستة مليانه ... راح اسجلك انتظار هاهاهاهاهاه ... والاتدرين ..... عطيني مية ريال وانا اسجلك الحين <--- يموت بشي اسمه رشاوي :) .. مشكورة اختي

بندر .... ههههههههه ودي .. بس المخرج مش عاوز كدا :( ..... تصدق عاد من هول المفاجأة .. تلعثمت وصرت احكي سعودي من غير ماعرف :( <--انفضح :)

الحاشي ............... مشكووووور اخوي .. هذا بعض ماعندكم يابو التناسيم :) <--- مداهنه لين ماينقلة للروائع .. همن على راسه بالقايش :( ( قرنين ) قه قه قه قه

تشكراتي للجميع

محمد الحبيب
23-07-2001, 10:08 AM
أمرأة مختلفة .... مشكورة اختي واسعدني ردك :)

ابوزيد الهلالي ...... والله انك صدقت بخصوص المحلات في الدول الأخرى ... بس وش انسوي .... ماعليهم رقيب ولا حسيب ................. أما سالفة الكريمات الي تقول عنها .. فهذي الله لا يعاقبنا ... سمعنا عنها وعن اعظم منها ... يالله لا تخسف بنا .. يالله تلطف بنا .. :(

مشكور اخي العزيز

فتى العشة .. ههههههههههههههههههه الله من الدجة في هالراس .. خابرك ماتعرف الا انواع السراميك :) قه هق قه قه .......... شوف ياخوي .... اصلا كل الي انا قلته مو صحيح على حد علمي بس كذا مزاج كاتبه .. يعني .. كلمة مموه .. مثل لابس الجيش المموه الي يجيك مرقع عشرين لون :( .... والستيان هذي زي الشمايل حقت عنزكم المصون ( العانس ) قه قه قه قه

ريما .. وانتي ماغير .. تلزقين التهم فينا ..... صدق انكم حريم :( ............ الحين مو انتم كل اشوي .. تقولوون ... حنا يالحريم نص المجتمع .. ونربي النص الأخر ؟؟؟؟؟؟؟؟ ليش ماربيتوا بناتكم وعيالكم الي صاروا رجال وجاهم بنات قليلات حيا :( السر مو في الرجل ... اصلا الرجل طول اليوم هامل ياما في الشغل او في الاستراحة .. كيف راح يربي عياله :) <-- على باله يدافع الحين هو وكشرته مادرى انه شرشح الرجال مع الحريم :(

تشكراتي للجميع :)

صفاربيض
23-07-2001, 12:13 PM
مسكين ابا حوبيب تعلق مثلماً تعلق الملابس النسائية الداخلية علي وجهات المحلات :(

مروق لك
23-07-2001, 02:20 PM
كاااااااااااااااااع كر كر كر كر
محمد ..... الله يرجك لما تطيش وش هالروجة اللي مسويه هنا :D
اجل محلات رجال ولا مقاس 35 B يالداشر!!!!!!:mad:

تبي الصراحة قرأت مقالك عدة مرات, وفي كل مرة ازداد اعجاباً به, و بالمقدرة الفذة التي تمتلكها.


تحياتي
مروق لك

محمد الحبيب
23-07-2001, 02:44 PM
صفار البيض اي ماقلت لي وين غاطس فيه الايام الماضية :) قه قه قه <--- نشبة .. ............ اي والله تعلقت وصرت متشقق :( مشكور اخوي


مروق لك .. تسلم اخوي .... وماقصرت .... وترى ابوعجاج خابره يبي يفتح محل سراويل سنة بكرسي وبدون كرسي .. وكذلك ابودعسة :) ..... ويبي له شريك ..... وش رايك تشاركه :) .. تحياتي لك


تسلم اخوي

العفاف
23-07-2001, 03:24 PM
اولا الموضوع فعلا مايحتاج تعليق لانه يتكرر لكن ما لاحظت انك ما ذكرت الرجال خير شر خصوصاً ودورهم الكبير في مثل هذي المواضيع بدأً بالأب وانتهاءً بالزوج
انت ماشفت الخكاريه اللي يمشون مع خواتهم حتى احيان ما افرق وين البنت فيهم
ذكرتني مره بنفسي يوم شفت وحده من هذولي اللي تتكلم عنهم وهي تقول للهندي (ادخل على الله ان كان هندي) ضيق العباه شوي من هينا وهي لابستها قمت انا شفتها احترقت اعصابي قمت قلت لها الله لايبلانا قالت ايش سبحان الله شوفي شكلك شكل عنز(لأني لابسه عباة راس وهي لابسه كتف على الموضه الأخت بعتقادها) قلت لها زين الحمدلله تعرفين الله ولو اختي ما سحبتني كان صارت خناقه لكن الحمدلله جاءت سليمه هالمره واختي خانقتني قالت مالك شغل بكذا اشكال (قلت نهي عن منكر )00000
ودي اعلق على موضوع شباب الرياض ان كانوا يغازلون بس اقول يكفي طاش ماطاش طلع فضايحكم بالمغازل000آسفه للاطاله00

محمد الحبيب
23-07-2001, 04:08 PM
أختي العفاف ..... مشكورة على ردك .... بعدين تعالي .. الحين .. انا والبياعين الي طعلوا في القصة .. مو عاجبنك :( .... والا انتي مثل جدتي الله يقومها بالعافية ... لما ادخل عليها .. تتغطى وبعدين تفتش وتقول .... انت .. وهم احسبك رجل :( :g: ... اجل انا وشوا :( .................... لا وفيه ناس ثانين ... يقوووولن .... تغطوا ياحريم قدامكم رجل ..... وعقب اشوي .. لا لا هذا السواق افتشو :( :)

ياختي الفاضلة .................... الرجال المفروض انتم الي تتكلمون على مشاكلنا .. لانكم تشوفن الي أحنا مانشوفه في انفسنا ... وعلى قولة المثل الغاني ... الحريم يشوفون عيوب الرجال والرجال يشوفون عيوب الحريم وهلم جر :)

الشي الثاني ... ليتك ... عطتي راعية العباية ... بوقس .. او ركبة جلعها البلى في شكلها :( والله لا يكثر نوعها.........

تشكراتي اختي .. ومشكورة مرة ثانية على الرد :)

تشاد

صفاربيض
23-07-2001, 09:32 PM
والله ابد قريب ...رايح ادور قرقاص وحميضى في الديرة الي جنبنا قه قه قه قه :)<===غص

بدون عروه
24-07-2001, 12:11 AM
ههههههههه

فقط إطلعت على الموضوع

وضحكت
وأيدت
وأُعجبت
ودعيت لك بالخير
ومشيت

:):):)

شوق
24-07-2001, 12:38 AM
هاههههههههه :D

يا انا من زمان ما ضحكت هالضحك ...:D
اضحك الله ضرسك العقل ... ( كانك ما قشعته )

الحبيب ودي اقولك شي
*
*
*
لحالك تكفى :we:
*
*
*
*
*
اقول لحالك &&
*
*
*
*
*
ترا مقاسات السوتيان ما تجي الا زوجي 34-36-38-.... :rr: .... مافيه مقاس 35 :we:


الزبدة .... ان ما عندك سالفة :fff: في هالامور :rr: ...يعني طلعت براءة :fff:

حاطب ليل
24-07-2001, 05:06 AM
اسلوب ساخر ورائع لايكتبه الا ابو حبيب ...

صدقني حلفت ما انام الين انزله بالصفحة الأولى للموقع ......

الحاشي777
24-07-2001, 05:14 AM
حـــــــــاطب لـــــــيل :
والله منت احسن مني
والله ما انام الين اوديه للروائع :mad:
:)

ابو جلمبــــو
28-07-2001, 10:40 AM
ههههههههههه موضوع رهيب