PDA

View Full Version : جرح الكـبد



ولد الرياض
16-11-2000, 03:27 PM
يالله يالي كل خلقه ترجاه**** ياللي كفلت ارزاق كل الخلايق
انك ترده لي واشاهد محياه**** يصير صدري به وسيع البنايق
جتني حروف الشعر من خط يمناه****يشكي على البعد ولهان ضايق
دريت به مشتاق والشوق معناه**** وده يجي عجل وللقرب تايق
قلبي غدا تعبان من عقب فرقاه****يسوق قلبي له من الوجد سايق
يوم عرفته فيه يا زين ذكراه****يوم سقاه الغيث للعين شايق
وش حيلتي وانا وحيد بلياه**** بالي معه مشغول ما هوب رايق
قمت احسب التاريخ واقول ويلاه****بس اتحرا جيته واتوايق
عزي لمن سافر حبيبه وخلاه****يبكي ولا يقدر يزيل العوايق
كبدي بها جرح عسى الله يرفاه**** الشاهد الله كن فيها حرايق
ما يحتمل بعدي وانا البعد مقواه****موثوقين الود بااحلا الوثايق
امشي خلاوي وروحي تمناه****ليته على اللي بالحشا له تهايق
غيره من العشاق لو شفت مبغاه****للناظر المشدود ما لاق لايق
يا حبني له يا جعل يفداه**** كل الملا عندي وكل الرفايق

------------------
اتخيل قهر غيري وحنا سوى---- وانقهر لا تخيلتك حبيب لسواي
al_yatem@ayna.com

شاصي2000
16-11-2000, 03:47 PM
غيره من العشاق لو شفت مبغاه****للناظر المشدود ما لاق لايق
يا حبني له يا جعل يفداه**** كل الملا عندي وكل الرفايق


صح لسانك على هالقصيده واحلى شي اخر بيتين

ياجعلك سالم

------------------
اللي يبينا عيت النفس تبغيه واللي نبيه عيا البخت لايجيبه

ولهان-1
16-11-2000, 06:43 PM
وش حيلتي وانا وحيد بلياه**** بالي معه مشغول ما هوب رايق
--------------------------------------------------
صح لسانك ولد الرياض00شاعريه رائعه تعلن الحضور
وقصيده ذات وهج خاص ومعاني معبره
ولد الرياض يأتي هذه المره بقوه
الف شكر على التواصل
وهلا بك

------------------
أيه أحبك في برودك واشتعالك
انتي وجدي وانتي بردي وحطبي
walhan_1a@hotmail.com
.......[ولهان-1]