PDA

View Full Version : (عم سليم) ... ديوانى الجديد



مصرى
09-02-2004, 07:29 AM
إخوتى الأعزاء
سعيد جدا ... بمناسبة صدور ديوانى ( إياك تتكلم أو تهمس ) هذه الايام ... والذى سيطرح فى المكتبات قبل شهر بمشيئة الله ... دى قصيده من الديوان ... أتمنى تعجبكم ... ولا تنسونا من دعائكم بالتوفيق ...
أيمن عماره



( عم سليم )



عم سليم ساب التعليم
من أيام الإبتدائيه
لكن دايما فكره سليم
وكلامه زى اللافنديه
حافظ كل تاريخ اوطانه
وعارف واجبه
وحق جيرانه
وراجل وطنى
ميه الميه

وف يوم كان قاعد متضايق
قمت سألته
ليه متعكر مانتاش رايق

قال مابقاش النيل يروينى
ولا حاجه ف تعبى تهدينى
حتى الشجره .. والعصفور
والبدر اللى بيطرح نور
حتى البقره لما تدور
حوالين الساقيه وتعمل صوت
مابقاش نغمتهم تحيينى
عارف ... زى ماكون مخطوف متاخد
من عمرى ومن كل سنينى
بس هقولك لك إيه ياوليدى
دا حتى وريدى ...
مابقاش فاضل فيه من دمى
...
أنا مش فاهم حاجه ياعمى
...
إسمع يابنى ....
إيه إحساسك
لما بتلمح ورده ف عودها
مش بتفكر إنك دوغرى تروح وتاخدها
وبتقطفها ..
وتزوق بيها الشباك
وبتتنفس نفس هواك ..
وبتسقيها بنفس الميه
ونفس الشمس
اللى بتحضن كل الدنيا
يوم والتانى
لماتشوف بعنيك أخرتها
ماتت ..؟!!
طيب فكرك إيه موتها
ماتت
لما إتخلعت من وحلتها
...
إيه بس ياعمى اللى جرالك
...
شكلك ضعت هبسطهالك
إيه رأيك لو أشيل العمه
والجلابيه ..
وأحلق شنبى ..
وألبس أفندى
لأ ..
وألبس شورت وكاب وفانله
وأسيب دارى ..
وأتبرأ من كل جيرانى
وأروح أخد بيت فى البندر
وأتشيك وألبس وأتغندر ...
وأصبح واحد م الأوباش
وأبيع الأيام ببلاش ...
وأخرج م الأعراف والمله
تخرج م الأعراف والمله ..!!!!
إنت ياعمى ماتعملهاش
...
ماعملهاش ... ليه؟ ...
هوه أنا مش واحد م الناس
...
طبعا ناس ..
وطنى ومليان بالإخلاص
وعايش ع الصدق وع الزمه ...
ولسه ياعمى ف قلبك همه
يبقى طبيعى ماتعملهاش
طيب دورى وتسمع منى ..
وإتحملنى ..
وقدرك محفوظ عندى ياعمى

عمرك شفت الكون بينور
من غير شمس
أو عصفور بطل طيرانه
أو بيصوصو
همس ف همس
ولا سحابه
نسيت ترمى مطرها علينا
ولا مدينه
فضلت طول العمر حزينه
إحنا العصفور
وإحنا الشمس
وإتجمعت الغيمه علينا
وإحنا سفينه ...
لكن بكره هنلقى المينا
الموضوع لساه ف إيدينا ..
وبكره نحقق اللى ماحققناه بالأمس

jonur_pen
09-02-2004, 01:08 PM
اخي المصري الف مبروك
وانشاء الله من المتفوقين واري كلماتك العاميه البسيطه اقرب الي الروح والكل يفهمها ولذلك سوف تجد النجاح انشاء الله

nour
09-02-2004, 04:14 PM
زغرودة مصرية مجلجلة :لولولولولولولولولولولوي

مبروك يا أيمن باشا
و عقبالنا يا رب
بس لازم أعرف منك هي منشورة في دار إيه و أشتريه من أي مكتبة
إحجز لي نسخة ربنا يخليك
ألف مبروك
و القصيدة أنا سجلتها عندي
و حاقراها بمتعن مع كباية شاي و(لي عودة بعد القراءة)

نور

nour
09-02-2004, 04:54 PM
الله عليك يا مصري باشا

قصيدة حلوة

فقط لدي ملاحظات صغيرة

في المقطع:

قال مابقاش النيل يروينى
ولا حاجه ف تعبى تهدينى
حتى الشجره .. والعصفور
والبدر اللى بيطرح نور
حتى البقره لما تدور
حوالين الساقيه وتعمل صوت
مابقاش نغمتهم تحيينى


أشعر بإختلال في الوزن في :( حوالين الساقية بتعمل صوت)
ربما كان من الأفضل حذف (ال) التعريف من (الساقية)

البدر اللى بيطرح نور
حتى البقره لما تدور
حوالين ساقيه وتعمل صوت

أحس انها كذلك اوقع لحنا و أسلم وزنا

أيضا أنصحك أن تفصل بين الشطرتين التاليتين:
عارف ... زى ماكون مخطوف متاخد

لتصير:

عارف ...
زى ماكون مخطوف متاخد



بس بصراحة
شعرك لذيذ
فيه سلاسة و موسيقى جميلة و سهلة

أما بقى المقاطع اللي خلتني أقول :الله عليك يا مصري

إسمع يابنى ....
إيه إحساسك
لما بتلمح ورده ف عودها
مش بتفكر إنك دوغرى تروح وتاخدها
وبتقطفها ..
وتزوق بيها الشباك
وبتتنفس نفس هواك ..
وبتسقيها بنفس الميه
ونفس الشمس
اللى بتحضن كل الدنيا
يوم والتانى
لماتشوف بعنيك أخرتها
ماتت ..؟!!
طيب فكرك إيه موتها
ماتت
لما إتخلعت من وحلتها
...

بالذات أول قطعة من هذا المقطع إستمتعت به جدا

برضه المقطع:

ماعملهاش ... ليه؟ ...
هوه أنا مش واحد م الناس
...

فيه لذة الحوار اللي بحس إني بأسمع واحد بيتكلم فعلا
عفوية حلوة

أما (واسطة العقد) و درة القصيدة فهي ذلك المقطع:
عمرك شفت الكون بينور
من غير شمس
أو عصفور بطل طيرانه
أو بيصوصو
همس ف همس
ولا سحابه
نسيت ترمى مطرها علينا
ولا مدينه
فضلت طول العمر حزينه
إحنا العصفور
وإحنا الشمس
وإتجمعت الغيمه علينا
وإحنا سفينه ...
لكن بكره هنلقى المينا


(ولا مدينة
فضلت طول العمر حزينة)
الله عليك بجد.....هذا البيت أحس به عذبا


مبروك أخي مصري صدور ديوانك
و أرجو ان تخبرني من أين يمكنني الحصول عليه
أنا ساكن في إمبابة...يعني حاول تقوللي أقرب مكتبة مني أشتري منها الديوان!
لك مني خالص الود

نور

salem salim
09-02-2004, 05:50 PM
انت كويس آوي اخونا مصري ،


تحيااااااتي لك اد الدنيا

مصرى
10-02-2004, 06:45 AM
jonur_pen

أولا كده وقبل ما ارد عليك اخى الكريم .... عايز اشكر كل اللى قرأ وكل اللى علق ... وقال وجهة نظر ... بجد غديتونى غحساس هايل مش ممكن يتوصف

أعلق بقى
أشكرك جدا على كلماتك العذبه فى حق كلماتى ... ويارب ربنا يخليك
أشكرك على تمنياتك لى ... وربنا مايحرمنى منكم

مصرى
10-02-2004, 06:50 AM
نور باشا
صباح الفل
يا أخى إنت دايما تيجى على الجرح ... سبحان الله
اللى ماعجبكش فى القصيده هوه نفسه اللى وقفت كتير عنده ... ملاحظات ف محلها ماشاء الله ... وتعديلات برضه ف محلها ... ربنا ينور عليك ياشيخ
بس عارف ساعات كتير تقف عند الكلمه وتتنح ... وتقول هيه دى وبس ... وتفكيرك كله يقف عند المعنى ... وتعتقد إن المعنى ممكن يعوض النقص ... بس مهما كان برضه ... بتلاقى حل ... ولو حتى مش ف دماغك ... بيكون فى دماغ غيرك

شكرا يانور على النقد الهادف الراقى ... وإن شاء الله لما الديوان ينزل السوق هبلغكم بمكان البيع
شكرا يانور

مصرى
10-02-2004, 06:51 AM
salem salim

ربنا يخليك يا سالم ... شكرا يا أخى
تحياتى

ابو طيف
10-02-2004, 12:12 PM
هلا اخوي مصري

الف مبروك


تسلم على هذه الروعه

تحياتي لك

===

مصرى
11-02-2004, 07:16 AM
ابو طيف
هلا بيك ياعمى
الله يبارك فيك وف عمرك
وأشكرك على تشجيعك ... ربنا يكرمك
تقبل تحياتى

رورو باشا
18-03-2004, 11:50 PM
لكن بكره هنلقى المينا
الموضوع لساه ف إيدينا ..
وبكره نحقق اللى ماحققناه بالأمس
:u:
أراك اليوم متفائلا
يمكن محتاجين فسحة أمل
مش عارف بصراحة!!
يمكن معاك حق

دمت متفائلا:)

مصرى
20-03-2004, 07:11 AM
رورو باشا

صباحك أبيض ياعمنا
أنا دايما متفائل الحمد لله .... وعارف ومتأكد إن الأمور هتتغير للأحسن ... بس كان نفسى أشوف ده بعنيه فى حياتى ... يمكن أشوف ده ويمكن لأ ... لكن بمشيئة الله الأمور هتتغير

مش عارف اشكرك إزاى على الدفعه المعنويه اللى بتعطيهالى ... كتر خيرك
وربنا يخليك