PDA

View Full Version : بـــــــــــذل



وجد الكتابة
02-05-2001, 09:27 AM
عندي قناعة ذاتية ان احساس الفتاة اكبر بكثير من احساس الشاب...وشخصيا احس بغيرة شديدة من مما تكتبه الفتيات......
يمكن للحين تفكير ان الرجل افضل من المرأة معشش في دماغي انا واللي زيي
:)
المهم...اذكر مرة كنت في السيارة اسوقها...
حلوة اسوقها ..يعني واحد في السيارة ايش بيسوي اكيد يا يسوق يا يتكلم في الجوال
:)
المهم فتحت الراديو وكان في برنامج على نهايته
ما اذكر اسم البرنامج ولا كان عن ايش والله
بس كل اللي اذكره انهم كانوا يتكلمون عن فتاة اسمها بذل....ايش سالفتها ما ادري..انا الصراحة عجبني الاسم جدا..لان بذل معناها عطاء
الصراحة الاسم انا شايفه حلو...انتم كيفكم :)

الزبدة...انا من زمان كان خاطري اكتب ابيات
باحساس فتاة...كان خاطري اتحدى طبعا...اعتقد اني نجحت في التحدي..لان جميع من قرأ هذه الابيات
اقسم ان وراءها تختفي انامل ناعمة..مش خشنة زي اخوكم بالله......
الابيات تحمل معنى خيانة الحبيب لحبيبته...
كيف كانت امان وكان خيانة
كيف كانت وفى وكان جفى
كيف كانت بشر وكان...؟؟؟؟؟؟؟؟
هي رسالة لكل فتاة...اكتبيها عندك...يمكن يجي يوم وتحتاجينها....صدقيني بتكون في مكانها...
اقريها وتمعني فيها...هل انتي بذل؟؟؟ هل هناك احتمال ان تكوني في مكان بذل في يوم من الايام
؟؟؟
وشكلي طولت عليكم.....تعالوا نشوف بذل ...
كيف اعطت وشكانت النتيجة
=============================

بذل اسالك بالله لا تتركينــــي
حياتي بعدك يا بذل كلها احـــزان

قالها ووده يرجعني لحنيـــــني
قصده يذكرني بسابق عهود وازمـان

مادرى بذل ماتت فيها السنينــي
ذبح كل ما بداخلها من عطف وحنان

قتل فيني الطفل الرضيع الجنينــي
رمز البرائه تطلبك البيحه يا فــلان

لو رجعت لك عهد اخضب ايديــني
بنار تحرقها لين يموت شريــــان

والله ما ينحني لك راسي وجبيــني
دموعي اليوم غاليه مالها اثمـــان

عطيتك القلب وقلت بعد عطينــي
طلبتك الوفا ورديته لعيني اكـفان

وهبتك الروح وصرخت ما تكفيـني
نشدتك الشرف وشفت عيون شيطان

غطيتك بجلالي يوم قلت دفيــــني
وعز عليك شالك يوم شفتني بــردان
" الشال = الغترة "

خذتك باحضاني يوم سمعت لميــــني
ولميتني بخنجر لين غدى الدم عنـــوان

راجع الحين تقول يا بذل رديـــــني
اسفة افتكرتك للحظة بشر انســـان

ارحل وغادر لا ابيك ولا تبيـــــني
اسمي بذل واسمك فوق خطين حيـــوان!
================================

وسلامتكمـ
--------
الوجد
خلفها دمعه

صيد
02-05-2001, 09:59 AM
يؤ..يؤ...يؤ...قوييه....<FONT COLOR="Green">وجد الكتابه ....</FONT c>

وجد انا الصراحه كنت داخله وانا ناويه ماامدح قصيدتك هالمره. :)

.على اساس ابسوي نفسي خطيره مو كلشي لك يعجبها . :)..بس

الصراحه ماقدرت روووعه ...

غطيتك بجلالي يوم قلت دفيــــني
وعز عليك شالك يوم شفتني بــردان

خذتك باحضاني يوم سمعت لميــــني
ولميتني بخنجر لين غدى الدم عنـــوان

راجع الحين تقول يا بذل رديـــــني
اسفة افتكرتك للحظة بشر انســـان

ارحل وغادر لا ابيك ولا تبيـــــني
اسمي بذل واسمك فوق خطين حيـــوان!

رهيب ...الصراحه ..اسجل اعجابي بهذي القصيده ...بقوه ...كلماتك حلوه ومعبره ياوجد ...تسلم والله ...

بذل &lt;===اسم بذل حلو لو ناخذه من معنى العطا بس يمكن بذل يجي في البال التبذل ..

زي اسم غزل....من الاسماء الي تعجبني بس له ايحاء مو متقبل في المجتمع..

وشكرا لك يامبدع ..واصل ياوجد ..والله القراءه لك متعه.. :)

اختك الصيد....
<IMG SRC="http://www.alsakher.com/ubb/smilies/cwm36.gif" border=0> &lt;===معليش اسمحله توني ماخذه له موعد في عياده نفسيه ....الله يشفيه :)

------------------
صيد مو صيد السلاح........ صيد صيد الارواح........

وجد الكتابة
02-05-2001, 10:06 AM
اممممممم
وين راحت الصورة اللي حطيتها
:(
الحين ما عرفنا الصور الممنوعة
الصور الواقعية ولا الصور المرسومة؟
ولا الاثنين مع بعض...
================================
صيد المشاعر
يا هلا والله
دايم سباقة
:)
يسلم لي وجودك
وانشاءالله اكون عند حسن ظنك
" زعلان علشان الصورة"
:(
==================
الوجد
خلفها دمعه

ضب آطخم
02-05-2001, 10:08 AM
مسااااااااااااء الابداع

صح مشاعر المرأة اكبر بّس من ناحيه الكتابات اختلف معك .. يا شيخ مهب فالحين في شي :) حتى الطبخ مهنتهم الاساسيه الريجيل احسن منهم وسع صدر ... المهم نرجع لموضوعنا

ما بين العنود ووضحى وبذل .. كلمات تزيد بريق ولمعان كلمات رنانه ولحن شفاف

بّس مالك حق في كلمه حيوان تكرم يا غالي

اعجبني ها البيت بالحيل مر :)

خذتك باحضاني يوم سمعت لميــــني
ولميتني بخنجر لين غدى الدم عنـــوان


سلمت وصح لسانك ..

moonlight
02-05-2001, 10:12 AM
و الله فكرتك عجبتني
على العموم الابيات جميله جدا
و تراها ذكرتني بيوم من الايام انا تقمصت فيه دور ولد ... وكتبت هاذي الابيات في حبيبتي الى انا متخيلها :( اكيد مو مغقوله راح تكون حقيقه..
المهم الابيات كانت :
اه مني واه من رجف الضلوع
واه من برد اليالي الموحشات
تايه ادور وراء سكة رجوع
و اتفكر في ليالا مدبرات
كثر حزن و هم و اهات و خشوع
غاب عني الفرح و ساعات المبات
و في ضميري صابني لوعه و خنوع
من لمحت انا الدموع الشاكيات
من وراء الشيله تناديني و تروع
تكسر الخاطر عيونن باكيات
قالت ابكي و اقعي الصعب الفجوع
ابكي احزانن بقلبي طاغيات
ابكي الي كان تشهد له الجموع
ابكي زادي للسنين المقبلات
تصرخ الاهات في قلبا يموع
و تستعر فيني جروح ساكبات
ضاعت الساعات في حزنا جزوع
يذكر الاحداث و تاريخ الوفاة
من ذكرت اخوي هانتني الدموع
و اضمحل فرح السنين الماضيات
لا تقول انتي تراء منتي قنوع
اذكري ربك و عودي افتاة
و سكتت لحظه وردت في خشوع
كود ربي مير يهديني الثبات

وجد الكتابة
02-05-2001, 10:23 AM
هلا وغلا بضب اطخم
يا اخي انت مشرف وتقدر تقول الي تبيه
ما يقدرون يسوون لك شي
انا ما اقدر الا امدحهم
:)
بعدين محد يرد علي
:)
================
الضب الغالي
لا والله اختلف معاك في الرأي
القلم النسائي فرض احترامه غصب علينا
وعذب الكلام خير دليل
بالنسبة لمسألة الطبخ
هذي اتفق معاك فيها 100/100
الله يخلي ميري " الخدامه"
:)
============
ويسلم لي رأيك وحضورك
وفديت خشمك
:)
============
الوجد
خلفها دمعه

وجد الكتابة
02-05-2001, 10:28 AM
من وراء الشيله تناديني و تروع
تكسر الخاطر عيونن باكيات
=======================
يا سلام عليج
شفت يا الضب
والله الابداع عندهم هواية
ابيات اكثر من رائعة يا نور القمر
وخلك ولد على طول
:)
دمتي
======================
الوجد
خلفها دمعه

صيد
02-05-2001, 11:42 AM
اسمحلي ياوجد .. :) .....ابسولف عندك..في موضوعك...

اتصدقون عاد انت ياوجد وياmoonlight هيبين ..تدرون لييش؟؟

لان خيالكم واسع ..كتبتو على لسان جنس ثاني ...
كيف عرفتوا تعبرون عنه ؟؟وانتم ماتعرفون مشاعره ...
اشوفها صعبه مرره...مشاء الله عليكم.

بس والله طلعتوها في بالي :)
ودي اكتب قصيده على لسان رجال :)

بس كيف ابدى ؟؟انا مااعرف ابدا القصايد . :(

ياليت تقترحون لي مطلع واحاول اكملها :)

وشكرا لكم يامن فتحتو لفكري ابواااب :)

اختكم الصيد ...



------------------
صيد مو صيد السلاح........ صيد صيد الارواح........

وجد الكتابة
02-05-2001, 11:59 AM
هلا هلا
الدار دارك واحنا ضيفانك يا شاهة
:)
يؤ يؤ يؤ
:)
طيب كملي هالكلمات
================

خاطري ارسم عيون...طايحة القذلة عليها
شالها فوق المتون...والورد يلعب بيديها
:)
كملي يا صيد
:)
بس لا تتغزلين فيها وايد
بعدين ما عاد نشوف لك كتابات بنت اسمها صيد
:)
دمتي
======
الوجد
خلفها دمعه

صيد
02-05-2001, 08:03 PM
صباح الخير.....

شكرا لك ياوجد ... :)

خاطري ارسم عيون...طايحة القذلة عليها
شالها فوق المتون...والورد يلعب بيديها

الصراحه مطلع القصيده رائع .. :)

والقافيه سهله ...ماقصرت انت ....

بس حاولت اكتب ماعرفت.. :(

&lt;=====سهرانه تحاول ....

كتبت.. :( بس ...مدري اللي يقراها يحس ان اللي كاتبها رجال ...بس خكري..هههههههه.

:) ...ماعرفت اتقممص ..والله....بس ابحاول ثانيه .....

وابرد يوم الجمعه في الليل ... :)

معاني الكلمات :
خكري=يعني شخص ينتمي للذكور بس ناعم ......
<IMG SRC="http://www.alsakher.com/ubb/smilies/cwm36.gif" border=0> &lt;=====من جد هالمره هذا شعوري ....

اختك الصيد ....

------------------
صيد مو صيد السلاح........ صيد صيد الارواح........

عاشق وفاء
02-05-2001, 10:35 PM
ويـن حبـــك والأمــاني يا غـــريــب
******ويـــن قـــولك إنتي هــوايـــا والمـــنى
كنت أظــــن إنك مــرادي والنصـيـب
******وبانت ظنــوني تخــاريـف وخــطــــا
يا خســـارة دمـــع مــن عيني سـكيب
******ليـــه قـلبــك خــان قلبــي وإكتــفـــــى


<FONT COLOR="#800080" SIZE="1" FACE="Simplified Arabic">تم تحرير الموضوع بواسطة عاشق وفاء بتاريخ 02-05-2001 الساعة 10:35 AM</font>

laptop99
03-05-2001, 12:28 AM
اخوي الوجد

صبحك الله بالخير


بصراحه ما اقول


الا


<FONT COLOR="Red">ابداااااااااع حتى النخااااااااااااع</FONT c>

وصح لسانك

------------------


احبك 00 بصمتي اناديك
احبك 00 ساكتبها على رمال شاطئي حتي لو طمستها الامواج ساعود واكتبها
احبك 00 سانحتها على جدران كوخي حتي تظل وتبقي
احبك 00 ساغني بها اشعاري ليعلم كل العالم باني احبك

فضولية
03-05-2001, 01:25 AM
هااااااااااااااي
<IMG SRC="http://www.alsakher.com/ubb/smilies/cwm38.gif" border=0>
اولا..<IMG SRC="http://www.alsakher.com/ubb/smilies/cwm10.gif" border=0>
تراكم زودتوها كتير..
الحين الواحد منكم جالس يتطنز علينا واحنا ساكتين ..
الا ما اقلبها لكم مظاهرة على اصول واكسر لكم الموضوع بالي فيه..
اجل احنا ينقال فينا موبفالحين في شي؟؟؟؟
من رباك انت واهو؟؟ لايكون ميري ؟؟
والا من اكلكم وانتو صغار وتحمل لقافتكم وانتو شباب وثقالة دمكم وانتو انتو عواجيز ؟؟؟؟
لا يكون ميري بعد..؟؟
الا الله يساعد امهاتكم وحريمكم يالنكارين...
<IMG SRC="http://www.alsakher.com/ubb/smilies/cwm10.gif" border=0> <IMG SRC="http://www.alsakher.com/ubb/smilies/cwm10.gif" border=0> <IMG SRC="http://www.alsakher.com/ubb/smilies/cwm10.gif" border=0>
اختكم الحلوة غصبا عن الكل : فضولية :(
***اقول ياوجد تسلم الايادي بس تدر انك ذكرتني بقصيدة لفهد عافت اسمها (لعب عيال )اذا سمعتها من قبل فخلاص واذا لا فقول لي احطها لك..***

------------------
اجمع الحب
والشوق
والحاجة اليك
وصغها كيانا
اكون (انا)

شرقاوي
03-05-2001, 09:00 AM
الغالي وجد الكتابه :)

مساك الله بالخير..

حبيبي موضوع ان البنات مبدعات محد ينكر هالشي هذا..وياما قرينا لشاعرات يكتبن بابداع يتفوق على ابداع الرجل احيانا..لكن الفتره هذي صارت الثقه معدومه في معظم الاسماء النسائيه اللي نشوفها ونقرالها كثير..يعني دايم تدور الشكوك على ان الشعر النسائي غالبا خلفه رجال!!!
شاعرات ينعدن على اصابع اليد اللي نعرف انهن شاعرات وياكثر اللي نشك انها مجرد صوره او اسم ومناك فيه شاعر رجل خلفها..شي مخجل ومحزن بصراحه :(
لو ابعدلك اسماء شاعرات هن مجرد صوره بس كان جلست الى بكره ولو ابعدلك الشاعرات الصدق بخلص بثواني..

اثرتني بصراحه بموضوعك يالغالي..

المهم نرجع لقصيدتك..
زي ماعودتنا ومن نص الى نص تثبت انك شاعر متمكن بمعنى الكلمه ..اقولها بلا مبالغه ولا مجامله فعلا انت شاعر مبدع وكبير..لما اقرالك احسّ اني اقرا لشاعر معروف واسم كبير مدري ليش؟؟؟

عطيتك القلب وقلت بعد عطينــي
طلبتك الوفا ورديته لعيني اكـفان

وهبتك الروح وصرخت ما تكفيـني
نشدتك الشرف وشفت عيون شيطان

البيتين اللي فوق هذولا من جد كل حرف فيها يسوى ديوان..

صح لسانك مليون مره..

<IMG SRC="http://www.alsakher.com/ubb/smilies/cwm38.gif" border=0>

<FONT COLOR="#800080" SIZE="1" FACE="Simplified Arabic">تم تحرير الموضوع بواسطة شرقاوي بتاريخ 02-05-2001 الساعة 09:03 PM</font>

وجد الكتابة
03-05-2001, 11:52 AM
لا ما اصدق
صيد يوقف في وجهها شي
:)
انتي قولي يؤ يؤ يؤ وشوفي شيصير
:)
حلوة سالفة الخكري
طاااااااه
:)
يوم الجمعة بعيد
شتبين تكتبين انتي
:(
========
الوجد
خلفها دمعه

وجد الكتابة
03-05-2001, 11:53 AM
عاشق وفاء
من سمح لك تكتب اشعار بصومعتي
:)
طااااااااه
فديت خشمك
اكتب لا يردك الا الكيبورد
:)
كلماتك رائعة كالعادة
======
الوجد
خلفها دمعه

وجد الكتابة
03-05-2001, 11:54 AM
لاب توب
صح لسانك
وما عليك زود يا الغالي
يتوه الابداع في حضوركم سيدي الكريم
==========
الوجد
خلفها دمعه

وجد الكتابة
03-05-2001, 12:00 PM
فضولية الحلوة
:)
هلا وغلا
اي والله معاج حق هذا الضب كله ينتقد البنات
نسى انهم امهاتنا واخواتنا
:)
توهق الضب
:)
==========
لعب عيال " فهد عافت " طبعا قريتها وسمعتها وانا جدا معجب بهذا الشاعر المبدع على عكس الضب ما يحب فهد عافت......
اذكر بدايتها
هنا نجلس او هنا وين ما تبغين...
......
......
......
ورمت بنت دبلتها الذهب وانكسر رجال
.....
.....
.....
.....
انا من ثلاث سنين بطلت لعب عيال
:)
====
مشكلتي ما احفظ
:(
بس فهد روعة غصب عن الضب
=====
واسمحيلي فضولية لان المواضيع الثانية ما وصلت اسمك علشان ارد عليك..مع اني جدا سعيد بتواجدك وردودك وانتظر منك مشاركة معانا في عذب الكلام
بس تكون حلوة مثلك
:)
==========
الوجد
خلفها دمعه

ضب آطخم
03-05-2001, 12:14 PM
أختى فضوليه ..

كل اللي اقصده المقارنة بين الاعمال المشتركه بين الطرفين

مثل المشاعر المرأة متفوقه لذا هي من تربي وتعلم ......... الخ هذا العمل لا يقوم به الرجل لنه قاسي

لكن ليس من العقل ولا المنطق أن تكون المقارنه في الحمل او الرضاعه

ولك تحياتي
--------------------------------------
يصير خير يا وجع الكتابه :)

متى ما حصلت وقت فراغ.. راح انزل قصايد ما يسمى بالعافت واقارنها مع قصائد اخر لها نفس الفكره ..واحكم بنفسك


ولك تحياتي

moonlight
03-05-2001, 12:29 PM
الاخ ضب اطخم
انا رايي ان الكتابه ليس لها علاقة بالجنس
الابداع ليس له حدود
اهم شئ هو الاحساس الصادق للكاتب او الكاتبه

وجد الكتابة
03-05-2001, 01:08 PM
شرقاوي ابو الشروق
يا هلا والله وغلا
شوف انا هنا اختلف معاك
واعتقد انه العكس صحيح
يعني شاعرات يكتبن بأسماء رجال
شوف احنا مجتمعنا الخليجي له عادات وتقاليد تضيق من وجود اسم المرأة الشاعرة في الساحة الاعلامية...فدائما الشاعرة لا تتعدى اشعارها اسوار البيت وصديقاتها!
====
المهم هالموضوع يمكن نختلف او نتفق فيه..هي في النهاية عبارة عن وجهات نظر
:)
========
بالنسبة انك تقرا لاسم كبير...
لا والله يا شرقاوي ماني كبير..والكبير الله
وشيل من بالك اني متخفي تحت ستار هذا الاسم
:)
انا هاوي ...ويوم بكتب تجربتي مع الكتابة بتتضح الامور اكثر
شاكر لك زيارتك واطرائك..ولا تغيب عن عيونا
تراها تحبك
:)
=======
الوجد
خلفها دمعه

<FONT COLOR="#800080" SIZE="1" FACE="Simplified Arabic">تم تحرير الموضوع بواسطة وجد الكتابة بتاريخ 03-05-2001 الساعة 01:13 AM</font>

وجد الكتابة
03-05-2001, 01:12 PM
ضب اطخم شوف فهد عافت هذا الاختلاف الوحيد بينا
:)
طيب مرة شفت مقابلة للامير عبدالرحمن بن مساعد
على تلفزيون المستقبل...سأله المذيع من يعجبه من الشعراء في الساحة...فأجاب .." فهد عافت"!
=====
هذا مثال بسيط...
وانا بعد بجيب لك قصائد للمجنون فهد عافت..
تشوف فيها ابداع رائع
:)
يا زينك وانت تعاند...
بس تصدق..
انا نزار قباني ما يعجبني!
مع انه قمة في الادب ...
صحيح الناس اذواق!

وجد الكتابة
03-05-2001, 01:15 PM
نور القمر
اتفق مع في رأيك
المهم الاحساس الصادق
للكاتب
او الكاتبه
========
الوجد
خلفها دمعه

جريح الشوق
03-05-2001, 01:28 PM
اخوي الغالي <FONT COLOR="Red">وجدالكتابه</FONT c>

في كل موضوع اقرأه لك اراك متجددا دائما وذو شطحات شعريه غريبه لا انكر ابدا انها ايضا لذيذة جدا جدا ...
انبهرت جدا بالنهايه للقصيده.<IMG SRC="http://www.alsakher.com/ubb/smilies/cwm12.gif" border=0> .تسلم يمينك يالحبيب..

ارحل وغادر لا ابيك ولا تبيـــــني
اسمي بذل واسمك فوق خطين حيـــوان!

تقبل تحياتي وانبهاري باسلوبك المتجدد
اخوك
جريح
------------------
أنا النيران و البركان
وانا اللي طويل الليل
وينك ياونيس الويل
تداوي خنجر بيمناك
وينك ياحبيب الروح
تاهت على أثر ممشاك
انا بك جريح الشوق
بس تفهم..؟!
ماظنّي ..جريح <IMG SRC="http://www.geocities.com/vamoire/Images/Magro7.jpg" border=0> مثلي.

وجد الكتابة
03-05-2001, 01:32 PM
جريح الشوق
انا تأتي الشهادة من شخص مثلك
فهي وسام...
شاكر لك حضورك يا سيدي
وما انا الا حروف تتوه بين كلماتك
دمت لي
======
الوجد
خلفها دمعه

الراشد
03-05-2001, 01:38 PM
وجد الحبيب
مساء الخير

لو ما اعرفك واشوفك كل يوم

كان قلت إلي كاتب القصيده وحده

اخي العزيز دائما متمكن في اي حال

في اي دار في اي مجال

اسجل اعجابي بكل ماتخط

الراشــد

وجد الكتابة
03-05-2001, 01:44 PM
الراشد الغالي
يسلم هالوجود وراعيه
دمت لي
بس مو كأنك جاي متأخر
:)
بدري يا بابا
:)
دمت لي
=======
الوجد
خلفها دمعه

وجد الكتابة
05-05-2001, 07:35 AM
في قصيدة للشاعر فهد عافت
اسمها " كيمياء الغي "
اتمنى اللي عنده ينزلها هنا
:)
========
الوجد
خلفها دمعه

فضولية
08-05-2001, 02:20 PM
تسلم لي يا وجد..
ومشكور على الرد..
تصدق اني كنت راح ازعل.. بس الذوق ما ينزعل عليه..
اما بانسبة لانزال موضوع عندكم..
فاسمح لي انا ضيفة على النتدى ككل..
ما اكتب مواضيع لكن ارد..
عساني بس اكون خفيفة على قلوبكم..
اختك الحلوة : فضولية :(

ماجد ناصر
08-05-2001, 04:40 PM
عطيتك القلب وقلت بعد عطينــي
طلبتك الوفا ورديته لعيني اكـفان


رووووووعه ياوجد الا اكثر من الروعه بشوي يعطيك العافيه:)

مع انك بتكبر روس البنات علينا بس للحق ان البنت لها ماحد زيها بتعبيراتها خياليه بمشاعرها

يالله عاد هذانا مدحناكم يالبني امدحونا شوي عاد:(

وجد الكتابة
08-05-2001, 09:19 PM
فضولية الله يسلمك
وانتي خفيفة انشاءالله على الجميع
بس الضيافة عندنا 3 ايام
انتي صار لك سنه ضيفة
مو كنه مسختيها
:)
=====
يا هلا بك مرة ثانية
ومنور المنتدى من حلاوتك
:)
=====
الوجد
خلفها دمعه

وجد الكتابة
08-05-2001, 09:23 PM
ماجد الغالي
هلا وغلا
لا والله المسألة مو مسألة مدح
بس انا شخصيا مقتنع بهالشي من خلال تجربتي مع المنتديات
بس يبقى احساس الرجل اجرئ
وهذي نقطة تميزنا عنهم
:)
==========
الوجد
خلفها دمعه