PDA

View Full Version : المـوعــد فـــــات .. !!



الفيلسوف
17-11-2000, 11:16 PM
<FONT COLOR="Yellow"><FONT size="5">مدخل /</FONT s></FONT c>
جميل ان تكون صادقا مع نفسك ولكن الاجمل ان تكون صادقاً مع الاخرين في مواعيدك .
حكمة فيلسوفيه ( على وزن حكمة اغريقيه )

كان للوالدة – أطال الله عمرها في طاعته – موعد لمراجعه مستشفى الحرس الوطني، ذلك المستشفى العملاق بامكانياته، الرهيب بطاقمه ودكاترته، والذي أكثر ما يسيء له هالبني المتكشفات، من الدكتورة لعاملة النظافه، وكان الموعد في الساعة 11.5 ( الحاديه عشر ونصف للي مايعرفون الحساب ) ، ولاني كنت مشغول وقتها فقد تأخرنا عن الموعد ربع ساعه . . نزلت الوالدة واختي عند بوابة المستشفى وحرّصت اختى وقلت لها: ترا استراحة النساء في المدخل على اليسار انتظروني فيها وانا ابروح اوقف السياره، نزلتهم ورحت اركن العربيه ( الله اكبر يامدحت ) ثمن رجعت بسرعه وانا امني النفس بلحاق الموعد، وطيران على استراحة النساء وأصوت : يافلانه (ما ودي اقول اسمها لانه عيب عندنا ذكر اسم الانثى) . . يأم فلان (الاوله اسم اختي والثانيه اسم الوالده) ولا أحد رد الصوت الا عجيّز ردت وقالت بصوتها العجائزي الرخيم : (ماهنا أحد) . . وتخيلت شكلها وهى جالسة على الكرسي . . مقطع أحمر منقط بنقط صفر، ولابسه – تكرمون – نعال خضر بلاستيكيه، ياحبيله والله انها عندي تسوى الف من هاللي يستعرضن ببناطيلهن وملابسهن الضيقه والقصيره، والعبي الفرنسيه والكابات والغطاوي اللي يهفهف بهن الهواء اذا مشن (لا تشكون بي تراي ما أعرف هالامور بس اسمع بها ) لا والكعوب اللي يالله لك الحمد كنهن مرابيع خشب من رفعهن . . المهم ما علينا . . ارجع لسالفتي ، عقب ما ناديت ولا رد علي احد في الاستراحة الاوله، قلت مابدهاش الحق عمرك للاستراحة الثانية اللي عند المدخل الرئيسي على اليمين .. وأعض شليلي واروح هناك وانا أناظر الساعة ليش مستعجل!! أحم . . أحم ، خايف ان الوقت يتأخر علينا ولا نقدر ندخل على الدكتور، وصلت للاستراحة الثانية وأنادي بصوت مرتفع يافلانه –اختي- يا أم فلان –الوالده . . ما أحد رد واكرر النداء (الله اكبر يا مذيع مطار الملك خالد الدولي على غفله) وبصوت مرتفع اكثر ماجاوب احد، تذكرت ان فيه استراحة ثالثة للنساء في الداخل عند الاسياب الداخليه، أكثر ما بها لمستشفى استراحات النساء، ياحبيلهم يحافظون على بناتنا من التبرج والسفور وبني المستشفى وطاقمه رووسهن مصمصعه كنهن معزا . . ماعلينا . . وصلت للاستراحة ونفس اللي سويته عند الاستراحة الثانية بديت اصوت واقول : فلانه – أختي ـ يا أم فلان ــ الوالده (ايه يخوي عرفناهم من قبل) ، مارد احد ، كان عند الباب وليد صغّير عمره 5 سنوات، قلت له ادخل ونادي : قل فلانه – ام فلان ، قعد يناظرني مستغرب من كلامي ، حسيت من نظراته انه يقول : عيب عليك رجال كبير وتقولي هالكلام!! ما تخاف على محارم الناس؟! . . طيب يا هالصيغنون انت واقف بالباب وتقز، ياتدخل يا تطلع!! المهم البزر مشى كلامه علي وطنشني، احر ماعندي ابرد ماعنده، من القهر بغيت اخذ وحده من هالممرضات الفلبيبيات اللي يمرن بالسيب واكمخه بها . . قمت اصوّت بصوت مرتفع على نفس الاسماء السابقه (ماودي اقولهن شكلي مسختها) ولا رد أحد . . قلت بيني وبين نفسي، يمكن وقت مروري على الاستراحة الاوله كانوا بالطريق لها وتوهم يأصلونها . . ازرق لاستراحتك الاوله ولا يجي الا العافيه، وانطلق وانا اسابق الريح خايف ان الموعد يفوت ، وصلت وبديت اصوت وانادي يافلانه – يا أم فلان (عودنا على طير ياللي) ما جاوبني الا صوت الحبيبه العجّيز، ياحبيله والله اني تعبتها معي وغثيتها ، ردت وقالت ( ما هنا أحد ) وشكلها تقول بينها وبين نفسها : وقسم بالله لو يرجع مرة ثالثة لا الحقه واحد من هالكراسي (حشا هذي هوك هوقن مهيب عجيّز طايحه) . . قلت ياولد مر العيادة وشف الوضع ، وطيران على العيادة ، وصلتها والقا الوضع هاديء والامور مستتبه، واشوف الدكتور يرتب الملفات ويقلبها بين ايديه (هذا موظف ارشيف مهوب دكتور) واسلم عليه وافهمه السالفه . . وطلع حبيب لأخر درجه ، قال لي : خلاص انا ابنتظرك وعجل لا تأخر!! أحم .. أحم ، رح جب والدتك وبأكشف عليها، يعجبونك بعض الاطباء متواضعين وكلامهم لطيف، بعكس حقين المواعيد اللي الواحد منهم راز خشيمه ويناظرك بنص عين، ويالله يكلمك ، يحلفون وكيل وزاره بس ناقصه كرسي دوار وبشت . . ماعلينا . . انا يوم سمعت كلام الدكتور تفاءلت وقلت فعلا الدنيا لا زالت بخير، والطيبين موجودين ويعجبونك وقت الزنقات (وين يالاخو شكلك تبي سلف من الدكتور ووافق يعطيك) ، واركض للاستراحه اللي عند المدخل، وقلت اخر مره لعل وعسى، وصلتها وقمت اصايح بصوت مرتفع واقول يا فلانه يا أم فلان . . ردت علي . . وياليتها ما ردت!! . . تدرون منهي؟! . . صاحبة الصوت الرخيم . . كني بها جالسه تسبح وتهلل وأنا ودميجتي قطعت عليها خلوتها مع نفسها ، ردت وقالت عبارتها المشهوره ( ما هنا أحد ) .. حسيت من نبرة صوتها، ومع كل حرف من حروفها انها ردت بنزر. . كتمت ضحكتي وقلت : الله يجزاتس خير . رجعت للدكتور وانا اجر اذيال الخيبه والفشيله (واحد كبير ومضيع امه بمستشفى) وقلت له : ما لقيتهم يا دكتور (الله يخلف صرت كني مضيع بزر من بزراني بملاهي والا بسوق) قال الدكتور : هي وش اسمها؟ قلت فلانه بنت فلان (صحيح هي كبيره بالسن بس ولو ما نيب كاتب اسمها) قلّب الملفات اللي بين ايديه وطلّع واحد منهن وقرأ له كم ورقه فيه، وبعدها طمنّي على حالتها وقال : حالتها طبيعيه ولا تحتاج اشوفها او افحصها (هذي اخرتها ياقليل الخاتمه .. طبعا قلتها بيني وبين نفسي) . . وتابع كلامه وقال : خلها تستمر على العلاج، وجدد الموعد بس . سحب الدكتور حقيبته (وين طالب بالابتدائي) واتجه للسيب، وطلع من العياده ، وأنا انطلق وراه وأسأله كم سؤال عن الحاله، وهل ممكن تأخذ أشعه زياده؟ وهل تستمر على العلاج السابق؟ . يحلفون وأنا أمشي معه بالاسياب بين المراجعين الجالسين اني استشاري جراحه يناقش زميله في حاله من الحالات ، وما دروا اني أنا ودميجتي مضيعن اميمتي واخيتي بالمستشفى . . رجعت وأنا اقول لنفسي : الموعد وفات ، لكن المشكلة اللي انا فيها الحين وشلون ابلقى اميمتي واخيتي بهالمستشفىالكبير العريض؟!! ووشلون ابتعرف عليهم بين هالحريم المتغطيات؟؟!!
صراحه وقتها جاني شيطاني وقلب رويسي بافكاره ووساوسه وقال: شفت . بسبب هالغطاء اللي على وجيه حريمكم فات موعدكم؟ ولا دخلتوا على الدكتور؟ يعني وش فيها اذا صار حجاب والوجه طالع؟! كان الحين انت عرفت اهلك وعرفوك بدل ما أنت بهالاسياب طردي رايح جاي تقل داخل سباق اختراق الضاحيه يا سعيد عويطه . . خلوا حريمكم يتمتعن بالحياه ولا تعقدون المسأله . . صراحه هزني كلامه وربشني زيادة على ربشتي . . التفت عليه وقلت يالخسيس ما بقي الا هذي، خسئت وخسأ قولك يا ملعون، ما بقي الا خواتنا وبناتنا وامهاتنا تبي تخليهن مثل غيرهن مزبله لكل قذر يجيء يبول فيها ويمشي!!
فكرة الملعون ذكرتني بأحد المستصحفين راعين الاقلام التايوانيه، اللي اقترح اقتراح مثل وجهه يوم كثرت حوادث البنيات الصغار، طالبات المدارس، اللي تعلقت عباياتهن ببيبان الباصات، اقترح الشين اننا نخلع عنهن تلك العبايات والتي بسببها فقدنا الكثير من بناتنا!! وما فيه داعي لتربيطهن بها!! . .ومادرى المغفل باننا قبل نربطهن بالعبي ضربنا حولهن سياج عن نظرات الشهوانيين والفضوليين، وغرسنا في عقولهن وقلوبهن العفة والحياء والحشمه، واللي يحفظهن بعد الله من الفتنة والشر .
كل هالكلام السابق دار في ذهني في ثواني معدوده وانا امشي بالسيب ادور اميمتي واخيتي . . وفجاءه . . (بدون موسيقى تصويريه) حانت منى التفاته ورايتهما واقفتان لا يلويان على شيء (وراء حتسيي تغير) ، واروح لمهن واقول وين الناس؟! بدري؟! . . واستفسر منهن عن السبب واثرهن الضعيفات بدل ما يروحن لعيادة 5 راحن لجناح 5 حق المرضى المنومين، وبين العياده والجناح 5 كيلو . . قلت مشينا . . وقفلنا راجعين ولكن بعد ان فات الموعد !!

===============
** الفلسفة ان تكون انت لا ان تكون غيرك :) :)

booo
17-11-2000, 11:37 PM
هيق هيق هيييييييق
لا يخلو كلامك من الغمز ;) والمز (مشكله ملها صوره ) :) :) :) يمكن تصير هذي <IMG SRC="http://www.alsakher.com/ubb/smilies/cwm32.gif" border=0> اهم شئ قصه رائعه واسرد اروع ولكن انصحك انك تعرض القصه على طاش ماطاش :) :) :)
&lt;&lt;&lt;&lt;تراه يمزح :) :) :) :)
اهم شئ انك حصلت مميتك وخيتك والله يحفظهن لك اللهم امين :) :) :) :)


------------------
كن سعيداً كلما كثر حسادك .. فهم الشهادة لك بنجاحك

جمانه
18-11-2000, 12:11 AM
السلام عليكم ........
ايحاء جميل بالوضع الراهن للمستشفيات ........من الممرضة حتى الدكتور...هذا مع تمتعنا بالسرد الجميل للاحداث

------------------
سبحان الله وبحمده ... سبحان الله العظيم

الفيلسوف
18-11-2000, 03:29 AM
اخوي booo / اشكر لك ردك الطيب .. اخاف اعرضها على حقين طاش ماطاش ويقومون يزيدونها من بهاراتهم اياها وتطلع مالغه مثل ملاغتهم وسماجتهم .
وبعدين الظاهر انك تقصد الوجه هذا<IMG SRC="http://www.alsakher.com/ubb/smilies/cwm1.gif" border=0> حق الغمز واللمز .

الاخت جمانه / الشكر موصول لك ايضا لطيب الرد .


==========
الفلسفة ان تكون انت لا ان تكون غيرك :) :)

<FONT COLOR="#800080" SIZE="1" FACE="Simplified Arabic,Verdana">تم تحرير الموضوع بواسطة الفيلسوف بتاريخ 17-11-2000 الساعة 03:33 PM</font>

سحيله أم الخلاقين
18-11-2000, 04:34 AM
الله يهديك ذكرتني بتكسيرة الرجول اذا رحنا نزور احد بهالمستشفى الله يا اسيابه طــــووووووووويــله
يعطيك العافيهبس عساكم دخلتو على الدكتور في الموعد الثاني

------------------

جوري
18-11-2000, 05:52 AM
<FONT COLOR="Red"> سكراً اخوي على هذي القصه والله مره انسجمت معها لدرجة اني قريتها كلها</FONT c>
<FONT COLOR="Blue"> لكن انا اقول الشرهه مب على امك ولا اختك عليك انت لو انك وقفت السياره ونزلتهم معاك كان ما صار اللي صار ودخلتوا على الكتور في الموعد المحدد وبعدين انا رحمت امك مشت كل هالمشوار</FONT c>

------------------
مثل صيني(ان لم يكن معك سوى درهمين فأشتر بأحدهما زهرة )

الفيلسوف
18-11-2000, 05:58 AM
الاخت/سحيله ام الخلاقين . . فعلا اسياب هالمستشفى بشكل طولي وافقي مهوب مثل المستشفيات الثانيه اللي على شكل راسي يعني ادوار فوق بعض،انا اتوقع انهم ماكانو مخططين يحطونه مستشفى .
المشكله اذا كانت العياده اللي تراجع فيها باقصى وادرين يبيلك تمشي كيلو لين توصل للدكتور :( .


===========
الفلسفة ان تكون انت لا ان تكون غيرك :) :)

mr_mosta7el
18-11-2000, 08:54 AM
الفيلسوف
اهنيك على اسلوبك و روعة كتابتك
يا اخي ماشاءالله عندك قدرة تصوير رهيبه كني قاعد اشوفك و انا اقرأ موضوعك بين هالاسياب

الفيلسوف
18-11-2000, 02:18 PM
الاخت/ جوري
المعذره لعدم الرد عليك، لاني يوم ارد على سحيله كان ردها هو الموجود فقط .
انا ودي اروح ووقف السياره وانزلهم معي لكن يوم قارنت بين مواقف السيارات والعيادات من حيث المسافه لقيت انهم ينزلون ويروحون للعياده اقرب من المواقف اللي طولها عشره كيلو، ويمكن يجي الموعد الثاني وهم ما وصلوا للمستشفى من بعد المواقف :(
عموما شكرا على الرد .
الاخ / mr_mosta7el
اشكرك على هالكلام الطيب، والمدح الزايد واللي يخلي الواحد يبحث دائما عن الافضل والمفيد في كتاباته :)


==========
الفلسفة ان تكون انت لا ان تكون غيرك :) :)

gw6e
18-11-2000, 03:32 PM
يا الفيلفسوف ما شا الله عليك مثل ما قال
مستحيل ما شاء الله عندك قدره على التصوير خياله
حتى انا حسيت كني اشوفك وانت تدابك فالاسياب

النشمي
18-11-2000, 10:21 PM
يكفين من موضوعك ..... (( ومادرى المغفل باننا قبل نربطهن بالعبي ضربنا حولهن سياج عن نظرات الشهوانيين والفضوليين، وغرسنا في عقولهن وقلوبهن العفة والحياء والحشمه، واللي يحفظهن بعد الله من الفتنة والشر .))

بارك الله فيك وحرم جلدك عن النار يالاجودي



------------------
اليوم عمل بلا حساب ... وغداَ حساب بلا عمل ... فاغنم يوم عملك ليوم حسابك

الفيلسوف
19-11-2000, 03:39 AM
الاخ او الاخت/gw6e
اشكر لك ردك وكلامك الجميل ..
عسى اللي حصل لي مايحصل لك . . والله ياهو دبكي بهالاسياب كن عندي حالة طواري وجايبن واحد مفلوق :) .
اخوي النشمي :
هلا بالحبيب الغالي .. وش دعوى يخوي بس العباره هذي هي اللي اعجبك بموضوعي؟!!
وتمتير الاسياب والزعاق اللي قطع حنجرتي .. ومحطنا عقب ثلاث شهور للموعد الجديد، ماله اي اعتبار عندك؟!!
عموما مشكور على ردك :)


===========
الفلسفة ان تكون انت لا ان تكون غيرك :) :)

mosarq3 alkhobar
19-11-2000, 04:14 AM
موضوعك اكثر من رائع واسلوبك اروع واروع .....يخلط بين الكوميديا والواقعيه وهذا اللي يسمونهم الكتاب الساخرين :)

تحياتي لك يا الفيلسوف ولا تحرمنا من هالمواضيع الرائعه وابنتظر اكتمال الردود في هالموضوع :)

وثاني مره لا نزلت امك واختك انزل معهم ولا تورط عمرك

هههههههههه يا حبي للعجز (مهناش احد) :)

------------------
انا ماني يهودي ولا مشرك ولا عربيد.......انا اللي لاغلط تجهم وجهه واقلقه ثوبه

MajNoOoOoN
19-11-2000, 05:06 AM
<center><FONT COLOR="Red">مب الشرهه عليك و لا على فلانه – أختك ـ يا أم فلان ــ الوالده الشرهه عليك انت وراك متأخر لو انك جاي بدري و ماخذهم من البيت و قايل لهم انزلوا هنا الحين اجيكم و تاخذهم للموعد مب ازين لك من انك تلاحق عصاقيلك بالمستشفى .....ولا ؟؟؟</FONT c></center>
<center><FONT COLOR="Red">بس الظاهر انك(ما هنا أحد) كخخخخخخخخخ</FONT c></center>
<center><FONT COLOR="Red">و الله اهنيك على السرد الحلو للموضوع يدل أنك معيد في كلية الزراعه قسم فطريات و بكتيريا </FONT c></center>
<center> :) :) :) :) :) :) :) :) :)</center>

الفيلسوف
21-11-2000, 02:57 PM
هلا بمشرفنا العزيز mosarq3 alkhobar
اشكرك على هالرد اللي يرفع المعنويات، ويخلي الواحد يأمل انه يكتب لكم شيء مفيد وفي نفس الوقت ساخر .
شكرا مره ثانيه .

اخوي MajNoOoOoN
صدقني اني اخذتهم من البيت قبل نص ساعه من الموعد لكن وش تقول بزحمة الرياض وغثاه :(
يعدين انا تراي في كليه الهندسه قسم ثروه حيوانيه ... صحح معلوماتك يالغالي :)
مشكور يالغالي :) :)

<IMG SRC="http://www.alsakher.com/ubb/smilies/smileymap.gif" border=0>


============
الفلسفة ان تكون انت لا ان تكون غيرك :) :)

عاشق ثراها
21-11-2000, 03:16 PM
هههههههههه
موضوع رووووووووعه واسلوب كوميدي بحت
هههههههههه
والله يانا احب العجز بالذات مواصفاتاكالعجيز يامالا الجنه
هههههههههه
يا انك عليك افكار خبله&gt;&gt;&gt;&gt;&gt;يفكرها مدحه
تسلم يدينك يا شيخ...والله يسلمهن من الكسور ان شاء الله
والله يخليك لميمتك وخيتك ويخليهن لك ويخليك لعينن ترجيك
تحياتي لك
تشاو<IMG SRC="http://www.alsakher.com/ubb/smilies/cwm26.gif" border=0>

------------------
ان كنت لا تدري فهذ مشكلتك يا ابو الشباب...اللي بعدوه

majmo3at_ensanah
22-11-2000, 09:30 AM
<center>حلوه القصه مسكينه والدتك فاتها الموعد مره تانيه اخرج قبلها بساعه ونص..اقوول كنت كشفت بدالها</center>

اخوعتاب
23-11-2000, 09:57 PM
كـــــــــــــــــاع ....كـــــــــــــاع ....كــــــــــاع <IMG SRC="http://www.alsakher.com/ubb/smilies/cwm30.gif" border=0> <IMG SRC="http://www.alsakher.com/ubb/smilies/cwm30.gif" border=0> <IMG SRC="http://www.alsakher.com/ubb/smilies/cwm29.gif" border=0> <IMG SRC="http://www.alsakher.com/ubb/smilies/cwm30.gif" border=0> <IMG SRC="http://www.alsakher.com/ubb/smilies/cwm30.gif" border=0> يخـــــــــــرب كشتك ..على هالمـــوعد...الله يرجك ..لانك رجيت المستشفى و رجيت عجوزك و المرضى و الدكاتره ..كل هذا و كانك ما شفت شي ..يمشي جنبك بالاسياب ..<IMG SRC="http://www.alsakher.com/ubb/smilies/cwm30.gif" border=0> اهنييك على هالموضوع الحلوووووووو ..و كثر منه لو سمحت ..

<IMG SRC="http://www.alsakher.com/ubb/smilies/cwm44.gif" border=0> <IMG SRC="http://www.alsakher.com/ubb/smilies/cwm32.gif" border=0> <IMG SRC="http://www.alsakher.com/ubb/smilies/cwm44.gif" border=0> <IMG SRC="http://www.alsakher.com/ubb/smilies/cwm3.gif" border=0>

<FONT COLOR="#800080" SIZE="1" FACE="Simplified Arabic,Verdana">تم تحرير الموضوع بواسطة اخوعتاب بتاريخ 23-11-2000 الساعة 10:05 AM</font>