PDA

View Full Version : يا يــــــــمه



بنت أبوي
02-05-2002, 04:20 PM
مساكم الله بالخير :)

قريت هالابيات وعجبتني , لكن للأسف ماعرفت منو صاحبها , اتمنى من اللي دخل وقراها وعرف منو كاتبها انه يذكر اسمه :)

يا يمّـه .. منتهي جيتك وطالب منك الغفران

أقبـّـل قاعة أقدامك وغسلها بدمعاتي

يا يمّـه .. كل مافيني يناديلك أنا ندمان

طلبتك؟.. قولي سامحتك وردي لوجهي بسماتي

أنا أدري قلبك الطيب كسرته بصدمة النكران

غلطت .. وغلطتي هذي تعير كل غلطاتي

تشوفي الشيب يا يمّـه ترى ماجا وأنا فرحان

وربي إلي رفع ذاتك ونزّل للردى ذاتي

فقدت الراحة من بعدك .. فقدت الطيبه والتحنان

بدونك .. راحتي غاية بدينك هذي راحاتي

أنا بعدك ولا حاجة أنا بعدك ترى عميان

أشوف .. ولا أشوف إلي يوريني مساواتي

أنا وسيد الشّـقى والهم من بعدك غدينا أخوان

يجيب هموم هالعالم .. ويرميها بمتاهاتي

صدقتي .. يوم قلتيلي تدين اليوم بس تندان

رميتك في بداياتي .. ورموني في نهاياتي

أنا من شالك بيده ورماك بأسفل البركان

نخيتيني .. وطلبتيني .. ولا حصلتي نخواتي

مثل ماهنتي بعيوني .. عليهم قلبي يمّـه هان

رموني وضعتهم فزعه .. وأنا الدمعات فزعاتي

يا يمّـه لا تظنيني أنا من فعلهم زعلان؟

سواتٍ فيك سويته وسوّو فيني سواتي

يا يمّـه .. يالله ظميني ودفيني بهالأحضان

أنا أدري فيك مشتاقه .. وهمك بس ملاقاتي

يا يمّـه (حيييييييل) ضميني أبي أرتاح أنا تعبان

تعبت أهرب من ذنوبي ابيك آخر مسافاتي

أبسمع منك أي كلمه .. لصوتك مسمعي ولهان

أبسمع (يمّــه) بصوتك أبذكر فيها نشواتي

أشوفك ساكته يمّـه ؟!!.. غفيتي والا أنا غلطان؟

غفيتي يا بعد عمري؟.. تعبتي من مواساتي؟

يا يمّـه طالبك قومي .. إذا لي في عيونك شان

أشوف الموت بعيونك .. عساها تخيب هقواتي

تعالوا يا بشر شوفوا أنا محتار أنا تلفان

أنا أمّي مدري وش فيها أنا مدري أنا أحاتي

شنو ؟؟ أمّي أنا ماتت !!! لا لا.. لا ترى غلطان!!!

أنا أمّي ما تخليني على حزني ووناتي

أنا أمّي قلبها طيب ولا يمكن تبكي إنسان

أنا أمّي ما تبكيني .. ولا تتمنى آهاتي

يا يمّـه صح ما متي؟ .. وصح الموت تو ماحان؟

إذا متى أنا بعدك أبقضي وين ساعاتي..؟

يا يمّـه قومي يا يمّـه .. وقولي الموت لا ما كان

أنا جيتك وأنا ناوي أببدي فيك جناتي

تركتيني ومتي ليـه؟؟ تركتيني وأنا غرقان؟

ولا مسموح يا وليدي!! .. ولا تلعنك لعناتي!!

أنا الجاني .. وأنا المجني .. وأنا المخطي .. وأنا الندمان

وأنا بإيدي رميتك إيه .. وبعثرت أهم ملفاتي

وجيت من الهنا مفلس .. وقلبي من الضنا خسران

تركتيني على ناري أعدد فيك زلاتي

ولاني مرضيٍ ربي .. ولاني تابع الشيطان

أنا بعدك ترى مابين نهاياتي وبداياتي

يا يمّـه منتهي جيتك وكلي مرتجي غفران

وشفت الناس تلعني .. وتحذرني من الآتي..،



الكاتب .......... ؟؟!

بو سعد
02-05-2002, 04:28 PM
كلمات قممممممممة .. رووووووووعة .. فعلا شاعر !!

انا بعد انتظر اعرفه على احر من الجمر !

اشكرك اختي .. على هالاختيار الرائع !

المجهوووول
02-05-2002, 05:34 PM
نصار الظفيري هو الشاعر

اختيار يشبهكي يا بنت ابوي
بو سعد شلونك

ابو طيف
02-05-2002, 07:37 PM
اختيااااااااااااار راااااااائع جداً


نعم كما ذكر اخي المجهووووول الشاعر هو نصار الظفيري وسبق اني نزلت هذه الابيات في المنتدى قبل اكثر من شهرين0


تحياتي لك على هذا الاختيار الجميل0

================

كل ما نسنس
02-05-2002, 07:50 PM
يا عيني عليك يا نصار ...

مو معقولة ما تبكي أمك هذي الأبيات ...

الله لا يحرمك منها ولا يحرمها منك ... والجميع انشالله ...

تسلمين بنت أبوي ...

بنت أبوي
03-05-2002, 01:14 AM
مساكم الله بالخير :)

الاخوان اللي فوقي شكرا لمروركم , وشكر خاص للمجهوول :)


فمان الله :)

أم كيووود
03-05-2002, 03:00 AM
في ريل بلير بهل الشعر حلوووو مره بس للاسف وراه لحن

بنت أبوي
03-05-2002, 05:56 PM
أم كيوود اذا سمحتي ممكن ادليني وين موجوده القصيده ( ودي اسمعها ) :)



شكرا :nn