PDA

View Full Version : هـــلّ أنْت مُـــــرتاح ... !



هدوء
26-05-2003, 10:47 PM
السلام عليكم .. :)

قريت موضوع .. يتكلم عن كتاب ..
مرره خطير .. كله معلومات جباره .. وحابه اعرض هالمعلومات الحلوه والزينه عليكم ..
اول شيء هالكتاب اسمه ..

"عش حياة أفضل"
لـ (بولين كلير مونت & فيرجيني نوفيل)


اكيد اغلبكم إن ما كنتو كلكم تقولون بنفسكم
.. شلون ارتااح من الاضطرابات في نومي ؟؟
وايش هو افضل وقت علشان اعمل ريجيم .؟؟
.. متى اقدر آآكل حلوياات ولا أسمن ..؟؟
اسئلة كثيره ..

فيه علم اسمه الكرنوبيولوجيا 'La Chronobiologie'
وشعار هالعلم الجديد "لكي تعيش أفضل ,, إعتمد نمطاً مناسباً "


مقدمه عن علم الكرنوبيولجيا

ابو قراط .. وافلاطون .. لاحظو من زماان علاقه بين الوقت وبين الانسان .. وماحد اكتشف هالعلم .. الا بهالوقت الحاضر .. :)
اكتشفو .. ان في اوقات .. سواء كانت ساعات او فصول السنه .. تأثر على حياتناا ..

من ملاحظاتهم .. كانت هجرة الطيور .. وبعد وقت تفتح الورود والزهور .. بأي وقت بالصباح .. ومتى تسكر الزهور .. وبعد اكتشفو ان هالعمليات تحدث بمعزل عن الحراره
مثلا .. درجة حرارة اجسامنا .. تكون منخضه بالليل ... وتكون الساعه 2 الظهر مرره مرتفعه .. والساعه 7 المساء تبدأ تنزل درجة الحراره .. f*
هذا مثال بسيط .. ولكل شيء احنا نعمله بحياتنا .. راقبوه .. وعرفو افضل شيء علشان تكون حياتكم تمام التمام بإذن الله ..
بآخذ معكم دورة سريعه .. بالكتاب علشان نفرفره كله بموضوع واحد ..


النوم

تكلم الكتاب عن مراحل النوم .. ف قسمها لـ 5 مراحل وكل مرحله تأخذ من بين 90 دقيقه الى 110 دقايق :

1- الانتقاليه بين النوم واليقظه .. و 50% من اللي تصحيهم لو تسألهم نمتو ؟؟
يقولون لا .. لانهم بيكون حاسين باللي حولهم .. :)

2- يسمون هالمرحله .. مرحلة النوم الخفيف << ياكثرك .. يعني لو تسمعون شوي ضجه تفزعون .. وتحسون فيها


3 و 4 – النوم العمييييييق اللي ماحد يقدر يخترقه (مركبين نورتن فايرس) طيب تسألون كيف تكون أشكالنا ؟؟
.. اقول لكم .. انتو ما تتحركون .. بتكونون جامدين .. ثلج .. وتنفسكم بطئ وعمييييق .. يعني وناااسه :)

5- يسمونها مرحله النوم المفارق / متناقض ..وهالمرحله .. يقولون صعب تصحون النايم فيهاا .. ويكون جسمه مسترخي .. لكن بتكونون نشيطين .. تقولون كيف ؟؟
اقول لكم .. يعني نبض القلب وضغط الشرايين يرتفعون وينخفضون .. وإذا حلمتوو .. اذا صحيتو ممكن تذكرونهاا .. :)

وفيه ملاحظه صعنطوطه عن النوم :) .. يقولون .. انه في كل ليلة من 4 لـ 6 دورات .. حسب مدة النوم ... والدورة اللي تمرون فيها .. تكون مو بنفس الطول او العمق ..



نجي للقيلوله ..

اول شيء لازم نعرف متى تنخفض درجة حراره جسمنا .. تنخفض مرتين باليوم ..
الاولى مابين الساعه 8الى الساعه احدعش .. المساء ..
والوقت الثاني بين الساعه و3 بعد الظهر ..والقيلوله مفيده للي دوامهم نهار .. ويحتاجون يطلعون المساء عندهم اشغال ..
وافضل وقت تنامون فيه بين هالوقتين .. وتكون مدة القيلوله من 20 الى 45 دغيغه :)

طيب الحين اكيد كلنا غير بعض .. يعني مثلا .. فيه احد منكم تكفيه 8 ساعات يصحى نشيط ومصحصح .. وفي أحد لازم 12 ساعه .. ومن بين كل 10 اشخاص واحد منهم تكفيه 5 ساعات .. :)

الحين اكيد واحد من اللي يقرون قرقع في عقله سؤال يقول .. طيب متى احسن وقت أنام فيه ..؟؟؟ اقولك ياحلو :)
دائما يجي النوم اذا صارت درجه حرارة جسمك منخفضه .. وطبعا كل جسم يختلف عن الثاني .. فإن نزلت درجه حرارة الجسم .. ولو انتي بمحاضره .. تتمنين انك تكونين بفراشك نايمه ... ونفس الشيء لو حسيت انك مصحصحه تكون درجة حرارة جسمك مرتفعه وفيك طاقه ..

بعدين بالكتاب تكلمو عن نوم الاطفال .. وايش الوقت اللي يكفيهم .. والخ << تعبت تكتب عن النوم .. :)



ايش رايكم نحكي بالارق .. وكيف القى لي نوم هاديء ومريح

يقولون لكم ياطويلين العمر .. :)

تعشو عشاء خفييف .. لبنه وزعتر وزيتون .. او جبنة كرافت الزرقاء العلب
وفيه حركه تساعد في النوم ... خلو درجه حرارة المكيف .. 19 درجه مئويه .. وخذو دش .. واذا عندك وقت تسوي رياضه .. نطط على سريرك << عز الله انكسر هالسرير :)
سوو تمارين خفيفه .. وحاولو تحددون وقت النوم .. تسعه يعني تسعه <<< شكلها الى رحمة الله ... الله لا يعوق بشر مع هالدرر والنصائح اللي تطلع ... ونفس الشيء وقت ما تصحون خلوه وقت محدد ..

ان شاء الله المعلومات عن النوم والقيلوله والارق تنفعكم .. :)

نجي للنقطه الثانيه اللي تكلم عنها الكتاب ..:)


التغذيه (يممم يمي)

فيه مقوله تقول .. إن الاكل هو بنزيم الانسان <<< ابوووك يالفاهمه عز الله راحو فيهاا :)

واكيد كلنا لا لا حرام اظلمكم .. اغلبنا .. عرفنا عن عملية التحول الغذائي .. / الأيض

طيب اكيد ودكم تعرفون .. وخاصه للمليانين والسمان (الله يشفيهم) متى وقت احتراق السكر بالجسم .. اقول لكم .. وقت ما يحترق السكر .. النهار .. وخااصه الساعه 4 العصر .. يعني نططو وامشو بهالوقت .. طيب اللي يأكل سكر بالليل ايش بيصير له .. اقول له يا شماتت ابله زازا فيييك .. السكر بيتخزن بالوئت دة .. f*
وحتكون كاارسه وربناا ع المفتري .. طيب يعني وش السوات ؟؟
.. يعني كلو وانبسطو بالنهار .. وكفى الله المؤمنين شر القتال
حددو في هالعلم .. ان المهم انك تأكل كل 4 ساعات .. بدال ما تاكل كل الوقت .. الا تبيه .. الا بيبسي .. وشيء يروح وشيء يجيء ..

حددو ثلاث اوقات .. وايش تاكل فيها ..

اول فترة بالصباح .. العلماء راهنو على السكر .. :)

يقولون ان نسبة السكر تنقص في الدم ولا زم نعيد التوازن ومدحو وقت الساعه 7 قالو افطروو فيهاا .. وكثروو سكرياات لان الجسم بيحتاج للسكر علشان الطاقه .. ودهون .. وكمان بروتين .. يعني يكون فطوركم .. كورن فليكس مع حليب .. وممكن بيض او فول للي وده يتنح (الله يديم النعمه)..

الساعه 11 الضحى .. يكون بنزينكم قل شوي .. فحلو انك تأكل شيء خفيف يساعد لما وقت الغداء .. مثلا .. إشربو كاسة عصير .. فيها شويه عسل او سكر .. او كلو تفاحه (أتخيل شباب وبنيات من الساخر من ال رايحين العمل اللي بموزه والثانيه بتفاحه وزنجبيل يقشر افندي ههههههه عاد غصون الصوت جايبه معها سلطه فواكه)


المهم الحين .. روقنا ورجع بانزين جسمنا شوي .. :)

يجي وقت الغداء .. الله .. برياني بالدجاج .. والا مفلق ربيان .. ونااسه .. وهم حسبو افضل وقت للغداء .. بين الساعه12 ووحده الظهر .. ومدحو السمك لان الدهون فيه قليله .. طبعا احنا يغيب عن بالنا انه بهالوقت بتكون درجه حراره الجسم منخفضه شويتين .. يعني ارتفااع في معدل التفهي .. فـ ازين شيء تسوونه .. ما تكثرون دهون علشان ما تتلبك المعده .. ويضيق الخلق .. ونصحوكم وقالو .. يا اهل الساخر .. كثروو مويهه << جدتي على غفله :)

عااد انا شرهت عليهم .. قلت الحين بتجوعونا وتخلونا الى العشاء ما ناكل شيء ... قالو ولا يصير خاطرك الا طيب
قلت لهم وش بتحطون لي عصرونيه .. مدحو لي .. كوب حليب شوكلاا سااخن .. والا قطع تشوكليت .. فاكهه للي بيسون ريجيم ..بس قالو لا تكثرون والا بتنتفخون f*

اخر وجبه هي العشاء .. افضل وقت للعشاء حطوه الساعه 8 .. ووصّوناا بعشاء خفيف مررره .. ما فيه دهن ولا دسم .. علشان نرتاح بنومنا .. وتختفي احلامنا المزعده

بس قبل لا أختم كلامي عن الغذاء والتغذيه .. حابه اقول لكم عن اعداء الغذاء
انك تاكل بسرعه .. ولا تشرب كثير .. وناكل اكل دسم .. هذي اعداء الغذاء الثلاثه ..:)

طيب فرضا فرضا .. فيه وحده ودها تسمن .. وفيه واحد وده يضعف (تسمع بالعنصريه) اكيد ودكم تعرفون الوقت اللي يناسب واللي بإذن الله يساعدكم على ريجيمكم ودبدبتكم ..

أفضل وقت للسمنه ..عطانا علم الكرنوبيولوجيا اوقات تخزين السكر بالجسم .. فمثلا .. في الشتاء يكثر النحيف بينات بتر مثلا ومربي .. يكثر سكريات ودهون علشان يسمن .. لان الجسم في الشتاء يخزن السكريات والدهون.. مثلا بشهر april تكون نسبة افراز الانسولين قليله يعني معدل حرق السكريات قليله بعد .. فممكن نستغل هالفتره بالاكل ..

طيب واللي وده – ها تضعف .. يقولون انه غلط نعتبره بالصيف يعني على غرار (احلى يا غرار ) حركتنا لما قلنا نبي نسمن .. لا لا يعتمد هنا على افراز هرمون ثاني ...
اسمه دوبامينDopamine وهالهرمون .. يكون قوي بالجسم .. بشهرين اللي هم March & February يعني بهالفتره .. نقلل دهون .. علشان الجسم يحرق الدهون اللي بالجسم .. ونخفف سكر كمان ..

ايضا تكلم الكتاب عن


الانشطه الفكريه

.. يعني متى يكون افضل وقت للمذاكرة والتركيز ..وأفضل وقت للرياضه وكمان اغلب أوقات الحوادث المروريه . اللي يكون فيه التركيز لكم عليه .. وافضل اوقات العطلات واوقات الحب .. والعلاج بالوقت اخيراا.. :)
ودي من جد اكتبها ..f*
لكن قلت اشوف رايكم بالموضوع
وإن جاز لكم واعجبكم نزلت جزء ثاني .. اهم شيء رأيكم .. :)




و تح تح تحياااتي :)

فوشــي
26-05-2003, 11:53 PM
ياهلا وغلا..هدوءءءءءءءءءء..
وش هالمعلومات الزينه....انا قريت ان القيلوله تسبب الخرف المبكر...
وأن احسن نومه هي نومة الذئاب.:fff: .وأشهر واحد ينام هذه النومه كان تشرشل..
:
نبي الجزء الثاني ولا عليك أمر...وكثري من(على غرار ) :D:

:


تحياتي لك اختي هدوءءء..ويعطيك العافيه :kk

سمسمه المسمسمه
27-05-2003, 07:09 PM
توكلي على الله :D:

<< جـــــاز لها الموضوع :p

تش تش تشكراااااتي ;)

فينيسيا
27-05-2003, 07:38 PM
معلومات راااائعه هدوء :)

وأكيد اننا بانتظار الجزء الثاني ..
لا تتأخرين علينا ;)


يعطيك العافية هدوء
:)

دايم الشوق
27-05-2003, 08:57 PM
بين نسيتي تكتبين من الساعه كذا الى الساعه 3 تحت بند __ القيلوله

وعجلي بالانشطة الفكرية خاصه جاء وقت الاختبارات وياليت لو الخطاب يعم
يعني مايخص جنس النساء فقط :)

واخيراً تقبلي تحياتي وشكري لما كتبتي

هدوء
30-05-2003, 03:06 AM
فوشي
سمسمه المسمسمه
فينيسيا
دايم الشوق

.. شكرا لكم .. وطلباتكم أوامر :p





دايم .. من الساعه 12 الى 3 بعد الظهر .. شكرا .. يا أزرق اليمامه .. على التنبيه:)

هدوء
30-05-2003, 03:19 AM
وهذا الجزء الثاني ..
ان شاء الله يكون احلى واخف من اللي قبله ..

حكينا في الجزء الاول عن النوم والتغذيه .. هالمره نبي نغير شوي .. نشاطاتنا الفكريه والوقايه من الحوادث .. وافضل اوقات العطلات .. والحب

النشاطات الفكرية

اثبتو اللي بالكرنوبولوجيا ان اقدراتنا الفكريه ماتتغير تقريبا .. تاخذ شكل واحد دائما .. مثلا احنا بوقت دراسه وامتحانات الحين .. كل شخص فينا له وقت محدد ممكن انه يركز فيه مثلا ..انا ما اروق واركز الا ليلا " تقل خفاشه :D: " وغيري لاا.. العصر عقله مفتح ويخلص عالعشاء .. اختلاف وقتنا شيء طبيعي .. وفيه معطيات لازم ناخذها بعين الاعتبار علشان نقدر نكون فعالين اكثر

مع ضغوط العمل .. والتعب .. ومع حياتنا الروتينيه اذا ما قدرنا نسوي شيء على اكمل وجهه قلنا (روتين .. ملل .. ما غيرنا جو ..) اجوبتنا .. يقولون عنها العلماء .. عاديه .. لكن احنا غفلنا عن شيء مهم .. بتقولون ايش هو ؟؟
اقول لكم احنا ما نعرف وش هو الوقت اللي احنا نكون فيه فعالين ومتحمسين ع الاخر .. علماء النفس جلسو يراقبونا لمدة قرن .. وبفترة الستينيات .. اكدّوا ان قدراتنا الذهنيه تاخذ شكل محدد كل يوم

تمشي بخط تصاعدي الى الساعه 8 بس فيه معدل هبوط بسيط وهو فتره بعد الغداء (حيث ترتفع نسبة الدلاخه:D: ) – ومن ملاحظاتهم ان قدراتنا الذهنيه وحرارة جسمنا بينهم علاقه طرديه يعني فيه بينهم ترابط – تبون تقولون لي ما فهمنا (بيني وبينكم حتى انا ما فهمت وش كتبت :D: ) مثلا كل ما ارتفعت درجه حرارة جسمنا طبيعيا يعني مو مرض لا قدر الله تكون عقولنا مفتحه ومستعدين نحفظ ونركز .. بعكس لو كانت درجة حرارتنا منخفظه ونتنافض .. لاننا بنكون نايمين ومالنا خلق لشيء ماودّنا نفتح عيونّا حتى

تكلم الكتاب عن كم نقطه صغيرونات

-اللي يصحون بدري يبدأ معدل تركيزهم ينخفض آخر النهار .. والعكس ..

-مدحو لنا النوم يقولون انه يضمن لنا ان احنا نكون فعالين .. شلون ؟؟
يعني اللي ينام عدد ساعات اقل .. تكون قدرته في التركيز و انتباهه منخفضه نسبيا.

-الفطوور مهم جدا جدا .. وطلبو انه يكون متوازن .. وجابو دليل انهم لما يخلون اللي يشتغلون يفطرون ..
انخفضت نسبة حوادث العمل الى 50%

-نقطه مهمه جدااا .. مهما يكون الشخص ذكي ومفتح مخه .. اكيد بيفهم شيء بنفس عمره .. مثلا اللي عمره 5 سنوات ما يقدر يفهم شيء يناسب عمر 12 وهكذا دواليك
هالنقطه بنتطرق لها وبتوسع في شرحها وسأسهب .. في ذلك:D:

يــوم العـمـل المثـالـي

مثل ماقلنا فووق فيه اوقات نقدر نحفظ فيها واوقات يكون معدل التركيز عالي ونفس الشيء معدل اكتساب معلوماتنا يكون مرتفع .. مع ملاحظة ان الناس متكيفين على نفس النمط مع اختلافات بسيطه

الصبــاح

مقوله " المستقبل للذين ينهضون باكراَ" مقوله مايعترفون فيها الكرنوبولوجيين .. مع اني ضدها لان فيه حديث للرسول اللهم صلي وسلم وبارك عليه
"بورك لامتي في بكورها"رواه أبو يعلى والطبراني.. يقولون في بحوثهم ان 5% بس اللي يكونون نشيطين (مهيب داخله راسي هالفكره لان الحديث يقول عكسهم واكيد الرسول ما ينطق عن الهوى) نكمل موضوعنا شكلي شطحت .. ركزو ع الوقت اللي من 9 – 12 تكون الذاكره الفوريه تمام التمام واحسن من وقت بعد الظهر .. فيه دكتور اسمه – فولكارد – قال ان القدرة ع التحليل والاستنتاج افضل وقت هي الصباح (وانا اقول ليش كل حصص الفيزياء بـ اول الصباح علشان الاستنتاج يجي صح:D: )
- القيلوله .. شرحنا عنها بالجزء الاول ~~~> منيب عجازة أبدا ابد:D:

بعد الظــهر

وقت النشاطات الذهنيه .. نشاطاتنا تبدأ تزيد مابين 2 الى 3 هالفتره تكون افضل فتره بالنسبه للي يصحون متأخر شوي .. لانهم يتعبون ع الساعه 8 اما اللي يصحى من اول النهار يبدأ يتعب ع الساعه 6 .. ومن ملاحظاتهم المهمه .. ان الماده او الاختبار اللي بيعتمد على ذاكرة طويله الامد افضل وقت يكون بعد الظهر ..

المســـــاء

مو قالو ان قدرة التركيز والتفكير تقل من بدري ...تصدقون قبل النوم تكون ملكه الحفظ مرره عاليه
والطريقه السليمه .. انكم تخصصون وقت قبل النوم تحفظون فيها اللي تبونه .. وبإذن الله بتتفاجأون بنتيجه حفظ ماقبل النوم
.
.
.
.
نجي .. لـ نماذج الذاكرة و هي نوعين ..

القصيرة الأمد

هي اللي تحفظ المعلومه لوقت قصير مرره .. ممكن نحفظ رقم ..بعد نص ساعه نسيناه بااح )k

الطويلة الأمد

تحفظ المعلومه لوقت طويل وطاقتها غير محدوده .. مثلاً: جداول الضرب او مثلا الاناشيد اللي حفظناها واحنا صغار الى يومكم نذكرها والا ؟؟



النشاط الذهني لدى الاولاد

هالموضوع شوي طويل .. بحاول اختصره قد مااقدر .. لاني مهما بكتب عنه احسن لي اكتبه كله ... فـ باختصره بكم نقطه

قسمو اعمار الاطفال لفئات

الاولى : الاطفال اللي تتراوح اعمارهم مابين 6-8 عندهم ساعتين الى ثلاث ساعات انتباه والباقي دجه

الفئه الثانيه : 8-10 << نسبة التركيز والانتباه عندهم 3 ساعات باليوم

الثالثه : من 10 -12 سنه ممكن 4 ساعات

والمراهقين من 12-16 سنه عندهم .. 5 ساعات تركيز وانتباه

فشددو علماء الكرنوبيولوجيا .. على شيء وهو .. ان لازم مانعطيهم دروس ومواد تحتاج تركيز لمده اكثر من الوقت اللي هم مستعدين فيه .. وشددو على ان يكون فيه رياضه بين الدراسه

وافضل وقت للانتباه عند الاولاد .. بعد الظهر .. لان الذاكره الطويله الامد (تكلمنا عنها فوق:D: ) تكون مستعده للحفظ

نقطه مهمه :: ان اطفال الفئه الاولى مايقدرون يركزون اكثر من 15 الى 30 دقيقه .. تلقونهم شوي يسرحون ..
اما الفئه الثانيه 8-10 سنين .. ممكن يركزون حتى 40 دقيقه ..
والاكبر منهم حتى ساعه الا ربع

ومهما مهما تكون امكانيه التركيز .. الا انه كل 20 دقيقه لازم سرحان لمده 3 دقايق الله يعيين المدرسات والمدرسين (يشوفون تحف:D: )

عطل افضل توزيعا ..

وزعو العطل ماقصروو بعد حسبو ان كل 170-180 يوم دراسي او عمل .. لازم يكون فيه 110 ايام عطله غير الخميس والجمعه.. راح اتكلم عن العطلات تحت شوي

خمس نصائح حتى نساعد اولادنا لـ *يعيشو حياة أفضل*

+ نحترم ونقدر حاجتهم للنوم .. نسمح لهم يقيلون .. وبايام الخميس والجمعه يسهرون

+اكثر الاطفال مايحبون يفطرون .. فلازم نساعدهم بوجبات تنفعهم ان شاء الله وتعطيهم طاقه

+نهتم بالعطلات .. حتى نجدد نشاطهم وحيويتهم ..

+كل ماكانو اطفال صغار .. لا نشدد عليهم باوامر ونواهي .. بالعكس نعطيهم فرصه يلعبون وينبسطون .. لانهم اكيد يحبون اللعب

+شجعوو الرياضه .. السباحه .. او طلعه للبحر .. ويـ اهل الرياض البر البر .. والاستراحات ..لان النشاطات الرياضيه تساعدهم في تخفيف التعب ..وزياده التوازن


افضل العطلات

العطلات .. ياهي وسيعه صدرر.. :D:

الشتاء تكثر فيه الامراض .. وسبحان الله .. ترتفع نسبة الوفيات .. يعني تكون امكانيه مرض الجسم مرتفعه .. ليش .. لان النهار قصير ف بيكون الضوء قليل .. والضوء سبحان الله مهم .. بعد الله في دفع المرض .. الكرنوبولوجيا .. ينصحون باخذ الاجازه بالشتاء .. والصيف يسمونه الفصل المثالي للنشاط الرياضي

معلومه مهمه عن الشتاء .. يقولون ان كان فصل الشتاء يخلي الاغلبيه كئيبين .. فان فيه 15% منهم محبطين بشكل كلي .. ويطلع علييهم(نعاس // نوم سيء // مزاج حزين // توتر// ياكلون كثير // افكار تخوف –نازيه يمكن -// افكار انتحار ...)
وكل هالعوارض والبلا .. لانهم ما يتعرضون للشمس ..

معلومه اعجبتني :

ضوء الشمس .. يؤثر على شبكيه العين .. فيساعد في افراز هرمون اسمه-الميلاتونين- يتحكم في وظائف كثيره .. ومنها دورة (اليقضه –النوم) فاذا قصر النهار .. وماشافو الشمس كثير .. يتكدس هالهرمون .. ويسبب الاضطرابات .. ويتعكر النوم ..

افضل اوقات العطل للاولاد ..

الاطفال يمرضون وقابلين للكسر بسرعه .. والاجازات القصيره ماتخلي الاطفال يمديهم يسترجعون صحتهم او نشاطهم .. فحلو تكون فتره الاجازه 3 اسابيع ..
اللي ينصحون فيه الكرنوبيولوجيين .. ان الاجازه حقت الشتاء والربيع تطول .. وتنقص من اجازه الصيف

الوقايه من الحوادث

اغلب الحوادث مو صدفه .. بتقولون كيف ؟؟ .. مو احنا تمر باجسامنا فتره نكون فيها مو مركزين وعوامل الدلاخه والخنبقه في اعلى درجاتها ..)k
و الجمله العلميه : ( ان اليقضه وردة الفعل ومستوى التركيز يكون منخفض نسبياً) هذي هي الفتره اللي احنا مستعدين نطيح .. نتكسر .. ونصقع بخلق الله

مراحل الخطر عند البالغين

اغلب حوادث السيارات واغلاط المصانع والحرائق اللي تصير دائما (منتصف الليل ).. من الساعه 12 الى 6 الصباح والوقت الثاني باليوم يكون مابين الساعه 12 الى 3 الظهر .. وما ننسى ان الشخص البالغ .. كل 90 الى 110 دقائق ينخفض معدل تركيزه ويسرح 5 دقائق
بينما مراحل الخطر عند الاطفال .. فأنه تكثر حوادثهم المنزليه حوالي الساعه 11 الى تقريبا 2 ويرجع معدل نشاطهم وتركيزهم من 4 الى 6 المساء

الحب ..


الفصل اللي مخصصينه بالكتاب كله صفحتين .. لما لخصته طلع سطر

وهو ان الرجال يفضل فصل الخريف والمرأه تفضل فصل الربيع .. )k

اتمنى انكم قضيتو وقت حلوو



تح تح تحياتي ~~~> نمبر تو :nn

دايم الشوق
31-05-2003, 11:07 PM
جميل جميل

لكن ثقافتي ماساعدتني في فهم شيء او كلمه او حاجه زي كذا وهي : الكرنوبولوجيا alhilal

يمكن درجه الحراره سببت بعض الدلاخة :) حسب كلامك ..!

...... اعجبني تلخيصك للحب اكيد هذا حَب وليس حُب :)


تحياتي

فوشــي
01-06-2003, 12:23 AM
مشكله الدلاخه..
واعتقد انها من كثر التسدح عند التلفزيون ..والعب البلاي ستيشن.
.وأكل الشبس :fff:
:
هدوءءءءءءءء.:kk ..
موضوعك رائع..ويعطيك العافيه.

بس لاحظي الكلام الى عن فصل الشتاء..اعتقد يناسب الأوربيين اكثر..
ولا احنا 15 شهر بالسنه.....كلهم صيف :D:

فينيسيا
05-06-2003, 03:35 AM
<--- ذاكرتها قصيرة الأمد f*


الف شكر لك هدوء
:)
:kk

هدوء
10-06-2003, 05:30 AM
دايم الشوق
فوشــي
فينيسيا


:p

لاعدمتكم :nn

غصون الصوت
11-06-2003, 02:58 PM
هدوء
يعطيك العافية :kk
ذكرتيني بمحاضرة الثقافة الصحية
وأنا جالسة كذا <-- f*

ابتسامة
12-06-2003, 02:24 AM
روائع هدوء.....بوركت الجهود...

هدوء
12-06-2003, 06:33 AM
غصون الصوت
ابتسامة الجرح

يامرحبا .. بالمديرتين .. :p



.. أشكركم على التشجيع *d

عبدالرحمن
15-06-2003, 11:24 AM
...

- هل أنت مرتـــــاح ...؟
- نعم ..!!



شكرا على المعلومات ..:)


عبدالرحمن

صمت الرماد
18-06-2003, 06:23 PM
أختي هدوء
موضع رااااائع ومفيد00
ومشكوره على المعلومات الحلوه00

وننتظر المزيد

نبضة_قلب
14-09-2005, 01:27 AM
موضوع ممتاز جدا جدا ...... يعطيك العافية ... و في انتظار المزيد