PDA

View Full Version : أنا جاى بناء على دعوه من nour



مصرى
26-01-2004, 06:05 PM
(مش مكسور)

ممكن يعنى صحيح تخسرنى
لكن مش ممكن تكسرنى
قللب كده فى تاريخ أيامى
وشوف كام صفحة حزن وعدت
ومهما إتمدت
وسط ألامى
تلمح دايما طاقة نور
تلمح دايما باب مكشوف
وحلم بياخد من نهر الأيام الصعبه
وجسر الخوف
ويرمى فى بحر أبعد م الشوف
ومش مكسوف
إنى أقول لك
ياماسهرت الليل مخنوق
وإنى حقيقى بجد خجلت
ارفع لحظه عيونى لفوق
بس ماكانش عشان مكسور
لكن كنت بقوى ف كتفى
وكنت بدوس على نقطة ضعفى
وبصرخ
بصرخ من المى ومن يأسى
كنت بعالج نفسى بنفسى
وبضعف بينى ومابين نفسى
لكن ماسمحتش ولا مره
إنك ممكن لحظه تشوف
ومره ف مره الأزمه تولى
وارجع تانى اصوم وأصلى
واللى حصل لى
زى اللى بيحصل للناس
والقلب دا مركب الماس
والإحساس
وسط ليالى الموج والضلمه
هو فنارى اللى يبصرنى
وبكررها
مش ممكن ابدا تكسرنى
وإن كان يوم وقدرت عليه
قول فكرنى
وإتذكرنى
زى جبال الصحرا العاليه
صابره وهاديه
لكن جواها البركان
اللى هييجى ف لحظه يثور
مش مكسور


وقادر أطوى الصفحه دهيه
وسهل عليه
أبدأ صفحه فى أى كتاب
ومش كداب
وإنت عارفنى
وعارف إنى
ولا شئ فى الدنيا بيجبرنى
وعارف إنك
مش ممكن ابدا تكسرنى
وماتفسرش كلامى دهوه
على إن اننا إنسان مغرور
مش مغرور
لكن ولا شئ بيخوفنى
والتيار عمره مايجرفنى
ولابقبل فى الدنيا مذله
وزى الشجر الطارح ضله
بتشدنى للارض جذور

nour
26-01-2004, 06:30 PM
الغالي مصري
إسمك له في فمي طعم حلاوة مصر....(كيف فاتني إختيار ذلك الإسم؟!)

حقٌ علي المزور أن يكرم ضيفه

شعرك جميل دون مجاملة أو مواربة
عاميتك سلسة و مفعمة بالإحساس القوي
تمتلك الإحساس يا أخي و كتابتك بالعامية تجعل إحساسك يصل سهلا للقلب...يتسلل له
أعجبني جدا ذلك المقطع:
ياماسهرت الليل مخنوق
وإنى حقيقى بجد خجلت
ارفع لحظه عيونى لفوق
بس ماكانش عشان مكسور
لكن كنت بقوى ف كتفى
وكنت بدوس على نقطة ضعفى
وبصرخ
بصرخ من المى ومن يأسى
كنت بعالج نفسى بنفسى
وبضعف بينى ومابين نفسى

وإن كنت أفضل حذف الواو التي في الشطر الأخيرة قبل "بضعف"
أشعر أنها ستكون كذلك أسلس
أيضا وجدت شطرة أريدك ان تقرأها وتعيد فيها النظر:

واللى حصل لى
زى اللى بيحصل للناس
والقلب دا مركب الماس


الشطرة الأخيرة من ذلك المقطع " والقلب دا مركب الماس" أحسست بها غير موزونة لأني نطقتها "الماس" بألف وصل
ربما ينضبط الوزن إذا كنت تقراها "ألماس" وهي نطق عامي عند البعض لـ"ألماظ"ّ!

الخحديث عن شعر العامية يطول يا أخي
أنا أحد عاشقي شعر العامية إبتداءا من فؤاد حداد و صلاح جاهين إلى الأبنودي و سيد حجاب

لي محاولات في العامية أحب أن تقراها
وكما تعرف لا يحق لي الأن ان أرفعها للصفحة الاولى لذا أرجو ان تقوم ببحث عنها و تخبرني رأيك وملاحظاتك الكاملة عن الوزن و الألفاظ
أو قوللي و انا أجيبهالك لحد هنا يا مصري بيه

ماشي يا مصري باشا

تحياتي

نور

مصرى
26-01-2004, 06:37 PM
الله الله على الإستقبال والحفاوه ... أهو ده الكلام ولا بلاش

وتشريح كمان للقصيده ... الله أكبر ... دى اكتر حاجه بحبها والله

هكلم معاك بإستفاضه بس بعدين ... فى وقت فاضى قوى ... ربنا يكرمك ياعم نور
تحياتى

samiawad3
26-01-2004, 08:30 PM
أهلين بيك بغواية الحروف أخى مصري
ومصر منوره كلها
والساخر كله

مصرى
27-01-2004, 07:12 AM
جيت تانى يانور ... ياللى طمعان فى إسمى :h:

وشكرا أولا على الترحيب ... وعلى الثناء الذى يشعرنى بأن ما أكتب له قيمه حقيقيه .... ندخل بقى فى التشريح

الشطرة الأخيرة من ذلك المقطع " والقلب دا مركب الماس" أحسست بها غير موزونة لأني نطقتها "الماس" بألف وصل
ربما ينضبط الوزن إذا كنت تقراها "ألماس" وهي نطق عامي عند البعض لـ"ألماظ"ّ!
-------------------------------------------

بينى وبينك أنا مش مقتنع بالمقطع كله بأمانه يعنى ... عندك حق وحاسس إنه زياده

أولا ياعم نور ... أنا يسعدنى جدا أقرأ لك وخاصة العامى ... وسعيد إن فيه محاولات عامى قبلى ... ولو إنى شايف إن فرض العامى هنا صعب ... وعلى أى حال ياعم نور هجيب المشاركات دى وأقراها
بس ياريت تساعدنى بلينك أو بإسم أصلى لسه غريب برضه فى القسم :D:

يلا خلينا نعمل ثنائى :u:

مصرى
27-01-2004, 07:13 AM
samiawad3

ربنا يكرمك ويعزك ... أنا سعيد بوجودى وسطكم ... تقبل تحياتى

الحنين
27-01-2004, 07:17 AM
أهلا بك هنااااااااااا بين اخوتك فى الساخر....




مع كل الود اخى الكريم:nn

صخر
27-01-2004, 09:54 AM
مرحبا بك أخي الكريم مصري ..
سعدت بقراءة قصيدتك الجميلة ..
بانتظار المزيد

لك تحياتي وشكري

nour
27-01-2004, 04:03 PM
دعما لفكرة الثنائي الخطير :)

أسماء مشاركاتي العامية هي:

طب قوللي بس إزاي يجيلك مرة نوم
موال طويل
ياللي إتنسوا في القطر
من عمري فات عشرين سنة
بنفتح الجرنان
كره القلم


تمام!
كل سنة و إنت طيب يا مصري يا طيب

نور

al nawras
27-01-2004, 05:43 PM
مصري

لك علينا حق الضيافة والإستقبال من ناحيتين
1)أنت ضيف على نور وضيوف نور ضيوفنا
2)وضيف على الغواية...وهم كذلك

إيه يا عم نور...أهكذا تستقبل ضيوفك...بالتشريح..!!!
الضيافة العربية ثلاثة أيام يا صاحبي...صح

أهلا بك أخي مصري
أغنيتك جميلة حقا
وستجد لك بيننا مكان...وأي مكان

تحياتي لكما

النورس
ر.ا.ح

(سلام)
27-01-2004, 07:35 PM
حخش في المعارضة الشعرية

أنتظروني

ستستغربون

سلام

ابو طيف
27-01-2004, 10:25 PM
هلا بك اخوي

منور الحته كلها :)

حتة الساخر

وتسلم على مشاركتك الجميله واشكر لنور الذي دعاك هنا


تحياتي

====

مصرى
28-01-2004, 06:20 AM
الحنين
أشكرك أخى الكريم ... أناإتشرفت جدا بيكم
تحياتى

مصرى
28-01-2004, 06:24 AM
صخر
أشكرك اخى ... وأشكرك على الثناء
تقبل تحياتى يا أخى

مصرى
28-01-2004, 06:26 AM
nour
صاحب الدعوه الجميله ... ماشى ياسيدنا ... أنا سعيد إنى هشوفهم وهعلق عليهم هنا تانى إن شاء الله
شكرا يانور ع الدعوه وعلى كل شئ ... واضح إن ليك شعبيه
تحياتى

مصرى
28-01-2004, 06:30 AM
al nawras
أشكرك أولا على الضيافه ... واحب أسجل إعتراض

الضيافة العربية ثلاثة أيام يا صاحبي...صح

ثلاثة أيام بس !!!!! ينفع كده ... على أى حال ضيافة يوم عندكم بالف يوم

وبعدين بخصوص الإستقبال بالتشريح ... فده شئ جيدا جدا ... ولازم تفيدونا بخبرتكم ... ولا إيه ؟

أنا اشكرك يانورس ... وسعيد بوجودك فى موضوعى
تقبل تحياتى

مصرى
28-01-2004, 06:32 AM
(سلام)
أهلا سلام ... صدقنى أنا فعلا مستغرب ... ياعم خليك فى الحكومه أحسن
مستنيينك
تحياتى

مصرى
28-01-2004, 06:35 AM
ابو طيف
الله يخليك يا اخى الكريم ... الساخر منور بأهله ... أنا حبيت بس أستظل هنا فى رحابكم شويه
أشكرك يا أخى وتقبل تحياتى