PDA

View Full Version : رومــــانــسيــه



الفاهم
31-08-2002, 11:03 PM
من منطلق ان الزين زين لوه مهوب راعي نوم وان الهواء جانا من زنجبار وان الي نبيه ماعطانا وجه وبناء على حكايه اسمه بنت اسمه هايدي وان الخرخير أحد مدنا السياحية الجميلة ! يقال ان النوم بالسطح زين هالايام !!


ولكن ليش الواحد ينام بالسطح هل عشان الكهرب وتوفير مصرف المكيف او عشان ريحه زوجته شينه وهل لبنات الجيران وقعدتهن بالحوش علاقه بهذه الظاهره ! والمهم وش دخل سهيل بالموضوع !!


يقولون ان سهيل و مشعل و بندر وحتى تركي ساره امل غاده ذولي مثلهم مثل راعي السطوح بس مسطحين بسهيل وغير سهيل ! سهيل يقول لغاده ابي اصير انا وانتي تحت القمر في جزيره والبحر حولنا وقت الغروب البلابل تغرد والورود تفتح و الضباب حولنا قطرة ندى تضايقك وصوت العصافير يضحكك !!



يقولون ان الشعر فن والفن جمال والجمال طبيعه والطبيعه مافيه !!! قمه الرومانسيه انك تصير شاعر وتكون مرهف اذا كنت رسام وتكون ياحليك والله وبعدي اذا صرت كاتب لقصص حب !



مدري والله ليش احس ان اكبر نصابين بها الدنيا الشعراء تلقاه شين وكبر البغل ولا بجيه ولا حق مشوار ليموزين ويقول شافتني حبتني !! الا ليش حنا حبنا اسرع من الصوت ماقد قريت ولا شفت احد يقول اكرهها ولا مابلعتها ولا ياثقل دمها ولا يامصلها حبيبتي !! كلهم حلوات وزينات ويهبلون !!! حنا فينا حول ولا فيه ناس يعيشون معنا وحنا ماندري !!



الرجل اذا راح يلعب كوره قالو له انك عصل صعب انك تصير لاعب رح تعش لا يجي احد يشوتك وتموت علينا !! الحرمه اذا راحت تعرض ازياء قالو لها نبي نعرض ازياء مهوب خيام جسمك اثقل من منصه العرض والكميره صعب تطلعك كلك !!


لكلش بها الدنيا اساس ومقومات الا عندنا !! قاعد بنفود ويكتب شعر !! ذيك لها سنه ماتسبحت الذبان يقرف يجي حولها وذاك يتغزل فيها !!! رطوبه موت حر مافيه ولا سمكه بالبحر من حلاوه الجو وذيك تحسب انه ماتصير انثى الا اذا غطست رجلينها بالبحر و على باله تستمتع بجمال الطبيعه مي زياده !!


تصور لو انك بعيد الضحيه ويجي واحد يعطيك ورده يقول خذ عطيتكم !! ولا انك ناسيه تغلسين المواعين قبل ماتنامين يوم قمتي ولا امك حاطه لك كرت وتقول ليش القسوه هذي معي توقيع العاشق المحروم ولا انك صادم بسياره ابوك يوم درا لقيته مرسل لك رساله يقول ياخاين الحب !!


العالم قرفانين الساعه 2 الظهر وذولي قاعدين في حوش كفي شوب ويشربون قهوه يقولون مالها طعم اذا ماكانت في مكان مفتوح هالفرنسين !! ولا شايب توه مسوي عمليه قلب على كلى على زرع كبد و وبالعنايه المركزه وذا جايب ورده بيضاء وكاتب مع اشواقي !! وذيك جاه حول على تراخومه وشوي ولا تصير عمياء لانه تذاكر على ابجوره تقول ابي جو رايق !!!


المشكله حالفين ربعنا يصير مثل العالم تراه مهوب غصب الدعوه يعني شلون نصير رايقين وحنا تقل بومه مانطلع من بيوتنا الا بعد الساعه عشر عشان الجو ولا شلون نصير شاعرين وحنا نقرف حتي من اشكالنا وش يسون عاد الناس الي يشوفوننا ! ولا شلون نصير مرهفين و90بالميه من يومنا يالبسين سروايل سنه ولا قمصان مدري جلبيات نسائيه الى سبب العنوسه بالعالم منها !! ولا شلون نصير رومانسين وحنا اسامينا يادحيم ولا صلوح ولا حصيصه ولا فطوم !!!!



النفسانين عندهم مرض يسمونه رفض الواقع يعني يصير الواحد مصدق انه مواليد فينا و انه عايش في الريف الانجليزي وان الوجه الي بالمرايه مهوب له !!! وان الي قدامه حبيبه يعني في حفله تنكريه ولا مهوب شكله كذا !! و يجيه احساس ان وده يصير نحله لأنه دايم حول الورد !! ويصير يحسب نفسه محبوب عشان كذا ماينادي احد الا يا حبيبي وهو ابوه وامه يقولون الله لايعيده من ساعه من ثقل الدم الي فيه !!! ويصير يعتبر الفلوس نقمه وعشان كذا كل فلوسه رايحه بفواتير تلفون عشان المسج ويصير ينادي ان شعار الدوله بدال النخله يصير قلب حب !!


هو الحل تصدمه بالواقع جب له صوره بطاقته ولا صوره جوازها وقل بالله عليك ذا شكل ممكن يكون رومانسي !!!


الفاهم

sOqRa6
01-09-2002, 05:05 AM
مساء الخير يالفاهم ...
كلامك حلو وصريح وبالنسبه لي مقبول لانه واقع ...
بس يمكن هالاكلام بدا يتغير شوي ...
والا انت ويش رايك..؟
وعلى فكره كثير من الناس الان يمارسون الرومانسيه واقع حياتهم الطبيعيعه ..
وشكرا لك على هالموضوع الحساس والله يوفقك
تحياتي

متابع محايد
03-09-2002, 11:23 AM
ههههههههههههههههههههههههههههههههههههه ..

مداخلات ساخرة جميلة .. ولكن ياعزيزي انت ظلمت من يزايدون على الرومانسية :( .. فهناك من يترومنس من اجل الرومسة .. وهناك من يترومنس لاهداف غير محددة :yh:
محبتي

الفاهم
06-09-2002, 03:46 PM
sOqRa6: يمكن :) السؤال هل عن قناعه؟ ولا حجر مع الناس عيد :)
الف شكر لك ويوفق الجميع

متابع محايد: شف حاول انك تشوف شاعر يلقي قصيده بالتلفزيون مهوب يعني تقراه اذا ماقلت عفوائيا ذا الحين وش يبي :) عاد هو يترومنس ولا وده يروح لبيتهم بس مافيه احد يوصله انت ابخص :)



الفاهم

المطعم الصيني
06-09-2002, 05:11 PM
تحية لك اخي الفاهم ( بمكنون الحالة الخنفشارية)

موضوعك حلو ونظرتك واقعية a*
وشكرا لك خليت الموضوع روعة و قليل الدسم حتى يقرأه كمان اللي مسوى رجيم
شوف اخوي ما قدرنا نصنع طائرة او صاروخ اسرع من الصوت
خلنا نصنع حب اسرع من الصوت المهم اختراع
واذا ما فى جو زين وعندنا رطوبة
ما تعرف انه ارقى درجات السعادة ان تصنع شئ من لاشئ وبلا شئ
عاشت الرومنسية وعاش كل رومانسي g* وعاش من شافك حبيبي
تحية لك الفاهم

الفاهم
09-09-2002, 12:57 PM
المطعم الصيني : هلا فيك :)

انت صادق مهوب ذوليك بلشو كل يوم اختراع وابحاث ومشاكل يبون يسون طياره بدون طيار تروح تضرب وترجع لمكانها حنا ولا فخر :)حبنا يروح بسرعه ويرجع لنفس مكانه بسرعه خياليه :)

عشت يالطيب :) والف شكر لك


الفاهم

متعب المتعبين
19-09-2002, 08:30 AM
بعد إذنك أستاذي نسخة إلى الروائع g*